Ipar Euskal Herriko kolegio publikoetan sail elebiduna sustatzeko komunikazio kanpaina aurkeztu dute. Ikasleak eta gurasoak konbentzitu nahi dituzte Lehen Mailaren ondotik ere, kolegioan sail elebidunaren aldeko hautua egin dezaten. Izan ere, ama eskolatik kolegiora anitz dira elebitasunaren ontzitik jausten diren ikasleak. Lehen mailan 5.700 ikaslek egin dute sail elebidunaren hautua, aldiz, kolegioan 1.600 baizik ez dira. Ipar Euskal Herrian diren hemezortzi kolegioetatik hamabostek proposatzen dute aukera elebiduna gaur egun. Kanpaina sare sozialetan hedatuko da bereziki ikus-entzunezko baten bidez, eta informazio bilkurak antolatuko dituzte gurasoekin.

Heldu den astelehenean eztabaidatuko du Frantziako legebiltzarrak Darmanin legea. Azken hamarkadetan etorkinen eskubideak gehien murriztu dituen legea izanen da Etorkinekin-Diakité federaziokoen arabera. Besteak beste, paperik gabekoei AME Estatuko osasun laguntza kenduko die, lan egiteko edo ikasteko urtebeteko baimenak zorroztu eta kanporaketak erraztu. Abenduaren 18a Migratzaileen Nazioarteko Eguna izanki mobilizazioak izanen dira Frantzia osoan. Ipar Euskal Herrian abenduaren 16an Izpegin elkarretaratzeko deia luzatu du Etorkinekin-Diakiték.

Urteroko argazki jendetsua utzi du Durangoko azokak bere lehen egunean. Atzo ireki zituen ateak eta igandera bitarte azoka «anitza, gaztea eta fantasiaz beterikoa» izanen dela erran dute antolatzaileek. Aurten 950 berritasun aurkeztuko dira azokan, horien artean 39 Ipar Euskal Herriko sortzaileenak. Euskal Kultur Erakundeak lagundurik, Iparraldeko hamabi egitura presente izanen dira Landako gunean; baina aldi honetan ez dira denak elkarrekin izanen, musikagintzako profesionalak musikarien gunean izanen baitira, horien artean, Matthieu Harambourek sortutako Belarri diskoetxea.

44 metro goratasun duen antena batek arrangura piztu du Akamarren. 2024ko otsailean martxan egonen da, eta Christine Serres-Cousiné auzapezaren erranetan, Akamarren «behar-beharrezkoa den tresna izanen da gune xurien estaltzeko». Herriko etxearen arabera antena horrek 4G-a hedatuko du bakarrik. Herritar kolektibo batek helegitea pausatu zuen Paueko auzitegian, asteazken honetan aztertzekoa zena. Baina, ororen buru, TDF enpresak auzian galdegindako 4.000 euroko kalte ordainak ordaintzeko lanjerra saihesteko, gibelera egin dute. Biztanle kolektibo horren arabera, auzapezak ez die haien iritzia galdegin antena ezarri aitzin. Inguruko paisaian lukeen eragin ezkorra azpimarratzen dute, eta jada milako bat sinadura bildu dituzte haren ezarpenaren kontra.

Agintaldi erdira heldu dira Iparraldeko herriko etxeak, eta Urruñan, kanpaina garaian hitz emandako proiektu gotorrenak abian direla defendatu du Filipe Aramendi auzapezak. Trantsizio ekologikoa, ondare naturala eta eraikin publikoen egokitzea izan ziren gehiengoa erdietsi zuen zerrendaren ardatz nagusiak. Oposizioa, aldiz, kritiko agertu da azken hirurtekoko kudeaketarekin, eta auzapezak ere onartu du egitasmoak uste baino emekiago garatu direla. Herritarren parte hartzea bultzatzeko xedez, 'Herritarren biltzarra' sortu dutela azaldu du Aramendik, eta etxebizitzaren gaineko arazoa arintzeko, lurren erosketari ekin diote, lur-jabe pribatu eta promotoreekin negoziatu behar ez izateko,

«Bi pauso aintzina, eta bat gibelera» egitearen sentsazioa du Seaskak. Hezkuntza ministerioak brebetako azalpen oro frantses hutsean ematea deliberatu zuen iragan astean, nahiz eta ikasleek euskaraz ihardukitzeko eskubidea izanen duten. Edouard Geffray eskola irakaskuntzako Frantziako zuzendari nagusiak argudiatu duenez «seguritatea eta zuzentasuna» bermatzeko hartu dute erabaki hori. Joan den urtean galderak euskaraz ukan zituzten ikasleek, ez ordea oinarrizko testuak. Seaskak, ikasleen «hizkuntza eskubideak» berriz ere urratuak izanen direla salatu du

Sarako Eskutik kooperatibak pilotazale gazteenei egokituriko xistera sortu du. Iparraldeko Pilota Batzordearekin elkarlanean egin dute tresna pedagogiko berria, Euskal Hirigune Elkargoko diru laguntzarekin. Aztia ingeniaritza zentroak eta Mauleko Elkar zurgintza enpresak ere parte hartu dute xistera ttipi horren diseinuan. Francis Karrikartek azaltzen duenez «sorkuntza lan luzea izan bada ere, egiazko xisteraren ezaugarriak errespetatu dituzte». Larruz eta gaztainondo xafla batez egin dute, zumezko edo mihimenezko xistera baino azkarrago izan dadin, haurrek ez hausteko gisan. Eguberritarako opari ona izan daitekeela uste dute sortzaileek, eta jada eskutik.eus atarian salgai eman dute 160 eurotan.

Pertsona elbarrituen errealitateaz kontzientziatzeko hilabetea izan da azaroa. Abenduaren 3an euskararena ez ezik, Elbarrituen Nazioarteko Eguna ospatu zen ere bai. Sentsibilizazio beharra bada bi gaietan, eta horren kari Handi'gnite egitasmoa garatu dute Baionan, hamaika ikusgarri, erakusketa eta mintzaldirekin. Laster ere Telethon ekimena abiatuko da, urtero bezala, eritasun genetikoak jasaten dituzten pertsonei laguntzeko xedez. Lapurdin, Miarritzeko 'Argia' zentroa da elbarrituak laguntzeko den gune nagusietariko bat. Zentroan 30 paziente laguntzen dituzte eguneroko bizian ahal bezain autonomo izan daitezen. Uxue Guimon Argia zentroko monitore hezitzailearen arabera «gehienek gizartean normaltasunez bizi nahi dute, apartamentu, bikotekide eta lan batekin». Horretarako, «paziente bakoitzaren beharretara egokitzea ezinbestekoa da».

‘2032 Kolektiboak’ joan den ostiralean aurkeztu dizkio adostu proposamenak herriko etxeari. Hauen artean : gazteriaren inplikazioa indartzea besten antolakuntzan, besten aplikazio bat plantan ematea edo ostalari nahiz sokorrien arteko koordinazio bat sortzea. Horrez gain, bozgoragailuen musika murriztuz musika biziari leku gehiago ematea ere proposatzen dute, baita pisa egite basatiaren kontra borrokatzea etazaborren bilketa hobetzea ere. Kolektibo horretan biltzen dira, besteak beste, Baiona Ttikiko ostalariak, Baionako UMIH, Zizpa gaztetxea, peñak edota PAF talde feminista.