Atxik Berrituz giristino taldeak Kristauak Euskal Herriko bake prozesuan liburua argitaratu du Maiatz argitaletxearekin. Giristinoek euskal bake prozesuan zer nolako engaiamendua ukan duten irakur daiteke, lekukotasunen bidez. Mikel Epaltza Zokoako arrantzaleen omonierrak, bere etxean nola gorde zituen ETAren armak azaltzen du, nazioarteko begirale talde batek ikus zitzan, eta talde armatuaren armagabetze nahikeria egiazkoa zela ikus zezaten, eta armagabetzea aitzinatu zedin.

Oraindik hilabete batez Euskaraldian izena emateko aukera irekia zaizue. Euskal herri osoan 70 000 izen emateetatik hurbiltzen ari dira. Iparraldean erran bezala 1.500. Norbanakoak eta entitateek ere parte har dezaten gonbita luzatzen du Euskaraldian talde sustatzaileak. Mementoko 230 entitatek izena eman dute Iparraldean, hauek edozein enpresa, elkarte, saltegi, erakunde, kirol edo musika talde izan daitezke. Zilia Heredia Iparraldeko sustatzailearen arabera : "Entitateen parte hartzeak babes bat emaiten ahal du, komertzio batean sartzean badakigu entitateak parte hartzen duela Euskaraldian eta badakigu lasai aritzen ahalko girela gune horretan." Aurten, beste edizioetan ez bezala entitateek ez dute Arigune izendapena izango baina inprimatzeko baliabideak ukango dituzte eskura apaintzeko gunea, edo euskaraldiko bandera erosteko aukera dute ere 5 eurotan. Euskaraldia tokian toki antolatzeko, herri batzordeak aktibatzen hasi dira, hala nola Iparraldean 45 bat dira momentuko. Batzorde hauek izango dute txapak banatzeko ardura. Jakiteko noiz eta nun bildu zuena, euskaraldia.eus webgunean begiratu beharko dituzue xehetasunak, herri batzordeen mapan. Euskaraldiaren 2022ko azken edizioan 160.000 pertsonak parte hartu zuen Euskal Herri osoan.

2025ean Barkoxeko herriak pastoral berria eskainiko du: Ürrats kolektiboak. Euskal Herriko XX. mendeko borrokak izango ditu ardatz, Enbata mugimendu abertzaletik abiatuta, laborantza, haurren hezkuntza edota euskalduntasunaren aldeko ekimenak aipatuko dituzte. Pastorala era kolektiboan eraikitzea erabaki dute antolatzaileek: zazpi idazlek osatzen dute lantaldea, eta hiru errejent berri arduratuko dira zuzendaritzaz. Parte hartzaileen gehiengoa gazte barkoxtarrez osatua da, eta guztien artean herriko jakintzak eta memoria belaunaldiz belaunaldi transmititzea jarri dute helburu nagusitzat. Etxahun herriko elkartea da pastoralaren antolatzailea, eta pastorala hiru aldiz eskainiko dute: 2025eko uztailaren 27an, eta agorrilaren 2an eta 10ean.

Bortizkeria polizialak aipatzeko eta gogoetatzeko kanpaina bat abiatu du Aske antolakundeak. Aske, Jardun koordinakundean kokatzen den antolakunde antierrepresiboa da, eta bere inguruko antolakundeetako errepresio kasuak salatzen eta militanteak laguntzen ditu. «Poliziaren bortizkeriaren aurrean, Euskal Herri langilea batu» lemapean bortizkeria polizialak salatzeko kanpaina abiatu berri du, Senpereko jendarmeria berriaren aitzinean egin agerraldian azaldu duten bezala. Salatu dutenez Frantziar eta Espainiar estatuek geroz eta finantzamendu gehiago bideratzen dute bere indar polizial eta militarrak armatzeko, eta horren adibide gisa ezarri dituzte Senpereko polizia-etxe berriaren eraikuntza edota Hendaiako udaltzainak suzko armez hornitzeko neurria. Zigor ekonomikoen bidez ere, herritarrek militantziarako jauzia ematea saihestu nahi dutela salatu dute. Kanpaina bururatzeko Amnistia eguna antolatuko dute Senperen ekainaren 7an.