Agur entzuleak.

Otsailan gira. Otsaila, otsoen hilabetea. Noizbait otsoak negu betean herrietarik hurbiltzeko

joeratik jiten da hain segur izen hau. Ez dugu orai horren beldurrik, bainan pentsatzen ahal

da egoera horietan ez zirela lasai bizi jendeak, haien beharrezkoak zituzten kabaleen

galtzeaz beldur.

Bada aspaldi ez zaizkigula basa pizti horiek hola hurbiltzen, nahiz eta azken bizpalau

urtetan otsoa agertu den Baxenabarre eta Lapurdi aldean. Beharrik! Otsoa hemen luzarat

kokatzeak seguraski jasan ezinak litaizkeen nahasmenak sor litzazke.

Aurtengo otsaila berezia da : euri, tenpesta, haize bortitz...

Bainan hara, otsailaren 15ean ainara bat zabilen Zohaztiko aintzira gainean, euri uharren

artetik ur gainean ziren ulitxak harrapatu nahiz. Bakarrik agertu zaigu. Sahara hegoaldean

hilabete zunbait pasaturik berriz hunarat jin da. Behar bada Amikuzen du bere ohantzea

eginen? Edo iparralderago joanen? Nork daki? Bainan harrigarria da doi doia 20 gramo

pisatzen dituen xori honek nolako bidaiak egiten dituen, milaka kilometrokoak, urtean bi

aldiz : bat orain, iparraldera, umatzeko lekuen xerka eta larrazkenean hegoalderat, negua

pasatzeko. Bai udan eta bai neguan teorian mamutxez beteak diren lekuetan egonen da,

atxemanen du beraz jatekoa. Bainan bidaia denboran ez dira gauzak beti hain aise, eta

otsail hau etsenplu bat da.

Otsaila. Gure herrietan maskaradak, kaxkarrotak, Santibate eta libertimenduak hasiak dira.

Ihauteri sasoina dugu. Mundu honetan orden zerbait ezartzen entseatzen dira gure gazteak,

ez baitirudi gure mundua biziki xuxen ari denik... Ez naiz segur ihaute horiek biziki

efikazak diren gure arazo guztiak konpontzeko. Bainan biziki onak dira arazoak nun diren,

zer diren zehazteko. Eta umorea, arraileria deblauki baliatuz biziki lan ederra dute egiten

gure gazteek.

Aurten Hazparneko Zanpantzar komunikazionetan aipatua izan da, alde bat! Ez zen

halakorik gertatu azken urteetan nahiz eta usaian bezala Zanpantzar epaitu ondoren errea

izan den. Hara, Bordela edo halako izena zuen tipo baten lagunek dute hori barreatu, heien

interes elektoralistendako hain segur. Jende horiek ez dute deus ulertu ihauteriak zer

diren... Alta behar lukete hor zerbait ikasi eta gogoetak egin.

Gora Zanpantzar, gora maskaradak, Kaxkarrotak, gora ihauteriak eta laster arte.