LAB sindikatuak herriko bozetarako hautagaiei galdetegi bat bidaliko die, lurraldeko lan-harremanen eta erabaki ahalmenaren inguruan duten jarrera zehaztu dezaten. Ekimenaren bidez, Ipar Euskal Herrian eskumen eta kudeaketa propioak indartzeko tresnen inguruko konpromisoa eskatu nahi du.

2024an, Hemen Erabaki galdetegi-dokumentuaren bertsio eguneratua aurkeztu zien LABek sindikatuei, eragile sozialei, patronalari eta hautetsiei. Oro har, sindikatuak balorazio baikorra egin du azken urteetako bilakaeraz: lurraldetzearen eta negoziazio kolektiboaren aldeko planteamenduak indartu direla nabarmendu du. Hala ere, zentralismoak eta jarrera jakobinoek oraindik ere oztopo izaten jarraitzen dutela ohartarazi du zenbait kasutan.

Orain, herriko bozak direla eta, galdetegia hautagaiei helaraziko die. Hiru tresnaren inguruan posizionamendua eskatzen du LABek: behatoki sozioekonomiko bat sortzea, Euskal Herriko Kudeaketa Zentro propioa eratzea eta Lurraldeko Gizarte Batzorde Interkomunala martxan jartzea. Helburua da gaur egun Paueko egituretatik kudeatzen diren eskumenak Ipar Euskal Herrira hurbiltzea. Sindikatuak iragarri du hautagaien erantzunak lehen itzulia baino lehen argitaratuko dituela, boto-orientaziorik eman gabe.