Joan den ostiralean inauguratu zuten Irungo Oiasso Museoko termen aztarnategia, eta asteburuan 1.700 bisitari baino gehiago bildu dira hara. Egungo Irungo azpian ezkutatuta dagoen Oiasso hiri erromatarraren bigarren aztarnategia da hau; lehenengoa Xantalen ermitan aurkitutako nekropolia izan zen. Termak Kristo ondoko lehen mendekoak dira, eta museoaren atzealdean beiraz estalitako eraikin ikusgarri baten bidez egokitu dituzte. Bi milioi eta erdi eurotik gorako inbertsioa egin dute lanetan, eta “puntako teknologia” erabiltzen duten simulazioen bidez, bisitariek termen funtzionamendua hobeki ulertu ahal izango dute. Oiasso museoko zuzendari Juanjo Jimenezek nabarmendu duenez, hau da museoak 2006an ireki zenetik egin duen aldaketa handiena. Hemendik aurrera, museoaren eta termen bisita batera egin daiteke sarrera bakar batekin.

Joan den asteartean, Iruñeko Nafarroako Errege Artxibo Orokorrak hartu zuen Euroeskualdearen ezohiko batzarra, eta bertan erabaki zuten Akitania Berria, Euskadi eta Nafarroako sei ordezkarik hiru proiektu estrategiko aurkeztea POCTEFA AFOMEF programaren baitan. Ekimen hau INTERREG programaren barruan kokatzen da eta Mendebaldeko Eremu Funtzionalaren (AFOMEF) estrategia integratuan oinarritzen da. Proiektuek hiru ardatz nagusi jorratzen dituzte: mugaz gaindiko enplegua indartzea, garraio publikoaren arteko loturak hobetzea eta eleaniztasuna sustatzea hezkuntza-sisteman. Helburua, Euroeskualdeko zuzendari Arola Urdangarinen hitzetan, “mugaz gaindiko lurralde bateratuago bat eraikitzea da, non enplegua, mugikortasuna eta hizkuntza-aniztasuna ez diren oztopo, baizik eta aukera.” Lehen proiektuak lan-merkatu transnazionala indartu nahi du, lurralde arteko koordinazioa hobetuz eta mugaz gaindiko langileen zailtasunei irtenbideak emanez. Bigarrenak, berriz, garraio publikoaren interoperabilitatea eta eskaintza hobetzea du jomuga, trenbide eta hiriarteko garraio sistemetan. Hirugarren proiektuak hezkuntza eleanitza garatu nahi du, gaztelania, frantsesa eta euskara hezkuntza-esparruan txertatuz eta baliabide pedagogiko berriak sortuz. Proiektuak onartuak izanez gero, 2025eko maiatzean abiatuko lirateke, eta lau urteko epean, 2029ko maiatzera arte, gauzatuko lirateke.

Denboraldi bikaina borobildu zaio Baionako Avironeko futbol taldeari. Nationale 3 txapelketako azken lau partidak galduz ere oraindik aitzina, lehen lekuaren atxikitzea segurtatua dute. Heldu den denboraldian Nationale 2an lehiatuko dira. Maila horretan ari den Angeluko Genêts taldea zailtasunetan da Nationale 2ko azken lekuan baita. Baina matematikoki beren tokia maila horretan salba dezakete oraindik Genêts taldeko mutikoek.

Kepa Anabitarte Pasaian (Gipuzkoa) sortu zen duela 92 urte. Frankoren kontrako borrokan engaiatua, ELA euskal sindikatuan aritu zen lanean bai erbestean eta baita Euskal Herrian ere, sindikatua debekatua zenean. 1962an Alemaniako Munich hirian egin zen bilkura famatuan parte hartu zuen, Francoren ondorengo egoeraz eztabaidatu zen bilkuran. Parisen ere Jose Antonio Agirre lehendakaria ezagutu zuen eta harremana ukan zuen zenbait urtez. ELA sindikatuak ezkerreko jarreretan gehiago sakondu behar zuela uste zuen Anabitartek eta kritika gogorrak egin zizkion sindikatuaren zuzendaritzari. Ondorengo berrogei urteetan nazio eraikuntzan aritu zen lanean Nabarralde elkartean, eta Orreaga iritzi taldeko kide izan zen. Eneko Bidegainek Kepa Anabitarte. Bizitza bat herriari eskainia liburua idatzi zuen 2024ean. Bidegainen iritziz, Kepa Anabitarte belaunaldi batentzat ispilu izan zen.