Euskal Herriko Historiaren Memoria biltzen duen gune bat estrenatu zuten larunbatean Senperen. Ehunka pertsona bildu ziren Helbarrun auzoan, Anai Arteak antolaturiko ekitaldi berezian. Plaka batzuen bidez, Euskal Herriaren historiaren pasarte batzuk irudikatu dituzte, eta QR kode batzuen bidez historia hori entzun daiteke telefono edo ordinagailuetan. Bertsoak, hitz hartzeak, aurreskua eta Gernikako arbolaren kantuaren bidez Anai Artea elkarteak bukaera eman dio ere 50 urteko ibilbide luzeari.

Aliantzen sasoina heldu da Hego Euskal Herrira, igandeko bozen ondotik. Nafarroan Maria Chivite egungo presidenteak, azken lau urteetako gehiengoa erdiesten ahaleginduko da, nahiz eta UPN nafar eskuina nagusitu. EH Bilduren babesa beharko du horretarako. Ber gisan, EH Bilduk PSNren laguntza beharko du Iruñean Joseba Asiron auzapez izateko. Gasteizko udalean eta Gipuzkoako Aldundian EH Bildu garaile izan da baina EAJ eta PSE alderdien usaiako itunak, gobernatzeko aukera kenduko lioke. Bilbon eta Bizkaian, aldiz, jeltzaleak nagusitu dira. Nolanahi ere, Abstentzioa %38koa izan da, azken urteetan baino gorago.

Maiatz hondarra arte Proventza eskualdeko jantziak deskubritzeko parada eskaintzen du Maritzuli Dantza konpainiak, bigarren aldiz Miarritzen, Jantzi’Hadi topaketarekin. Aurten Proventza eskualdea eta ‘indienne’ izeneko oihal mota emanen dituzte argitara. Bertatik, XVIII.mendeko 30 jantzi ekarrarazi dituzte. Erakusketaz gain, hitzaldi eta tailerrak ere proposatuak dira aste honetan. Jakin ere ‘indienne’ izeneko oihal horiek Euskal Herrian ere baliatu zirela. Erakusketa Miarritzeko Museo Historikoan ikusten ahal duzue asteartetik larunbatera, maiatzaren 31a arte.

Frantziako itzuliak duen nazioarteko oihartzuna baliatuko du Gure Eskuk, 'Euskal Herria mundura' izeneko ekimenarekin. Tourreko lehen hiru etapak osoki Euskal Herritik pasako direla baliatuz, «inoiz egin den ikurrinarik erraldoiena» zabalduko dute, eta 4.000 ikurrina banatuko dituzte. Horren bidez, Euskal Herria «zazpi lurraldeko herri bat dela eta eskubidea duela bere geroaz erabakitzeko» erakutsi nahi dute. Josu Etxaburu, Gure Eskuko bozeramailea goizberriko gomita izan da. Baionan bururatuko da Tourreko hirugarren etapa, uztailaren 3an. Horren karietara, bizikleta egun berezia antolatzen du Baionako herriko etxeak ere bai. Lurraldeko txirrindularitzako eragileak bilduko dituen herrixka ere muntatuko du Jacques Portes plazan, goizeko 10etatik goiti idekiko dena. Haurrentzat ere animazioak izanen dira.