Jean René Etxegaraik Peio Etxeleku baztertu du Errobi lurraldeko arduretatik. Joan den astean Hirigune Elkargoko buruak jakinarazi zuen poloko hamaika auzapezetatik seik galdegin ziotela Etxeleku ez dadila gehiago erreferente izan, Marieniako lurren harira Kanboko kontseiluan gertatutakoa ez baitu argiki kondenatu. Gutun horren izenpetzaileak Kanbo, Arrangoitze, Ezpeleta, Jatxu, Luhuso eta Zuraideko auzapezak dira. Peio Etxelekuk deitoratzen du ez duela aukerarik izan bere burua defenditzeko. Etxegaraik bere aldetik Elkargoaren funtzionamendua segurtatzeko erabakia hartu duela azpimarratzen du. Etxelekuren kargutik kentzea galdegin duten hautetsien artean, haren talde politikoko bi auzapez badira. 

Heldu da Bidasoaldeko karrikako artearen festibal nagusia. Maiatzaren 22tik 26ra iraganen da Antzerkiaren Maiatzaren 39. edizioa. Nagusiki, Hendaiako Gaztelu Zahar pilotalekuaren inguruan iraganen dira antzerkiak, eta forma guztietakoak izanen dira antzezlanak, zirkua, dantza, musika edota topaketak tarteko. Antzerki gehienak urririk dira, eta aldi honetan, fokoa ekologian ematen entseatu dira antolatzaileek.

Haustura Ahetzeko auzapezaren eta haren zerrendako kideen artean. Philippe Elizalde auzapezak dimisioa emanen du ekainaren 10ean. Astearte honetako kontseiluan, Ramuntxo Goihetexe lehen axuantaren kargu gabetzea onartu nahi zuen auzapezak, baina gehiengoko hamar kidek kontra egin dute. Auzapeza eta bere taldearen arteko desadostasunak Elizalderen dimisioa eragin du.Auzapezak azaldu duenez: «erakundeen inguruko kultura eskas dute» hautetsi batzuek, eta «bere buruan zerbitzu buru bezala ikusten dute». Hauteskundeak ekainean errepikatuko dira, eta Elizaldek bere burua berriz aurkeztuko duela iragarri du. Gehiengoko kideek ez dute adierazpenik egin nahi izan. haatik, gutun baten bidez jakinarazi dute auzapezaren egiteko manerarekin ez dutela bat egiten.

Kanpaldia antolatu du Baionako Ikasle Abertzaleak antolakundeak, Bernart Etxepare lizeoan. Palestinaren askatasuna eta Israelgo estatu sionistaren desegitea aldarrikatu dute. Azken asteetan Gazan bizi zuten sarraskia salatzearekin batera, beren ekarpena egin nahi dute ere, mundu mailan errepresioa jasaten duten guziei. Asteartean elkarretaratzea egin ondotik, Palestinak bizi duen gatazka ulertzeko mintzaldia egin zuten ikasleek. Kanpaldia asteazken goizean bururatuko da, baina palestinar herriaren alde mobilizatzen segituko dutela iragarri dute.