Energia zirkuitu laburrak, lurren artifizializazioa edota indarkeriarik gabeko ekintzen irakaspena. Gai horiek eta gehiago jorratuko dituzte Bizi mugimenduaren klima egonaldian, Mugerren. Irailaren 12tik 15era, hogei formakuntza eta mahai-inguru eskainiko dituzte, aisialdi eta kultur eskaintza ahantzi gabe. Xabier Harluxet antolatzaileak azaldu duenez, Bizi mugimenduaren 15 urteak ospatzeko baliatuko dute hitzordua. Zentzu horretan, besta izanen da nagusi larunbat arratsean Foisis Jaunak, Elektruka eta Fraggle musika taldeekin.

Zazpi egunez 50 jarduera eskainiko ditu Mintzalasai festibalak hogei gunetan. Irailaren 16an abiatuko da aurtengo egitaraua, eta irailaren 22ra arte luzatuko da. Usaian bezala, hitzordu gehienak Miarritzen iraganen dira, baina aurten indar berezia eginen dute Baionan, eta ekimen bat ere Angelun eginen dute. Familian eta lagunartean gozatzeko egina den festibal honetan ezagutza berriak egiteko, gogoetatzeko eta kulturaz gozatzeko parada izanen da, euskaraz. Hamahirugarren edizio honetan, gainera, Jasone Salaberria eta Jean Mixel Larrasket omenduko dituzte. Marion aintzirako besta handiak emanen dio bukaera Mintzalasairi.

Itsas abentura zirraragarri bat abiatu da asteazken honetan Angeluko portutik, Brasileraino. Sei hilabetez, Heol espedizio zientifikoak hiru kontinenteko urak nabigatuko ditu. Hiru lagunek osatzen dute espedizio taldea, eta itsas ingurumenaren inguruko ezagutza eta kontzientziazioa azkartzea dute xede. Baliabide berritzaileen bidez itsas ugaztunen egoera eta mugimendua, itsasoko bioaniztasuna kaltetzen duten sargazo itsas-belarren ugalketa eta zooplanktona babesteko bideak ikertuko dituzte. Espedizioan zehar, Mauleko eta Urdiñarbeko CM1-CM2 mailetako ikasleekin harremanetan izanen dira bideokonferentziaz, ikertutakoaren berri emateko. Abenturak 35.000 euroko aitzinkontua du, eta parte handienean, autofinantzaketaren bidez erdietsi dute.

Miarritzeko Maritzuli dantza konpainia, elkarte sare buru izendatu du, departamenduak. Hau da, Iparraldeko Dantzarien Biltzarra elkartearen gisa, beste elkarteentzat sustengu bilakatzen ahalko dela. Claude Iruretagoienak sortua 1996an, Maritzuli konpainiak lan handia egin du bereziki euskal jantzien inguruan eta jantzi fondoa handia badu gaur egun. Dantzaren aldetik 80 bat kide ditu ere. Estatutu aldaketa horrekin beste elkarteekin transmisio lanetan aritzen ahalko da. Erran behar da Maritzulik jantzi fondo biziki aberatsa duela, hogei urtez, ikusgarri bakoitz elkarteak berak sortu baititu bere jantziak.