Elikadura gai nagusitzat harturik, heldu da Utopia Errealen zine festibala. Garapen iraunkorra eta ekonomia sozial eraldatzailea ardatz dituzten dokumentalak proposatuko dituzte bosgarren urtez segidan. Aurten, zazpi proiekzio izanen dira eta ondotik, dokumentalaren egileekin, adituekin eta tokiko eragileekin solasaldiak izanen dira. «Zinemaz gain, alde akademikoa, sorkuntza eta arlo soziala uztartzen dituen festibala da», azpimarratu du Itxaso Iparragirre antolatzaileak.
Udazken betean, heldu da euskal zinemaren udaberria Hazparnera. Behin ere, euskaraz berriki estreinatu diren filmak ekarriko ditu Zinegin festibalak Ipar Euskal Herrira. Usaian bezala, Haritz Barne zinema gelan iraganen dira hitzordu guztiak, urriaren 19tik 22ra. Asteazken honetan iragarri dituzte aurtengo egitarauaren xehetasunak. Orotara hamabi filma, hiru musika emanaldi eta zine tailer bat izanen dira. Ikuskizunen sailari dagokionez, titulu nagusien artean izanen dira Paul Urkijoren 'Irati' filma arrakastatsua, Josu Martinezen 'Bizkarsoro' eta ‘Jon Mirande. Film bat egiteko zirriborroa’, Estibaliz Urresolaren '20.000 Erle Espezie' edota Alberto Vazquezen 'Unicorn Wars' helduentzako animaziozko filma.
Pottoka, asto eta zaldi sailak lanjerrean. Kabala lehiaketak bultzatzeko Frantziako Laborantza Ministerioak eskaintzen zuen dirulaguntza bertan behera utzi du. Estatu mailan 960.000 euro bideratzen ziren lehiaketetarako kabalen hazkuntza babesteko, eta Ipar Euskal Herrian, berrehun bat hazlek ukaiten zuten. Aitor Lagrenade Pottoka elkarteko presidentearen arabera, lehiaketa horiek baitezpadakoak dira tokiko arrazen iraunarazteko. Izan ere,lehiaketa horietan egiten ohi dira hazleen arteko salerosketa eta trukaketa gehienak. Momentuz, Azkainen, Baionan, Hazparnen eta Atharratzen antolatzen diren lehiaketen geroa dudan da. Horren kari, joan den astean, hainbat hazle bildu ziren Baionako Prefektura aitzinean, erantzun bat ukaiteko itxaropenarekin. Arrapostua ez da oraino heldu, baina heldu diren egunetan iritsiko dela uste dute.
Milaka pertsona igurikatuak dira, trantsizio ekologikoari buruzko erronkak hausnartzeko. Bi egun, berrogei hitzaldi, 150 elkarteren parte hartzea, eta animazio andana izanen dira. Bestalde, aipatu behar da Herribiltza kolektiboak hainbat agiriren bidez kritikatu duela Biziren 'burujabetza' kontzeptu, baita ekimen horretan euskarak izanen duen toki eskasa ere. Kritika hauei iharduki die Xabier Harluxet Biziko kideak, Goiz Berri saioan.
Trantsizio ekologikoaren alde lan egiten duten enpresak laguntzeko, 50.000 euro banatu ditu Euskal Hirigune Elkargoak. Lau enpresa izan dira sariztatuak, horien artean arotzeria metalikoan diharduen Mauleko Alkar kooperatiba. Eraikuntza metaliko berriak, berrerabilitako materialekin egiten ditu enpresa xiberotar horrek. Azken urteetan, Nobatek ikerketa zentroarekin lankidetzan, eraikuntzarako baliagarri izanen den ekai berri eta iraunkor bat sortzeko bidean da. Hirigune Elkargoak 15.000 eurorekin lagunduko du Alkar Kooperatibaren egitasmoa.
