Apez euskaldunen aroa bukatzen ari dea? Euskara baitezpadakoa izan da Elizarentzat azken mendeetan haren mezua euskal gizartean zabaltzeko. Horrek euskal hiztunen apezgotza bultzatu eta gaur egunera arte iraunarazi du. Haatik, azken hamarkadetan, elizatiarren eta euskal hiztunen kopurua apaltzearekin, apez hautagai euskaldunak desagertuz joan dira. Gaur egun, Ipar Euskal Herriko diozesan berrehun apez ingurutik, %15 baizik ez da euskal hiztuna. Mauleko parrokian, erraterako, duela hiru hamarkada 35 apez euskaldun ziren, gaur hiru direlarik.

Euskal Hirigune Elkargoak hamaika etxalde lagunduko ditu uraren inguruan muntatzen ari diren proiektuen finantzatzeko. Proiektu horieri esker bildutako ura, laborantzarako baliatua izanen da, jakinez behar gorrian direla. Iazko idorteak sekulako kalteak sortu zituen, bereziki laborantzan. Lagunduak direnen artean da Argitxu Iturria, Garroan baratzezaina dena. Bertan, euri ura errekuperatzeko putzu bat ezarri dute. Bestalde, Elkargoak hogeita bat etxalde ere lagunduko ditu, berrikuntzaren bultzatzeko.

Mobilizatzeko ordua da Baionako besten eragileen iduriko. Azken edizioko bilan lazgarriaren ondotik, besten eredua galdekatzea eta berriz pentsatzea beharrezkoa ikusten dute anitzek. Baionako besten mendeurrenari begi klixka eginez, 2032 Kolektiboa sortu dute Baionako zenbait herritarrek, Baionako peña, musikari eta ostalariekin batera. Kolektiboko kide guziek aldaketan parte hartzeko engaiamendua hartu dute. Irailean abiatu zuten proposamenak biltzeko epea, eta ordutik aterabideak adosteko lanean dira. Abendu hastapenean Baionako herriko etxeari aurkeztuko zaizkio proposamen horiek. Bere aldetik herriko etxeak ere elkar aditze bat abian eman du. Bera ere eragileekin bildu ondoan, proposamenen fasean sartuko da laster.

Ipar Euskal Herriko Hitzako urteko harpidetza sei euroan egiten ahalko dute herritarrek, eta Berria Lagun izaten ahalko dira urtean 25 euroren truke. Euskarazko astekarien harpidetza bultzatu nahi du aurten Euskararen Erakunde Publikoak. Berriki Herria astekariarekin egin bezala, Ipar Euskal Herriko Hitzarekin hitzarmena sinatu du. Urteko harpidetzaren %75 bere gain hartuko du urtebetez EEPk. Gaur egun 300 bat harpidedun ditu Iparraldeko Hitzak, kopuru hori emendatzea da helbidea.

EHBildu eta EAJ alderdiekin batera, Junts per Catalunya alderdiak ere babestu du Pedro Sanchez Espainiako presidente bezala. PSOEren hautagaia babesteko negoziaketetan, amnistiaren legea eta zergak biltzeko eskumena adostu dituzte besteak beste. Amnistia lege horren bidez hiruehun independentistatik goiti eta 73 espainiar polizia kargugabetuko dituzte. Egun, espainiar Estatuan eta Katalunian den egoera politikoa aztertu dugu Gorka Knorr euskal kantari ohia eta Junts alderdiko kontseilu nazionaleko kidearekin.

Beskoitzeko herriko etxeak ikastolari ezarri blokeoa salatu dute 2.500 pertsonek larunbat honetan. Peio Jorajuria Seaskako lehendakariaren erranetan, «herriko etxeak ez du ikastolen garapenean erabakirik hartzeko eskubiderik». Elkarrizketarako deia egin diote Fabienne Aiensa auzapezari eta oztopo teknikoei aterabidea xerkatzeko prest agertu dira.

Edizio honetarako 'Harro Herri' leloa hautatu dute, eta euskararen ezagutza unibertsalizatzeko beharra nabarmenduko dute. Lasterraldia Irunen hasiko da martxoaren 14an, eta Baionan bururatuko martxoaren 10an. Egun osoko besta antolatuko dute Lapurdiko hiriburuan. Aurtengo omendua Azterketak Euskaraz izanen da. Horrela, Ipar Euskal Herriko gazteek baxoa eta brebeta euskaraz iragan ahal izateko egindako borroka aitortu nahi dute. Kattina Haran-Razin Iparraldeko Korrikako langilea izan da Goiz Berri saioko gomita.

Mila familia baino gehiago eta 5.000 norbanako lagundu ditu Sokorri Katolikoak aurten, Ipar Euskal Herrian. Karitatezko erakundeak ohartarazi duenez, garraioari loturiko beharrak ere emendatu dira, bereziki barnealdean. Erregaia erosteko, ibilgailuak konpontzeko edo garraio publikoa hartzeko bonoen galdea nabarmen hazi da, eta laguntza guztien %27 dira. Bestalde, Sokorri Katolikora hurbiltzen direnen adina zahartu egin da, laguntza galdea egin dutenen %38k 50 urte baino gehiago dute; eta haurrekin diren emazte bakartuen kopurua ere sei puntuz goiti egin du azken bost urteetan, ia %22ko heineraino. Egunero banatzen dituzten gosarien kopurua bikoiztu egin da azken hamarkadan. Jon Gonzalez Epherra Baionako Sokorri Katolikoko langileak azaldu duenez, Baionako egoitzan bakarrik, aurten, 19.000 gosari banatu dituzte. 

Greba eguna izanen da azaroaren 30a, Hego Euskal Herrian. Zaintza lanen eta, oro har, lanbide feminizatuetan lan baldintza hobeak galdeginen dituzte. Grebaren antolaketan parte hartu duten antolakunde feministek zaintza publiko-komunitarioaren alde eginen dute, elkar zaintza kolektiboa eta Estatuaren zaintza zerbitzuen hobekuntza uztartuz. Hegoaldeko 30 eragile sozial eta sindikalek adostutako «herri akordio» delakoa bultzatzeko baliatu nahi dute mobilizazio eguna. 23 aldarrikapen hitzartu dituzte. Ipar Euskal Herrian azaroaren 17an eta 18an grebari eta zaintza ereduari lotutako hitzaldiak antolatu dituzte. Itaia emazte sozialisten antolakundeak ere, borroka eguna deitu du lan banaketa sexualaren eta lanbideen arteko hierarkizazioaren kontra, eta zaintza zerbitzu kalitatezkoak, doakoak eta unibertsalak aldarrikatzeko. Ipar Euskal Herriko herritarrak Donostian antolatuak diren mobilizazioetan parte hartzera deitu dituzte. Ekhiñe Petriati, Denon Bizitzak Erdigunean koordinakundeko kidea: