Baserrialdean emazteen lekua eta ikusgarritasuna bultzatuko duten proiektuak proposatzeko momentua da. Euskal Hirigune Elkargoak 'Plazandere' izeneko proiektu deialdia abian eman du. Euskal mendialdean kokaturiko edozer egitasmo diruz laguntzea proposatzen du Elkargoak. 100.000 euroko laguntza banatzen ahalko du orotara. Berdintasunaren alde, bortizkeriaren kontra edo emazteen rola argitan emanen duten proiektuak proposatzea da xedea. Deialdia elkarte, sindikatu, enpres, eta egitura kolektiboei zuzendua da irailaren 30a arte.

Haragi ekoizpenen etapa guziak laborarien esku. Anhauzen kokatua den Xuhito CUMAk, lantegi berri bat ireki du Lartzabalen, haragia bestelakotzeko. Gaur egun, 30 laborari biltzen ditu laborantza materiala partekatzeko kooperatiba horrek. Orain, Larzabaleko lantegi berria baliatzen ahalko dute, haragizko produktua, hastetik buru, ekoizteko. Euskal Hirigune Elkargoaren laguntzarekin garatu dute proiektua, eta espero dute kide berriak erakartzea. Bilkura publikoak antolatuko dituzte ondoko egunetan. Betti Duhalde Xuhito CUMAko kideak lantegi berria eraikitzearen zergatia azaldu digu Euskal Irratietan:

Ipar Euskal Herrian kazetari euskaldunak sortzeko programa abian da. Hamabi parte hartzaileek Iparraldeko hedabide euskaldun edo elebidunetan lan eginen dute, eta unibertsitatean kurtsoak jasoko dituzte. Horrela, bi urteren buruan, kazetaritza diploma jasoko dute. Kazetari euskaldunen falta baitzen, diploma horren sortzea erabaki zuten Euskararen Erakunde Publikoak, UPPA Paueko eta Aturrialdeko Unibertsitateak, EHU Euskal Herriko Unibertsitateak eta IJBA Bordele-Akitania Kazetaritza Institutuak. Ikasle-aprendizek bi urteko profesionalizazio-kontratu bat izenpetuko dute hebabide batekin eta IJBA-rekin. EEP erakundeko Ibai Agirrebarrena izan da Goiz Berriko gomita.

Ostiralean hasi zen Donostiako Zinemaldiaren 71. edizioa. Zortzi egunez 232 filma emanen dituzte, horietatik 57 estrainekoz. Igandean, 'Sultanaren Ametsa' animaziozko filma aurkeztu zuten sail ofizialean. Euskal, espainiar eta alemaniar koprodukzioa da, eta 1905ean Bengalen, Bangladeshen idatzitako ipuin feminista batean oinarritua da. Bertan, emazteek kontrolatzen zuten jendarte bat imaginatzen zuen Begum Rokeya idazleak. Filman, gaur egungo neska gazte euskaldun bat Bangladeshera doa, idazlearen aztarnei jarraika bere ametsa ulertzeko. Urrezko maskorra lortzeko lehian da Isabel Hergueraren filma. Euskara, ingelesa, gaztelera, italiera, hindia eta bengaliera naturalki nahasten dira filma horretan. Preseski, Miren Arrieta aktore gazteak jartzen dio ahotsa protagonistari euskaraz, gazteleraz eta inglesez.

Espartinaren interpretazio gunea lau urteren buruan zabalik ikusi nahi luke Louis Labadot Mauleko auzapezak. Zentroa herriko etxearen gibelean diren eraikin hutsetako batean kokatuko dute, Ühaitza ibaiaren hegalean. Hastapenean, espartinei buruzko museoa eraikitzea zen herriko etxearen helburua, baina hiriko espartingileak kontra agertu ziren, gune horrek lehia eginen zielakoan. Labadok aurkeztu egitasmo berrian, haatik, ez da salmenta gunerik izanen, eta espartin-industriaren historia soziala ere agertaraziko dute, langileen borroka eta greba gogoangarrien oroigarri.

Supermerkatuetako ezantzategietan, erregaia bere kostuaren petik saltzea. Horixe proposatu du frantses Gobernuak ezantzaren prezioaren goititzeari buru egiteko. Abenduaren lehenetik litro bakoitzaren prezioa, gehienez, 50 zentimoz jautsi liteke. Sei hilabetez luzatuko litzateke neurria, eta banatzaile handien nahiz independenteen arteko lehia mugaraino eraman lezake, bigarren horien kaltean. Abantsu 6.000 ezantzategi biltzen dituen Mobilians sindikatuak, galduz saltzea ez dela eztabaidagarri adierazi dio Gobernuari.

Urketako eskola publikoan, murgiltze sistema plantan eman dute. Euskararen Erakunde Publikoaren protokoloaren urratsak segitu dituzte, Bordaleko Hezkuntza Ikuskaritzaren onespenarekin. Iragan irailean abiatu zituzten gogoetak, ama eskolatik lehen mailako lehen urtea bitarteko ikasleei euskara hutsean ikasteko aukera emateko. Orotara, 50 ikasle izanen dira murgiltze ereduan, ikasturte honetan. Eskola sartzea prestatzeko bilkurak egin dituzte gurasoekin, eta beste eskoletako gurasoen esperientziak ere entzun ahal izan dituzte.

Ez da bide erraza izan, eta oraino bost urte goaitatu beharko dira, baina Yves Ugalde Baionako Euskal Museoko presidenteak baieztatu du, «Xiberoan adar bat sortzeko asmo fermua du Euskal Museoak». Ondarearen etxean izanen da, baina eraikina funtzio berriei egokitzeko lan andana egitekoak dira oraino. Badu urte zenbait xede hau gogoetatzen ari direla, Xiberoan bildutako aurkikuntza arkeologikoak tokian berean erakutsiak izan daitezen. Gaur egun, materialak Baionara igortzen dira Xiberoako lurraldean ez baita horiek zaindu eta aztertzeko gunerik. Egitasmoa programazio fasean da; elkarte eta interesa duten eragileekin lankidetzan dihardute, eta arkitektoekin urte eta erdiko lana dute oraino egiteko. Egokitze lanak burutzeko 18 hilabete beharko dituzte. Departamenduaren eta Akitania Berria eskualdearen babesa bildu dute, eta beranduenik, 2029an irekiko da.

2013ko 'Alternatiba' egunetik hamar urtera, 10.000 pertsona bildu nahi ditu Bizi mugimendu ekologistak bi egunez Baionan. ‘Euskal Herria Burujabe’ topaketak antolatu ditu urriaren 7tik 8ra, lurralde iraunkor, solidario eta burujabe baten aldarrikatzeko. Orotara berrogei konferentzia inguru izanen dira bi egun horietan, animazio franko Baionako karriketan, eta 150 bat elkarte edo eragileren erakus-mahaiak. Euskal Herria eta Frantzia osoko ordezkariak goaitatzen dituzte.