Baigorri, Aldude eta Esteribar ibarren ondare kontaketa bultzatuko du Kintondare proiektuak, 2024-2026 epealdian. Baigorrin, besteak beste, toponimia, artxibo zaharren berridazketa tailerrak edota Baigorriko hilarrien inbentarioa gauzatzen ari dira. Aurten gainera, Zaharrer Segi pilota batasunaren mendeurrenaren kari, pilotak Baigorrialdean ukan duen historiaz liburu bat argitaratu du Ximun Larre kazetariak, argazki zaharrez horniturik. Preseski, antzinako irudi horiekin erakusketa bat ikusgai izanen da urriaren 7ra arte Baigorriko herriko etxe ohian.

Nader Koochakiren "Soineko Paisaia" instalazio artistikoa Maulen izanen da. Gipuzkoako ehun kabalatik goitiko artaldeen joare-hotsen artxibo soinuduna da. Koochakiren erakusketa mapaz, irudiz, testuz eta binilo diskoz osaturik da, eta bisitariari hamaika oren baino gehiagoko joare-soinu bilduma entzuteko aukera eskaintzen dio. Erakusketa hori Xiberoako lurraldeari dedikatua den Museoa Urtu egitasmoarekin lotua da. Nader Koochakik urte bukaeran aurkeztu behar luke, hau ere Baionako Euskal Museoan.

Enovis medikuntza materialean berezitu enpresa, ororen buru, ez da Mugerreko pleitagunean ezarriko. Euskal Hirigune Elkargoak lagundurik Mousserolleseko burdinola ohian kokatuko da. Mugerreko pleitagunean kokatu beharra zen lehenik, baina ingurumenaren aldeko elkarteek salatu zuten natur gune babestu batean izango zela. Ondorioz pleitagunetik kanpo mugituko dira enpresako 300 langileak. Euskal hirigune elkargoaren lurra baita, 50 urteko eraikuntza kontratu bat hitzartuko du SEPA Aturri Ibarreko Ekipamendu Sozietatearekin. Enovisek urtean milioi eridko alokairua ordainduko Euskal Hirigune Elkargoari, lurra erosi beharrean.

XIX. mendearen bukaeratik Lehen Mundu Gerrara arte xiberotarrek gutun bidez ukandako komunikazioa ikertu du Elorri Arkotxa ikertzaileak Nafarroako Unibertsitate Publikoan eginiko tesian. Garaiko Xiberoako gizartea eta errealitatea aztertzeko ez ezik, familia testuinguruko euskara xiberotarra aztertzeko parada izan da. Arkotxaren arabera, idazki hauek, besteak beste, erakusten dute herritarrek euskaraz idazteko ahalmena eta nahia zutela. Ikertuak izan diren hirurehun gutunak Xiberoako historia lantzen duen Ikerzaliak elkarteari esker berreskuratuak izan dira. Gehienak Xiberoako migranteen eta beren senideen arteko gutunak dira, eta beste multzo bat, Lehen Mundu Gerlakoak.