Heldu den larunbatean iraganen da Euskal Kultur Erakundearen Biltzar Nagusia,

martxoaren 25ean, goizeko 9ak eta erdietan, Donapaleuko Saint Louis zinema gelan.

Kultur eragile guziak hurbiltzera gonbidatuak dira: bai elkarte kideak, bai hautetsiak.

Ezen, elkartearen arduradunek aurkeztuko dute aurtengo egoera, iazkoari begira:

zergatik eta nola moldatu behar izan diren 2025 eta 2026ko egitasmo orokorrak, zoin

irizpiderekin, erakunde publiko bakoitzak EKE zoin heinetan sustengatzen duen eta

zoin engaiamendu hartu duen. Solas horietatik haratago, parada izanen da

elgarrekin ideiak trukatzeko, segi dezagun oraindik bizirik daukagun kultura

aztertzen, sustatzen eta transmititzen.

Erasoak alde anitzetatik heldu dira, eta usaiako gatazka ideologiko eta politikoei,

nortasunari edo herritasunari lotuak, gehitu behar zaizkie beste motatako gudu

erraldoiak. Horren ilustrazio argia ukan dugu azken egun hauetan, Marko

marrazkilariak salatu baitu Miarritzeko antzerki talde batek afixa bat Adimen

Artifizialarekin eginik: artea eta bizia (edo bizitza) uztartzen dituzten artistak nola lerra

daitezke hila dagoen pentsamendu artifizialaren erabilpenera, beren lana argitan

ezartzeko, jakinez tresna teknologiko berriak zoin kaltegarriak diren bai ingurumenari

begira, bai jendarteari begira? Paris VIII unibertsitatean irakasle den Sébastien

Brocak, Le Monde Diplomatique hilabetekariaren azken zenbakian, “Adimen

Artifiziala eta Estatuaren ezteiak” artikuluan, ongi frogatzen du “teknofeodalismo” edo

“teknofaxismo” garai batean sartuak girela, zoinetan Estatu Batuetatik eta Xinatik

datozkigun teknologien bidez indar inperialista izigarri beldurgarri berri batek mundu

osoa bere egin nahi duen. Europako Estatuak horren konplize dira, nahikariaz edo

halabeharrez, bata eta besteen ekonomiak hain baitira elkarren menpeko, eta gu ere

konplize ginateke, gure kultura edo herri egiten gaituen hori, teknologia bizi-jale

horren esku uzten bagenu.

Garai gogor honetan, zentzu gehiago du oraino elkartasunez aritzeak:

larunbatean, Uztaritzen eraikiko den kultur bilgunea presentatua izanen da, hau da

EKEk, Bertsolarien Lagunak elkarteak, Iparraldeko Dantzarien Biltzarrak eta Herri

Soinuk daramaten proiektua, Hirigune Elkargoaren laguntzarekin. Baina maila

guzietan elkartasunez aritu beharko dugu : kultur sare buruen artean, elkarte ttipiren

artean, herriko etxe eta elkarteren artean, besta komiteen artean, gurearen

iparrorratza ez galtzeko. Inperioak noizbait beren neurrigabekeriarengatik erortzen

dira, dio Sébastien Brocak, bere artikuluan –Antzinateko mitoek jadanik erakutsi

bezala, funtsean. Anartean, zain dezagun maite dugun hori eta zain gaitezen bata

bestea. Larunbatera arte!