Osasun mentalaz mintzaldia antolatzen du Epaiska elkarteak ostegunean. Hitzaldi ziklo baten lehen hitzordua izanen da eta karia hortara Iñigo Antxorregi Dierez gomitatu dute. Bere bizi kondaira egiten duen 'Nire minaren etxetik' liburutik abiatuko da eztabaida, Martin Antxia Epaiskako kideak azaldu digunez. Arratsaldeko 19:00etan emana da hitzordua. Eta larunbatean bestalde, beste hitzordu bat antolatzen du Epaiskak ere : bertso bazkari musikatua, Aitor Bizkarra eta Amets Arzallus bertsolariekin eta Libe Goenaga eta Aner Peritz musikariekin.

Euskal Herriko Ekonomia Sozial Eraldatzailearen Mugaz Gaindiko III. Topaketa antolatu dute Elizondon joan den ostegunean. Ipar eta Hego Euskal Herriko kooperatiben plan partekatua eraikitzea izan da xedea. Bertan bat egindute Hemen, Andere Nahia, Olatukoop edota Antic Pays Basque. Besteak beste interkooperazioari buruzko tailerrak izan dira. Francis Carricart, Hemen elkarteko kideak Euskal irratietan adierazi duenez, ekimen horri esker, euskal enpresa kooperatiboen arteko «ezezagutza» gainditzeko lehen harria ezarri nahi lukete.

Gaur sartuko da indarrean Hirigune Elkargoak bizitegi turistikoak apaltzeko bultzatu neurria. Tentsio pean diren Lapurdiko 24 herritan ukanen du eragina. Araua errespetatua izan dadin Lurraldeko Elkargoak lau langile ukanen ditu eta Herriko auzapezek izanen dute azken ardura, Konpentsazioa aplikatua izan dadin 24 herritan. Elkargoak 2022ko martxoaren 5ean gehiengo osoz onartu zuen konpentsazio arautegia, etxe-jabeek urte osorako eman ditzaten beren apartamenduak alokairuan, eta AirBnb bezalako plataformetatik kanpo. Konpentsazio arautegia izoztea deliberatu bazuen auzitegiak lehen mementoan, iazko buruilean argi berdea eman zakon nuerriari, nahiz eta Elkargotik azaldu zutenez, «legearen mamian ez zen sartzen». Eta preseski martxoaren 6an, Paueko auzitegiak Elkargoak onartu zuen arautegiaz bere deliberoa emanen du.  Filipe Aramendi, gaiaz arduratzen den hautetsia baikor agertu da Euskal irratietan.

Baionako Merkatal eta Industria Ganbarak, Ipar Euskal Herriko 4.000 enpresa galdezkatu ditu urtarrilean. Egoera ekonomikoa azken urteetako egokiena ez bada ere, Iparraldeko enpresaburuak aski baikor agertu dira. Galdezkatuak izan direnen %80aren arabera, negozio kopurua egonkortu edo hobetu da. Aldiz, denek azpimarratzen dute langile berriak hartzeko zailtasunak dituztela. Bestalde, erretreten erreformaren kontra izandako greba deialdiei begira, André Garreta ganbarako presidenteak, ekonomiaren oztopatzen duten deialdiak gaitzetsi nahi izan ditu.

Aldaketa andana aurkeztuak izan dira Berritza elkartearen biltzar nagusian. Hemendik aitzina bulego eta errepika gela berria izanen dute, antzerki, dantza eta musika taldeek baliatzen ahalko dutena. Hirigune Elkargoak eskaini dio azpiegitura elkarteari, Xiberoako kultur ekoizpenak bultzatzen segi dezan. Azken urteetan, dantza ikastaroak eskaini dizkie Berritzak lizeoko 30 ikasleei, eta horren kari, Txingilika dantza-taldea sortu dute.

Baiona Ttikiko hamazazpi ostalarik bat egin dute beren garagardo artisau propioa ekoizteko. 'Kasu' izena eman diote, pandemia ondotik osatu zuten 'Kasu, ostalariak kexu' kolektiboa gogora ekarriz. Orotara, pale ale motako 6.000 botila ekoitzi dituzte Angeluko La Superbe garagardotegian.

Etxebizitzaren problematika aipagai behin ere Arberoan. Geroz eta ageriagoa den arazo horri zein aterabide ematen ahal zaion ukan dute ardatz aldi honetan. Horretarako Etxalde elkarteko Beñat Etxebest gonbidatu dute, JTko ordezkaritza bat, Lurzaindiako Beñat Duhalde edota Irisarriko Etxebizitza kooperatibako kideekin batera.

Herriko etxeko hauteskundeen bigarren itzulia iragan da atzo Senperen. Ehun bozeko tartearekin, Bernard Elhorga gailendu da Hats Berri zerrendako Christophe Jauregiren parean. Zehazki, 1.333 boz bildu ditu Elhorgak, eta 1.233 Jauregik. Aldiz, Dominique Idiart auzapez ohiak 886 eskuratu ditu. Ondorioz, horrela gelditu da herriko kontseilu berriaren osaketa: Egin Senpererentzat taldeak 29 hautetsitik, 21 izanen ditu, Hats Berrik bost eta Elgarrekin Senpererentzat zerrendak hiru. Elhorga, Arhancet eta Jauregi dira Hirigune Elkargoan lanean ariko direnak.