Asteazkenean, Baionako Trinkete Modernoan bildu dira euskalgintzako hainbat eragile, sindikatu eta hainbat norbanako, euskararentzat justizia eskatzeko. Euskal Herrian Euskaraz taldeko bi kide apirilaren 11an epaituko dituzte, abenduaren 3an egindako desobedientzia ekintzagatik. Oroitu, «Justizia Euskararentzat» idatzi zuten Baionako Justizia Jauregian Gorka Torre eta Intza Gurrutxaga EHEko kideek. Horren harira, apirilaren 6an Baionako kaleak betetzeko deia egin dute, euskararen aldeko eskubideak aldarrikatzeko.

Donald Trump Amerikako Estatu Batuetako presidenteak laguntza humanitarioko dirua gelditzea erabaki du eta Afrika egoera larrian emateko arriskuan uzten du. Dirulaguntzen gelditzearekin gehienik hunkiak diren herrialdeak dira Sahel-eskualdeko estatuak, Burkina Faso, Nigeria eta Mali bezala. Bamako Maliko hiriburuan giza laguntzan ari da Amaia Bessouet bidarraitarra eta laguntza horien kentzeak ekartzen duen ezinbiziaren lekuko da.

Kirikoketa zinema idazketa tailerraren bigarren edizioa bukatua da. Bi astez, sei idazle elkartu dira haien dokumental edo fikzio proiektuak elkarrekin lantzeko. Joan den ostiralean egonaldiaren bukaeraren kari, tailerra proposatzen duen Zukugailuak zinema gaualdia antolatu zuen Irisarriko Ospitalean idazleek haien proiektuak aurkez zitzaten. Zinemako bi profesionalen eta idazleen arteko elkar laguntzari esker, arrakasta izan da tailerra. Sei idazleetako hiruk haien proiektua aurkeztu dute publikoaren aitzinean: Maia Iribarnek 'Altxaliliak' dokumentala, Miren Dupuyk 'Iraia' fikzioa, eta Carmen Echeverriak 'Le point crocodile' fikzioa.

Asteazken honetan erabakiko du Nazioarteko Euskal Pilota Federazioak, Espainiako federazioa eta Kuba zigortuko dituen ala ez. Joan den abenduaren 28an onartu zuten Euskadiko federazioa FIPV Nazioarteko Federazioaren kide gisa. Baina bi aste berantago, Espainiako eta Kubako federazioek salaketa ezarri zuten Suitzako TAS kirol  auzitegian. Geroztik, Espainiako Kirol Kontseilu Gorenean bitartekari gisa antolatu diren bi bilkuren ondotik, Espainiako federazioak ez du salaketa kendu, nahiz eta lehendakari berria duen. Euskadiko selekzioaren kontrako etsai nagusia izan da Javier Garcia Angulo Espainiako federazioko lehendakari-ohia. Beraz kargua justu utzi aitzin jarri zuen salaketa Kubako federazioko buruarekin batean. Orain, Javier Conde Nafarroako federazioko presidente-ohia da, Espainiako federazioko lehendakari berria. Euskadiko eta nazioarteko federazioek gatazka elkarrizketaren eta lankidetzaren bidetik konpondu nahi lukete. Horretarako, Espainiako Kirol Kontseilu gorena bitartekari gisa jarriz, bi bilkura antolatu dituzte. Bainan Javier Condek ez du Angulok ezarri salaketa kentzen. Azken bilkura asteazken honetan izanen da, eta horren ondotik nazioarteak neurriak hartuko ditu Espainiak eta Kubak Euskadiri buru egiten segitzen badute, nazioarteko lehiaketetatik baztertzeko. Euskadiko federazioak erabaki du Munduko Federazioaren irizpideak segituko dituela. Erran nahi du, Espainiako federazioaren barne diren Nafarroa eta Errioxa, asteburu honetan hasiko den GRABNI lehiaketatik baztertzea. Ostegun honetan hartuko luke erabaki hori, Espainiako federazioak ez balu salaketa kentzen.

