Gazteen iraultza

Udazkena udari

ari zaio bultza,

berote handieri

eman nahian pausa.

Baina txinpartak hartu

egin du gorputza,

urriak zabalduaz

iraileko hautsa

ta harekin hauspotuz

ikasle iraultza.

Kartoia hartu eta

eskuan pintzela,

hola soilik sortzen da

aldarri itzela.

Karriketan behera

ikasle tropela

entzuna izateko

ezin da bestela.

Nork zion gazteria

Hil eginda zela?

Kezkaz beteta dago

gaur egun gaztea,

atzean loturikan

Parcoursup trastea.

Zaila da batzuetan

jatorriz janztea

baina ezin da onartu

sortzen dun kaltea,

eskubide bat baita

duinki ikastea.

Ikasleei oldartu

zaie polizia,

eskuan ezkutua,

arkua, gezia.

Baina hau dena ote

dute merezia?

Erakusteagatik

beren iritzia

eta zabaldu nahian

ozen irrintzia.

Gazteen oldarra da

soilik hasiera,

txinpartarekin sua

iteko aukera.

Aldarrien borborraz

bero atmosfera

eta greba hurbiltzen

delarik honera,

hauteskunde garaia

benetan hasten da