Paretak xuri

Ez da berria gure herrian

Lortzen dena ebasten da

Lehenik prefetak euskara etsai

Egindako eskaera

Gero Itsasun duela berrogei

Urteko problema bera

Ta hainbesteko tema ikusiz

Ezpainetan dut galdera

Pareta dute ezabatu nahi

Edo gure izaera?

Abertzaleen propaganda da

Erraiten digute guri

Propangadarik sekula egin

Ez daukutela iduri

Frantses iraultza, frantses armada,

Frantses eraikin ta zubi

Haur eskolatik horren ikasten

Ibili gira urduri

Paretetaz gain gure buruak

Utzi nahi dituzte xuri

Jakobinoek maiz ukan dute

Kontrolatzeko beharra

Baina herria xuriz janztea

Da estrategia txarra

Nahiz eta gu ahulak izan

Ta gobernua azkarra

Nahiz eta ukan gure paretak

Ezabatzeko indarra

Zailagoa da ezabatzea

Memoriaren oldarra

Azken aldian ustegabeko

Gogorrak bildu ditugu

Baina borroka da gure sua

Nork geldituko gaitu gu?

Zuek segitu ezabaketan

Plazaz plaza guduz gudu

Guk anartean pareta oro

Garai hobeen aiduru

Maite ditugun kolore eta

Formaz tindatuko dugu