Maule Lextarreko auzapezak finantzen kudeaketa osoki asumitzen du. Herriko kontuak oso gaizki dira eskualdeko kontu ganberaren arabera. Bost milioi euroko zorretan da herria, hogei bat mailegu bidean dituelarik. Bestalde, eskualdeko kontulariek 2023an egin bisitatik hainbat kezka agerrarazi dituzte; hala nola gastuen kudeaketa txarra, eta arriskuen gaizki menperatzea. Auzapezak erran digunez, bazekien kontuak tinko zirela, baina inbertsioen egitea erabaki zuten halere. Louis Labadot auzapezak herriko kontseiluan emanen ditu argibideak, martxoaren 31an.

Helegitea ezarriko dio Miarritzeko herriko etxeak, La Negresse auzoaren izenaren aldaketa galdegiten duen epaiari. Administrazio Auzitegiaren deliberoa gibelera botatzeko, auzoari izena eman zion herriko etxeko erabakia ez dela existitzen argudiatzen dute. Mémoires et Partages elkarteak leku-izen horren izaera arrazista eman zuen agerian, eta auzitegietara jo zuen 1861ean auzoari izena emateko herriko etxeak hartu zuen deliberoa bertan behera uzteko. Otsailaren 6an Bordeleko administrazio auzitegiak izendapena aldatzeko hiru hilabete zituela jakinarazi zuen. Haatik, Maider Aroztegi Miarritzeko auzapezak, herriko etxeko erabaki hori ez dela existitzen dio. Xarles Bidegain euskaltzainak historialarien batzordean parte hartu du.

Donibane Lohizuneko portu ondoan, Foch gunearen urbanizazio proiektua amaitzera doa, hiru urteko obren eta polemiken ondotik. Hiri sarrera berrantolatzeko eta lur azpiko aparkalekua nahiz bizitegi eta merkataritza-guneak eraikitzeko helburua du, baina hasieratik eztabaida piztu du. Herri Berri oposizioko taldeak plazaren izaera harritsua eta landare eskasia salatu zuen sare sozialetan. Orain, Herriko Etxeak plaza estreinatuko du Martxoaren 22an, eta Jean-François Irigoyen auzapezak nabarmendu du oposizioaren oharrak kontuan hartzen saiatu direla. Hala ere, oposizioak berriz azpimarratu duenez, plazak herritarrentzako bizi eremuak eskas ditu, hala nola, parke bat edo pilota plaza bat.

Departamenduko tuberkulosia taldeak elkarretaratzea deitu du Donapaleun astearte honetan. Tuberkulosiaz hunkiak diren Xiberoako hamaika etxaldeek kolektibo bat sortu dute 'Collectif tuberculose du 64' izenpean, eta protokolo esperimental baten proposamenak aitzinatu dituzte. Bestalde Frantziako gobernuaren laguntzak galdetzen dituzte biosegurtasunaren plantan ezartzeko, desinfekzioa egiteko eta mozkinen galtzearen konpentsatzeko. Aldi honetan, Donapaleun mobilizatuko dira GDS Osasun Defentsarako Elkartearen biltzar nagusiaren karietara. Izan ere, laborariek salatzen dute GDS administrazioarekin eskuz esku ari dela.

1950 eta 2010 urteen artean eginiko abusuen karira 152 plenta aurkeztu dira orain arte Betherrameko kongregazioaren kontra. Alain Esquerre, Betharrameko biktimen bozeramailea martxoaren 20an errezibituko du Elisabeth Borne hezkuntza ministroak, eta aldiz, Bordeleko errektoretzako zerbitzuek inspekzio bat eginen dute kongregazioan. Laurent Bacho Betharramisten eskualdeko bikario ohia eta gaur egun kongregazioko bozeramaileak adierazi duenez, kongregazioa gertatutakoaz «arduradun» sentitzen da. Bere hitzetan, ez lukete «deus gorde», eta «ez ziren jakinean» ikastetxean gertatzen zenaz, eta erreparazio batzordea antolatze.