Usatzen

 

Usatzen gira euria hasi, etxeko teilatuan itazureak nun eta ganerrean dugun balde zaharrak urzionea ongi biltzen duela egiaztatzeari, beharria zut.

Usatzen gira laneko bidean, autoz goazela, halako bihurgune gaixtoan kasu emaiten, horko baratzean lili berrieri behakoa botatzen, hortxeko itzulinguruan doi-doi ezker begiratzen, edozoin gisaz ez da sekulan nehor ere heldu.

Usatzen gira – nor ez – amak  prestatu arropa garbiari, aitak arrañatu autoko errotari, lagunek segurtatu bakantzen planoeri, maitiak ekarri opari sotilari. A ! Eta amatxiren hilabeteroko 50 euroeri. Potta zuri, amatxi !

Usatzen gira mahaian jateko goxoak partekatzeari, errezetak trukatzeari, maitasunez sukaldatzeari, mahai inguruko solas arrunt, solas bero, usaiaz kanpoko nola eguneroko solaseri.

Usatzen gira etxeko gatua perekatzeari eta bakardadeari, isiltasunari, barne-solasari bai eta noiztenka lupuekin mintzatzeari ere. Lagun batek zion : « Lasai, lupuak ihardesten dizula asmatzen ez duzuno, salbu zira ! ». 

Usatzen gira aitamen erranak ontzat jotzeari, helduen hitzak errespetatzeari, nagusien eskaerak betetzeari, politikarien diskurtsoak sinesteari, agintarien manuak segitzeari.

Usatzen gira baitezpadako indarrik gabe, jende otzan, jende perestu, jende ongi heziak giren ber.

Auzoak belar-moztekoa, hostoen ufatzekoa, nun ez den trontza-zerra, trakturra edo kabalen pisa hedatzekoa pizten duelarik etxeko leiho-bortak hets eta barnean egoiten gira, nahiz iduzkian etzan gintezkeen. Bidenabar, etxeko mubleak errautsetik libratzen ala zoladurari garbialdi bat ona ematen diogu – bazuten beharra ! – .

Lagunak eztabaidagai litekeen oharra botatzen duelarik, onargarriaren mugak kilikatzen dituela ere, – irri egiteko ari da –  egokitzen gira eta... usatzen. Usaietan sartzen uzten dugu, ongi kokatzen, nasaiki lekua hartzen.

Eta horrela, berriak entzun eta jende sarraski etengabeari, armagintzaren negozioak miloien irabazle direla entzuteari usatzen gira. Gainera, gure kusia horietan lanean ari da, beraz harentzat pozten gira  eta guk ere defentsako arloan sos pixka bat inberti genezakeela burutaratzen zaigu. 

Eta horrela, primadera heldu eta ehunka hektareak erretzeari, mendiak berde-beltz ikusteari usatzen gira.