Etxalde kooperatibak bi apartamenduren gozamena ezarri du salgai, Baionan. Etxe hau herritarrei urteko alokairua eskaintzeko proiektua da, Etxalde kooperatibaren bidez. Baina bi etxebizitzek osatzen duten etxea ez da oraindik arras jabetza kolektiboaren alde lan egiten duen kooperatibarena, eta horren erosteko diru bilketa hasi dute. Eraikina erosteko hainbat herritarrek dirua aitzinatu zioten Etxalderi. Orain, mailegu herritar horren zama itzultzeko, 260.000 euro bildu nahi dute salmentarekin. Baionako bi bizitegi horien gozamena saldurik, jabetza soila Etxalderen eskutan geldituko da, eraikina espekulazio logikatik kanpo utziz.

Euskal Herriko eragile ezberdinak Irunen elkartu dira asteazken honetan, migratzaileen eta haien aldeko elkartasunaren kriminalizazioa salatzeko. Emile Zolaren «J’accuse» aldarria bere eginik, muga arrazistak nahiz migrazio politika ankerrak gaitzetsi, eta azken urteetan Bidasoan hildako migratzaileen arduradun izatea leporatu diete frantses eta espainiar gobernuei. Urtarrilaren 26an Ficobatik Hendaiara manifestazioa antolatu dute, eta izenpedura bilketa ere abiatu dute, milaka herritarren sinadurak erdiesteko xedearekin. 2024ko martxoaren 26an, Korrikaren kari, 36 etorkin Lapurdira igarotzen lagundu zieten hainbat pertsonek. Ekintza horren harira, frantses justiziak polizia-etxera deitu zituen zazpi herritar, eta auzibidea ireki zieten. Agerraldian parte hartu duten kideek bere gain hartu dute egun horretako ekinzaren ardura, Etorkinekin-Diakité elkarteko Amaia Fontangek azaldu bezala.

Lehen motako diabetesari buruzko sentsibilizazio eguna azaroaren 24an, Ezpeletan. Mota ezberdinak baditu diabetesak, eta lehen motakoa dutenek intsulinaren beharra dute egunero. Horretarako gluzemia heina automatikoki kontrolatzen duen gailua daramate soinean. Goxokiak elkarteak diabetesak hunkitu dituen familiak biltzen ditu Ipar Euskal Herrian eta Biarnon. Kattin Etxarren, elkarteko kide da eta bere 14 urteko semeak eritasun mota hori jasaten du. Azaldu digunez, azaroaren 24an, oinezko bi ibilaldi, haurren xokoa, apairu alaituak eta Haurrock-en kantaldia antolatu dute.

Baztan, Bortziriak eta Azkaineko talde feministek bat egin dute Lizuniagako lepoan. Udan emandako indarkeria kasuen gorakada salatzearekin batera, hainbat gizonek mugimendu feministak antolatu ekitaldiak boikotatu dituztela gaitzetsi dute. Erakunde publikoengandik konpromiso azkarragoa galdegin dute eta «emazteen kontrako erasoen oldarraldia errotik ezabatu beharreko gaitza» dela aldarrikatu dute. 2003tik, Euskal Herrian, matxismoak 123 emakume eta 12 ume hil dituela gogoratu dute. Hortik harago ere, sexu erasoak eta indarkeria matxista kasuak eguneroko arazoa direla azpimarratu dute.