Joango balitz hobe.

 

 

Azken denboran gaiak

hartu du indarra,

iritzi, berrietan

hemen barra barra,

Ez baniz e lehena,

ez eta bakarra

Nik ere prefeta dut

aipatu beharra.

 

Bat joan orduko da

bestea etorri,

funtzionarioen baltsa

deitzen zaio horri,

badakigu zertara

daukuten igorri

herri hau mantentzera

urdin, xuri, gorri.

 

Halere has dezagun

gure azterketa

jakiteko nolakoa

dugun jaun prefeta

aldatu da pixka bat

izena, silueta,

baina buru gainean du

beti ber kasketa.

 

Baiona ta Sarako

auzapez ta talde

Euskara ofizialki

aitortu ta are

Frantziako pareta

hortxe parez pare

hunek ez du eginen

Euskararen alde.

 

 

Pareta margoz bete

da aldiz Itsasun

herriak zer bizi nahi

ta zonbat maitasun,

geroa eraikitzeko

lehengoaren oihartzun,

dena ezabatzeko

du Pauek erantzun.

 

Begiak luzatuta

Bidasoa ondora,

kontroletan nor dugu

zu sar zu kanpora,

erran nahian bezala

arazoa hor da,

gero eskuin muturrak

segitzen du gora.

 

Orduan aztertuta

idei ta balore,

sakondu eta gero

hitz eta kolore,

ene sentimendua

ezin nuke gorde,

triste bizi naiz eta

joango balitz hobe.