Getaria herri txikia da, kostaldeko txikiena: 1.300 biztanle inguru ditu INSEEren azken datuen arabera. Tamaina apala izan arren, kostaldeko bigarren etxebizitzen tasarik handiena du, %52 ingurukoa. Higiezinen prezioek ere joera hori islatzen dute: metro koadroa 10.000 eta 12.000 euro artean dabil, eta kasu batzuetan 15.000 edo 20.000 eurora ere irits daiteke.

2020ko hauteskundeetan, Marie-Pierre Burre-Cassou nagusitu zen botoen %59,3 eskuratuta, Dominique Ferreroren %40,69ren aurretik. Dena den, bada datu esanguratsu bat: herriak 1.300 biztanle inguru —haurrak barne— dituen arren, 2020an 1.289 lagunek zuten bozkatzeko izena emana. Horrek pentsarazten du bigarren etxebizitza dutenetako batzuek, behintzat, Getarian bozkatzen dutela. Testuinguru horretan, erraz aurreikusten da etxebizitzaren auzia —eta bereziki bigarren etxebizitzena— eztabaida publikoaren erdigunean egongo dela datozen hilabeteetan.

Hiru zerrenda lehiatuko dira. Lehenik, “Jalgi gaitezen plazara” zerrenda aurkeztuko da, Cédric Curutchet buru dela; gaur egun Herriko Etxeko finantza eta hirigintza batzordeetako auzapezordea da. Bere ondoan izango du oposizioko Benoît Lamerain. Batasun hori, neurri handi batean, Marie-Pierre Burre-Cassouk sustatu du, 2026ko martxorako ondorengotza antolatzeko asmoz.
Bigarrenik, “Getaria denentzat” zerrenda izango da lehian, Jean-Marie Tran-Van buru. Olharroa pilota elkarteko presidentea da, eta enpresa munduan ibilbide luzea egina du: hotel-kate bateko zuzendari nagusi izana da, eta Getarian bertan hotel baten jabe ere bada.
Eta hirugarrenik, “Vivre Guéthary” zerrenda aurkeztuko da, Marie-Jeanne Sohier zerrendaburu duela. Giza baliabideetako zuzendari ohia da, eta bere esanetan, urte asko daramatza Getarian bizitzen.