Transmisioan indar haboro ezarri nahi du Euskal Kultur Erakundeak . Berriki egin duen biltzar nagusian ondoko urteetako lehentasunak aurkeztu dituzte. Transmisioaren alor horretan sakontzeko langile berri bat hartuko dutela erabaki dute, besteak beste. Urtez urte, gero eta elkarte haborok parte hartzen dute euskal kultura indartzeko erakundearen barnean. Orotara 230 elkartek dute nolabaiteko lotura EKErekin, eta horietarik 50 aurten sartu dira. Horrez gain, iaz hirurehun bat hitzordu babestu ditu.

Larunbatean 100 mendi iganen dira Euskal mendizale federazioaren 100 urteen kari. Ipar Euskal Herrian berean Orhi, Artzamendi, Okabe eta Irati iganen dira. Federazioaren besta nagusia maiatzaren 18an ospatuko da Elgetan, baina urte osoan zehar hainbat hitzordu antolatzen dituzte, hala nola, apirilaren 27an. Iparraldeko nehor ez bada federazioaren kide, ipar eta hegoaldekoak elkar juntatzeko helburua berpizten ari da.

Memoria historikoa berreskuratzeko 53 kilometroko erronka berri bat Iruñeko Ezkaba mendi kaskotik Urepelera. La Fuga mendi lasterketaren lehen edizioa aurkeztu dute Antsoainen (Nafarroa) antolatzaileek eta hainbat herritako auzapezek, horien artean Xole Aire Urepeleko auzapeza. Lasterkaldi horrek gertakari berezi bat oroitu nahi du: Ezkabako gotorlekuko ihesaldi handia. 1938ko maiatzaren 22an Ezkabako presondegi frankistatik 795 presok ihes egin zuten. Horietarik bakarrik hiruk erdietsi zuten muga trabeskatzea Urepeletik. Frankistek iheslariak gogor zigortu zituzten, 206 hil zituzten eta beste 586ak baldintza ezin latzagoetan presondegiratu zituzten. Lasterketa maiatzaren 18an abiatuko da Ezkaba mendiaren gailurrean izanen, eta Antsoaingo udalaren webgunean izenak eman daitezke.

Gaskoiera lehen aldiz entzunen da pastoral batean. Euskararekin batera baliatuko dute okzitanieraren aldaera hau, Inesa de Gaxen pastoralean. Xarnegun bi hizkuntzek duten presentzia historikoa islatu nahi izan dute horrela. Itxaro Bordak idatzi ditu pastoraleko gidoia, eta parte hartzaile bakoitza ari da emeki emeki rola ongi bereganatzen. Bi igandetik behin elkartzen dira errepikentzat. Inesa de Gaxen pastorala Bastidan emanen dute ekainaren 15 eta 16an eta ondotik Bardozen irailaren 21 eta 22an.

Gizarte segurantzaren «diruztatzeko» legearen alde bozkatu du Florence Lasserre diputatu eskuindar kontserbadoreak. Horren salatzera hurbildu dira astelehen goizean CGT sindikatuko 50 bat erretretadun haren Angeluko bulego iraunkorraren aitzinera. Apirilean plantan jarri den lege horren helburua da gizarte segurantzaren gastuen apaltzea. Erretretadunen arabera, erremedioen eta mediku bisitetan dispentsa bikoiztea eraginen du lege berri horrek. Heldu den ostiralean Max Brisson senatariaren egoitzara hurbilduko dira ere, aldarrikapen berdinarekin.

EH Bildu eta EAJren arteko berdinketa atzo Gipuzkoa, Araba eta Bizkaiko bozetan Gasteizko legebiltzarreko  hauteskundeetan. Bozka kopuruari dagokionez EAJk zuen kopuru handiena bildu, baina 27 legebiltzarkide izanen dituzte eskuindarrek, orain arte baina lau gutiago, eta 27 ere ezkertiar abertzaleek, sei gehiago. Batek ere ez du bere kabuz gobernua osatzeko kopurua erdietsi, eta PSE ezinbestekoa izanen da agintaldirako koalizio bat erdiesteko, azken lau urteetan bezala: 39 biltzarkiderekin gehiengoa izanen dute EAJk eta PSEk.

Bekat'uros egunak ehunka pertsona elkarretaratu ditu Basabürüako hiriburuan. Altxalili kolektiboak eta Prefosta elkarteak, harrotasunaren martxa ere egin dute Atharratzeko karriketan barrena, Euskal Herria osoko LGBT komunitateko kideekin. Antolatzaileek azaldu dutenez, «ez da errez LGBT pertsona batendako bazterkeriaz inguratutako gizarte batean haztea, are gehiago Ipar Euskal Herria barnealdean». Iragan berri den asteburuan bakoitzak bere sexualitatea aske bizi ahal izan du Atharratzen.