Urte batez, lurrak berregiten ahal dituen guk kontsumitutako baliabideak agortu dira pasa den asteazkenean, hala nola, ura, elikagaiak, edota erregaiak. Horrez gain, lurrak urte batez xurgatzen ahal dituen hondarkinen neurria gainditu da ere bai. Data hori urtez urte kalkulatzen da, eta Lurraren gainditze eguna deitzen zaio. Aurten agorrilaren 2an izan da. Horren kari, baraualdi sinbolikoa egin zuten Herribiltzako kideek egun horretan.

Hendaia eta Irun arteko oinezkoen zubia 2021etik du frantses gobernuak itxia, terrorismoaren aurkako neurrien barnean. Azken urteetan Bidasoaldeko herritar eta hautetsiek hamaika aldiz eskatu dute zubiaren irekitzea, eta aste honetan ekimen berri bat sortu da zentzu horretan. 30 hendaiarrek gutun bat idatzi eta agerraldi bat egin dute, itxiera zentzugabea salatuz eta herritarren harremanak eta lasaitasuna trabatzen dituela argudiatuz. Hendaiar talde horrek gutuna igorri dio prefetari, eta interneten petizio bat abiatu dute. Lehen hiru egunetan, 1.900 sinadura baino gehiago bildu dituzte.

Hogei egun besterik ez. Ikasturte berrirako etxebizitza atzemateko azken egunak dituzte kanpora ikastera doazen ikasleek. Baxoa gainditu dutenek jada beren Parcoursup-eko hautuak egin dituzte; batzuk desio zuten eskola ukan dute, beste zonbaitek ez ordea. Usu tentsio handiko hirietan ez da erraza bizitegi eskuragarriak atzematea. Hori dela eta, CROUS ikasle-egoitza publikoak ireki dira errate baterako, eta lokaviz.fr gisako webgunean sortu dira ikasleei zuzendu apartamendu pribatuak xerkatzeko.

Garaipen sentimendua nagusi Atxik Luhuso kolektiboaren barnean. Luhusoko herriko etxeak adierazi duenez, Habitat Sud Atlantic egiturak lehentasun-eskubidea erabiliko du Sporting Promotion promotorearen proiektuaren kontra. Tolosako (Okzitania) eraikuntza enpresa horrek berrogei etxebizitza eraiki nahi zituen Lapurdiko herrian, metro karratua 250-300 eurotan salgai ezarriz. Atxik Luhusokoek adierazi dutenez, Luhuso «bakantza-» edo «lo-herri» bilakatzeko lanjerean da, eta horrenbestez, lur eremu horretan HSA-k gauzatuko duen proiektua hurbiletik segituko dute.

Arnagako atmosfera zoragarrian kontzertu gogoangarria eskainiko du Anje Duhaldek, Kanboko Harmoniak lagundurik. 30 musikarirekin batera, bere errepertorioan bidaia eginen du euskal artista ezagunak bere mende erdiko ibilbidea ospatzeko. Agorrilaren 10ean izanen da kontzertua , gaueko 21:00 orenetan. Sartzeak 15 eurotan salgai dira, eta 12 urte azpikoek urririk izanen dute.

Maiatzaren 28ko hauteskundeen ondotik, Nafarroako gobernua osatu gabe zen oraindik. Azken lau urteetako koalizioa errepikatuko zela argi zen arren, desadostasun eta eztabaidak izan dira gobernuko hiru bazkideen artean: Alderdi sozialista, EAJ eta berdeak barne dituen Geroa Bai koalizioa eta ezkerreko Zurekin Nafarroa koalizioa. Azkenik, astelehenean eta atzo izandako bi bilkuren ondotik gobernu berria osatzeko adostasunak eta talde berriaren xehetasunak zehaztu dituzte, eta aste hondar honetan inbestituko dute gobernu berria. Azken aste hauetako eztabaidak ulertzeko, Juan Kruz Lakasta Euskalerria Irratiko kazetaria izan da Euskal Irratietako gomita.

Abentura erdira heldu da, uztaileko balentriak kontutan hartuz 38 punturekin aitzinean Etxepareko lagunak. Ea nola joanen den agorrila. Tamalez aldi honetakoek ez dute finaleko txartela lortu nahiz eta kristoren partida izan den. Kirol sentsazioak hor ziren Arranoen Iñaki, Joanes eta Txominekin 35 puntu egin dituztenak. Aldiz, Amikuzeko zirtzilak zirtzil egon dira 29,31 punturekin. Oroitarazteko puntu gehiena egin dutenak finalean izanen ditugu.

Iragan hilabeteko lehen 23 egunetan Lurraren batez besteko tenperatura 16,95 gradukoa izan da, eta 2019ko uztaileko 16,63 graduko errekorra gainditu du. Munduko Meteorologia Erakundeak azpimarratu du sekulan baino beharrezkoagoa dela berotegi efektuko gasen emisioa apaltzea. Hortaz mintzatu gara Nikolas Goñi Euskal Irratietako gaurko gomitarekin. Bizi mugimendu ekologistako kidea da eta itsas biologoa.

Neguan hetsirik diren igerilekuak, udako beroekin berpizten dira. Barnealdean, orotara, sei igerileku nagusi badira Maulen, Donibane Garazin, Hazparnen, Kanbon, Donapaleun eta Bidaxunen. Uda oroz, kluben arteko lehiaketa abiatzen dute, eta aurten ere, Maule doa aitzinean. Ipar Euskal Herriko txapelketaren finala asteazken honetan jokatuko da Kanbon. Mauleko igerilekuko kide den Beñat Cazanave: