Hamas eta Israelego armadaren arteko gatazka militarraren ondorioz, tentsioak sor daitezkeela iritzi du prefeturak eta Mauleko herriko etxeari agindu dio Palestinako bandera ken dezan. Maule Zisjordaniako kanpaleku batekin senidetu zen duela urtebete, eta uda honetan, palestinarrak Maulen izan dira. Louis Labadot Mauleko auzapezak prefeturaren agindua gaitzetsi du.

Ikusi Mikusi haur eta gazte literatura azoka urriaren 20tik 21era iraganen da Saran. Lehen eguna eskolei eta profesionalei zuzendua da, eta bigarrena familiei. Euskara hutsean egiten den azoka da, eta eskoletako ikasle bakoitzari 15 euroko bonoa eskaintzen diote liburu bat erosteko. 2022ko edizioan, Euskal Herri osoko 1.300 haurrek parte hartu zuten eskolen egunean, eta aurten 1.500 goaitatzen dituzte. Azokaz gain, hogeitik gora ikusgarri proposatuko dituzte, euskaraz, 0 - 15 urte arteko haurrentzat.

'Emploa' deitzen da plataforma digital berria. Departamenduak, Etcharry lanbide heziketa zentroak eta Pôle Emploik sortu dute lankidetzan, gizarte ekintza arloko langile eskasiari buru egiteko. Plataforma horren bidez, enplegatzaileen eta langile potentzialen arteko hartu-emanak erraztuko ditu Eskola laguntzaile, hezitzaile berezitu edo gizarte laguntzaile gisa aritzeko 9.000 lan eskaintza ireki ziren iaz, eta 2030 urtera bitarte, frantzes Estatuan 400.000 postu berri sortuko direla aitzinikusten da. Haatik, lansari apalek lanbide horien erakargarritasuna kaltetu dute. Annick Trounday Idiart Dpartamenduko hautetsiak azaldu duenez, «gizarte ekintzako lanbideak argitan ematea» da Emploa webgunearen funtzioa.

23 haurrek murgiltze ereduan ikasten dute euskara Amerikako Estatu Batuetako Boise hirian. Aurten, 25 urte betetzen ditu Boiseko ikastolak. Hiri hori AEB ipar mendebaldean da, Idaho Zstatuan. Duela bi mende heldu ziren lehen etorkin euskaldunak hara, eta horien ondorengoen eskutik sortu zen ikastola. Ikasturte honetan, Ander Zubillaga eta Sara Pinter gipuzkoarrak ari dira han irakasle lanetan.