Ipar Euskal Herriko Itaiak eraso sexisten kontrako asanbladak sortu ditu uda honetan, besta giroan gertatzen diren eraso nahiz jarrera matxistei buru egiteko. Horretarako asanbladak sortu dituzte besta komiteetako neske zenbaitzuekin. Luhuson lau eraso zenbatu dituzte, horietarik hiru gogoz kontrako hunkitzeak, eta Itsasun hainbat hitzezko erasoez gain, ziztaketa salaketa bat izan da. Jenofa Parachu itsasuarrak eta Xania Marianne luhustarrak dinamikan parte hartu dute:
Europar Batasunean euskara hizkuntza ofizial izaiteko eskaera egin du Espainiako Gobernuak. Eskaria aho batez onartu beharko du Europako Batzordeak, irailaren 19an. Neurria onartua izanen balitz, ordea, kontraesanak sor ditzake euskara ofiziala ez den lurraldeetan. Departamenduko kontseiluak, adibidez, euskara ekitaldi publikoetan baliatzeko mozio bat gibelerat bota zuen. Idurre Eskisabelek (Euskararen Kontseilua), Iker Elizaldek (Pirinio Atlantikoetako kontseilaria), Iñaki Etxanizek (Frantziako diputatua) eta David Grosclaudek (European Free Alliance) baikorki hartu dute berria, baina zuhurtasunez ere bai:
Iker Elizalde:
Idurre Eskisabel:
David Grosclaude eta Iñaki Etxaniz:
Hazkuntza eta berrikuntzaren eguna ospatuko du Departamenduko Laborantza Ganbarak agorrilaren 26an, larunbatarekin, Donapaleun. Tokiko kabale arrazen hazkuntza eta hobekuntza genetikoa balioan emateko egunaldia. Aurten, 37 hazleren 270 kabalek parte hartuko dute Akitaniako blonda tokiko behi arrazaren lehiaketan. Horrez gain, beste 50 bat hazleren eta 40 arraza ezberdinetako ardi, behi eta zaldiak ikusgai izanen dira. Egunaldia Donapaleuko Airetik gelako aparkalekuan iraganen da, goizeko 9:00etatik aitzina. Maider Lapitz, Departamenduko Laborantza Ganbarako teknikaria Euskal Irratietako gomita izan da Goiz Berri saioan:
Duela 80 bat urte, bigarren mundu gerla betean, naziengandik ihesean ari ziren hegazkin gidariak laguntzeko Comète sarea etengabe lanean ari zen Lapurdin. Belgikatik Gibraltarrera joaten ziren ezkutuan ihesean, behin lurralde britainiarrera iritsirik segurtasun osoz Inglaterrarako bidea egiteko aukera zutelako. Ihesbide hori haatik behin baino gehiagotan aldatu behar izan zuten, polizia frantsesak edo indar naziek pasaiak ezagutu zituztelako. Comete Sarearen lagunak elkarteak topaketak antolatzen ditu irailaren 7tik 10era. Sareari esker ihes egin zutenen senideak nazioarteko hamaika lekutatik jinen dira. Beñat Olaizola kideak Baionatik Donostiara iheslariak nola pasatzen diren azaldu digu:
43 urterekin, bere ibilbide aberatsa geldituko du Iñaki Goikoetxea zezta puntalariak heldu den urrian. Anartean, erakusten ari da hoberenetan dela beti. Horren lekuko, Miarritzeko Urrezko Xisteraren finala jokatu du asteazken honetan eta ostegunean, Donibane Lohitzuneko lehiaketaren finalerdian ere parte hartuko du. Gernikako lehiaketa kari agur erranen dio zezta puntari, bainan jokalari gisa bakarrik. Ondotik, Gernikako Eraman enpresako kirol zuzendari izanen da.
Galdea egin bai, baina orain Europako Batordeak aho batez onartu beharko du. Ez da hain erreza izanen, beraz. Horrek aldaketak ekarriko ditu, erraterako, Europako erakundeekiko harremanetan, unibertsitateen arteko trukaketetan edota produktuen etiketazioan. Neurri horrek, ordea, kontraesanak sor ditzake euskara ofiziala ez den lurraldeetan. Departamenduko kontseiluak, adibidez, euskara ekitaldi publikoetan baliatzeko mozio bat gibelera bota zuen. Jon Iñarritu, Espainiako Legebiltzarreko diputatua izan da Goiz Berriko gomita:
Socios Pusa Maule zaletuen elkarteak errugbi jokalari gazteak laguntzen segitzen du. Aurte, VEO izeneko kamera berri bat erosi dute, bost talderen jokaldiak analizatu ahal izateko. Irailaren 19an abiatuko dute Federal 1 txapelketa, Olorueko zelaian.
Agorrila erditsura heldu da Udan Bai!, udako Euskal Irratietako jokoa. Iparraldeko hiru herrialdeetako kidez osaturiko gazte taldeak 38 pundu erdietsi dute, orain arte buruan izan diren Etxepareko Lagunen heinera helduz. Estebe, Iztebe eta Ahetze gazteen parean ziren Ttipia, Sandra eta Mai, baina 32 pundurekin ez dute gazte taldea gainditu ahal izan. Finalean argituko da nork eskuratuko duen Hirigune Elkargoako turismo sailak eskainitako 1500€-ko plana.
Baionako Poloko auzoan, Herritartasunaren Etxea hestekotan da. 60 urtez funtzionatu ondoan, sekula ezagutu ez duen krisi larriena bizitzen ari da. Gaur egun 700 kide ditu baina sei langiletarik lau kanporatuak izan dira. Joan den urte bukaeran, CAF familien laguntza kutxak bere laguntza erretiratu zion elkarteari barne kudeaketa arazo larrien ondorioz. Polo auzoko herritar talde batek alarma jo du, arduradunen arteko negoziazioa eta elkarrizketa bultzatu behar dela azpimarratuz. Agorrilaren 24an, usaiaz kanpoko Biltzar Nagusian trenkatuko da egituraren geroa.
