Lorea Agirre: «Gu ere kultur hizkuntza bat gara»

AKTUALITATEA

Lorea Agirre antropologoa eta kazetaria izan da goiz honetako gomita Goiz Berrin. Azken 10 urteetan Jakin aldizkariko zuzendaria izan da, baina Jakin duela 68 urte sortu zen Arantzazuko fraidetxean, euskal kulturari bide emateko eta euskal pentsamendua lantzeko.

68 urte beranduago, bizirik jarraitzen du Jakin, arrefreskatuta eta gazte eta feminista izanik. Euskal pentsamenduan oinarrituta eta gaur egungo gaiei buruzko gogoetarako leku izaten jarraitzen du. Aldizkariak itxura zaharberritu du eta haien webgunea eta plataformak ere eguneratu dituzte.

Lurrama laborantza herrikoiaren festa hastera doa

AKTUALITATEA

Gaur hasiko da Lurrama, laborantza herrikoiaren pesta, ofizialki. Atzo gauean Kortsikako eta Euskal Herriko egoera instituzionalari buruzko hitzaldi ez ohikoa antolatu zuten, eta gaur goizean, 11:00etan, izango da akta ofiziala. Arratsaldean, laborantza herrikoiari buruzko hitzaldi bat izango da. 

Biharko egunean, elikaduraren inguruko hitzaldi desberdinak antolatu dira. Igandean, aldiz, unibertsitate herrikoiari buruzko hitzaldi bat izango da. Horrez gain, tokiko produktuekin eta gonbidatu den eskualdeko (Kortsikako) produktuekin merkatua izango da, beti bezala. Kontzertuak eta otorduak ere egongo dira. 

Etxebizitzaren galdera azkarrari erantzuna eman nahi dio Urdinarbeko herriak

AKTUALITATEA

548 biztanle ditu Urdinarbek, laborantza dinamika azkar batekin; 47 etxalde guztira. Horrez gain, 20 bat elkarte eta zenbait enpresa ere badaude.

Lan nagusia etxebizitzan egin dute, eskola aurreko etxe bat berrituz. Egun, herriak 9 bizitegi alokatzen ditu. Baina erosteko aukera ere eskaini nahi dutenez, lotizazio bat eraikitzen ari dira. 6 lote daude salgai, 30 eurotan m²a.

Etxebizitzaren inguruan kezka bat agertzen da etxe zaharrekin, azken 8 urteetan hutsik dauden etxeak bikoiztu egin baitira, 16tik 34ra pasatuz.

Aprendizgoarentzako laguntzak txikitu nahi ditu gobernuak

AKTUALITATEA

Datozen urteko aurrekontua eztabaidatzen ari diren une honetan, proposamen batzuk egin ditu Barnier-en gobernuak. Eta horrek bazterrak harrotu ditu. Aprendizgoa, edo eskola eta lana nahasten dituenarentzat, orain arte 6.000 euroko laguntza proposatzen bazen, laurden bat txikitu nahi dute eta 4.500 eurokoa izatea proposatzen dute.

Enpresa txikiek dituzte, gehienbat, aprendizak enplegatzen, izan okindegietan, ile-apaintzaileetan edo baita harriketa edo margolantza lanetan ere.

Benat Casanave ODACE-ko kidearengana joan gara jakiteko zer pentsatzen duen horretaz eta zer ondorio ekar litzakeen.

Hitzak Lege erakusketa ikusgai Donibane Garaziko herriko etxean

AKTUALITATEA

Hitzak Lege, garrantzi historikoa izan duten euskarazko testu juridikoak biltzen dituen erakusketa, Baxe Nafarroako hiriburuan ikusgai dago. Baionan, Iruñean, Bilbon eta Euskal Herriko beste hainbat hiriburutan izan ondoren. 

Asteazkenean estreinatu zen Donibane Garaziko herriko etxean. Gotzon Lobera, Bizkaitar legegile eta Euskaltzain urgazleak, erakusketaz gehiago azaldu digu. Erakusketa Donibane Garaziko herriko etxeko ohorezko aretoan ikusgai dago abenduaren 6a arte (astelehenetik ostiralera, 08:30etatik 12:00etara eta 14:00etatik 17:30etara). Terres de Navarre-Nafarroako Lurraldeak elkarteak bisita gidatuak eskainiko ditu ondoko larunbatetan: azaroaren 9an, 16an eta 23an, 10:00etatik 12:00etara.