Haur sortu berri batek 5000 xatar baliatzen ditu, hots, tona bat zabor. Hondakin kopuru hori apaltzeko xedez, Bil Ta Garbi sindikatuak 50 euroko beherapen-bonoa eskainiko die gurasoei, xatar garbigarrien hautua egin dezaten laguntzeko. Beherapen horri esker, bi hilabetez alokatzen ahalko dituzte haur-xatar berrerabilgarriak Nini Garbi eta Petits Popotins enpresetan.

Arbonako eskola publiko berria, hondakindegi zahar baten gainean eraikitzen ari dela salatu du herriko etxeko oposizioko taldeak. Azaldu dutenez, herriko etxeak «ez du lurzoru hori garbitzeko neholako lanik agindu, ikasleen osagarria lanjerean ezarriz». Gune horretan hondakinak metatu ziren berrogei urtez, 2003 urtean hetsi zen arte. Baina Marie Josée Mialocq auzapezak Euskal Hirigune Elkargoari informazio hori «gorde» egin ziola salatu dute oposizioko hautetsiek. Auzapezaren erranetan, ordea, orain arte egin diren ikerketek erakutsi dute lurraren kalitatea egokia dela. Oposizioak helegitea ezarri zuen Baionako auzitegian, baina zazpi hilabete geroago ez dute arraposturik jaso. Hori dela eta, Departamenduko prefetari eta Elkargoko lehendakariari dei egin diete, «proiektu zentzugabe horren geldiarazteko».

Baigorri eta Baztango gazteen arteko bigarren topaketak aurkeztu dituzte bi herriko etxeetako ordezkariek. Ekimena urriaren 20tik 22ra iraganen da, eta 11-15 urte arteko gazteei zuzendua izanen zaie. Lehen edizioa joan den apirilean egin zuten eta balorazio baikorra egin dute antolatzaileek. Orotara berrogei gaztek ematen ahalko dute izena. Izpegi mendateaz bi aldeetako herritarren harreman sareak azkartu nahi dituzte Baztanek eta Baigorrik.

Metamorfosia ekologiko eta soziala bultzatzen duten alternatiben erakusleiho bat Baionan. Euskal Herria «burujabe, solidario eta iraunkorraren» aldeko ekimena ospatu du Bizi mugimendu ekologistak asteburuan, Lapurdiko hiriburuan. Parte hartze kopuruak antolatzaileek uste zutena baino apalagoa izan den arren, 8.000 pertsona hurbildu dira antolatuak ziren hamarnaka mintzaldi, eztabaida eta kontzertuetara. Mathilde Etxeleku, arkitektoa eta Biziren etxebizitza taldeko kidea, Goiz Berriko gomita izan da.