‘2032 Kolektiboak’ joan den ostiralean aurkeztu dizkio adostu proposamenak herriko etxeari. Hauen artean : gazteriaren inplikazioa indartzea besten antolakuntzan, besten aplikazio bat plantan ematea edo ostalari nahiz sokorrien arteko koordinazio bat sortzea. Horrez gain, bozgoragailuen musika murriztuz musika biziari leku gehiago ematea ere proposatzen dute, baita pisa egite basatiaren kontra borrokatzea etazaborren bilketa hobetzea ere. Kolektibo horretan biltzen dira, besteak beste, Baiona Ttikiko ostalariak, Baionako UMIH, Zizpa gaztetxea, peñak edota PAF talde feminista.
Ipar Euskal Herriko amateurren txapelketako finalak jokatuko dira igande honetan Iholdiko Hoxari trinketean. Lehen mailan, Denek Bateko Laffite-Harismendy eta Sarako Harotzarene-Elgart lehiatuko dira. Orain arte, partida oro irabazi dituzte Denek Batekoek, eta faborito gisa heldu dira finalera. Saratarrek aldiz ez dute honetan hastapen errez ukan, baina balentria egin dute egoerari itzulia eman eta finalera arribatzeko. Nolanahi ere, aurtengo txapelgoa berezia izan dela azpimarratu dute gehienek. Izan ere, aldi honetan bederatzi pilotari gutxiago izan dira, zazpik berezkoetara jauzi egin baitute, eta beste bi mailaz jautsi baitira. Horrek, bistan dena, maila apaltzea eragin du. Ekaina honetan ere Esku Pilotak, pilota profesionalaren elkarteak, hamabi pilotari gazte bere gain hartu zituen, eta plaza libreko txapelgoa bertan behera gelditu behar izan zen. Anitzek ez zuten begi onez hartu Esku Pilotaren egiteko manera horiek. Hori dela eta audita edo kontu-ikuskatze bat abiatu dute Iparraldeko pilota munduko eragileek; horien artean, FFPBak, Pilota batzordeak eta Esku Pilotak. Jada bi bilkura egin dituzte, eta urtarrilean, hartu eman horien bilana eginen dute.
Xiberoa eta Baxe Nafarroa artetik jalgiko da aurten maskarada. Ehun urteko etenaldiaren ondotik, xiberotar usaia berreskuratuko dute aurten Pagolako gazteek. 2019an Domingo Garat pastorala eskaini zuten pagolarrek, eta horrek xiberotar arima berpiztu du erdi amikuztarra, erdi arbailarra den herri honetan. Mende baten ondotik, gizarteak aldatzeko denbora ukan baitu, aurten lehen aldiz, maskaradako rol nagusia emazte batek izanen du. Ainara Aguerrek antzeztuko du 'Kabana' pertsonaiarenpapera. Urtarrilaren 21etik apirilaren 27ra, hamabost maskarada emanen dituzte.
'Gora euskal (h)errientsak' izeneko saiakera grafikoa argitaratu berri du Asisko Urmenetak, Dom Campistron ilustratzailearen laguntzarekin. Bost emazte feminista eta aberztaleren ibilbidea aipatzen ditu: Jule Fernandez Zabaleta, Kapitolina Buztinze Larrondo, Katalina Alastuei Garaikoetxea, Malena Jauregiberri Ergin eta Maritxu Olabe Uzin. Duela ehun urteko gertakariak kontatzen ditu liburuak baina Asiskoren erranetan, aktualitate handikoa da.
Maulen euskarazko literatura bultzatzeko eginkizuna du Mathilde Baquék. Mediatekako euskal funtsa kudeatzen du, eta euskal kulturari loturiko ekimenak antolatzeko ardura du. Azaltzen duenez, euskaraz gutxi irakurtzen da eta erronka handia da irakurle potentzialen interesa piztea. Gainera, Xiberoan euskaldun geroz eta gutxiago badira, eta Xiberoako euskaraz idatzitako lanak eskasegi dira. Hori dela eta, haurrentzako liburuak xiberotarrera itzultzen hasi da Mathilde Baqué.
