Udako bakantza garaia bururatzear da, eta laster heldu da ikasturte berria. Buruilaren 5ean abiatuko da, eta usaian bezala, ikasturte erabakigarria izanen da terminala abiatzen duten ikasleendako. Baxoaren urtea hasiko dute eta goi mailako ikasketak egin nahi dituzten horiek, hautuak egin eta hautagaitzak plazatu beharko dituzte. Baionako Aldazia orientazio eta formakuntza zentroko Helene Charritonek dioenez, «baitezpadakoa» da ikasturte hastapenetik erabakiak argitzen hastea, «bereziki atzerrian edo Hego Euskal Herrian edo atzerrian ikasi nahi dutenendako».

Usaian hektareaka bost tona gari biltzen dira Ipar Euskal Herrian, baina aurtengo uzta urriagoa izan da. Iragan larrazken eta neguko euriek zerealaren ereitea gibelatu zuten, eta horren ondorioz, uzta ez da iazkoa bezain oparoa izan. Haatik, baldintza zailak izanik ere, tokiko lehengaiekin Iparraldean ekoizten den Herriko ogiaren sailak uste baino uzta hobea ukan du. Aurtengo zerealaren kalitatea, gainera, aski ona dela erakutsi dute analisiek. Bildutako uzta, ordea, ez da aski izan Herriko kalitate-irizpideak segitu nahi duten bezero ororentzat. Eskaria asetzeko, beraz, Biarnoko gari-soroetako uztatik hornitu behar izan dira.

European Free Alliance edo Europako Aliantza libreak 19 herrialde ezberdinetako 40 bat alderdi biltzen dituen Europako taldea da. Autonomia, erabakitzeko eskubidea edo hizkuntza gutxituen gaia jorratzen dute herrialde ezberdinetan, hauetan euskal herrian. Preseski 2019tik, horren presidentea, euskalduna da Lorena Lopez de Lacalle. Eusko Alkartasuneko kidea da. Aste buru honetan parte hartu du Régions et Peuples Solidaires alderdiaren udako unibertsitateetan.

Angeluko Hormadi izotz hockey taldeak denboraldi zaila bizi izan zuen. Alde batetik, emaitzen aldetik; eta bestetik, 450.000 euroko defizitari buru egin behar baitio. Hala ere, klubak orrialde berri bat ireki nahi du, Olivier Bouney lehendakari berria buru. Taldearen egituraren aldatzeko borondatea du, eta taldea urrunago eramateko prest agertu da.

Espartingileek ez dute nahi beste saldu uztailean eta ekainean. Turismoak beheiti egin du uda honetan Ipar Euskal Herrian eta supermerkatuek espartina gutxiago manatu dituzte. Horren ondorioz, langabezia partzialean ezarri dituzte langile zonbait, besteak beste, Thauzin entrepresan. Don Quichosse saltegian ere, bilana ez da baikorra izan; Udako hilabeteetan, egunero, bospasei bisita egiten bazituzten ere, aurten, bisitaririk gabeko egun zenbait ukan dituzte.

Maider Bereau Senpertar arraunlariak goi mailako Euskotren liga irabazi berri du Donostiako Arraun Lagunak elkartearen izenean. Iaz, Kontxako proba famatua eraman ondotik, beste titulu ospetsu bat beraz lapurtarrarentzat. Gainera, errekor bat hautsi dute, jokatutako hamabost banderak irabazirik. Donostiako Kontxako bandera da azken erronka aurtengo. Lehen eguna irailaren lehenean iraganen da eta bigarrena irailaren 8an. Horretan parte hartzeko kanporaketa agorrilaren 29an, ostegunez jokatuko dute.

Amiamoko edo zikoina xuri eta miru beltz gehiago zenbatzen ditu LPO hegaztien babeserako elkarteak. Badu 46 urte txori zenbaketak egiten dituztela Organbidexkan, Larraine gainealdean. Kontaketak uztailaren 15an hasten dituzte eta azaroaren 15an bukatzen baina uztailaren 15etik agorrilaren 15a arte, miru beltzak pasatzen dira eta ondotik, azaroa arte zapelatz liztor jaleak dira pasatzen. Iaz, 25.000 miru beltz pasa ziren eta aurten 33.000 pasa dira. Amiamoko xurien kasuan, iaz 1.629 eta aurten jadanik 1.380 zenbatu dituzte. Hala ere, aldaketa klimatikoaren eraginak sentitzen dira, txori ttipi geroz eta gutiago agertzen dira. Hegazti harrapariak, babestuak dira Organbidexkan 1972ko legeari esker.

Aurten, EH Baik errezibituko ditu Région et Peuples Solidaires Frantziar estatuko mugimendu independentista eta autonomistak batzen dituen alderdiaren 29. Udako Unibertsitateak. François Alfonsi, Meritxell Serret, Igor Zulaika edo Anaiz Funosas entzuten ahalko dira egun hauetan. Bake prozesuak aipatuko dira Korsika, Katalunia eta Euskal Herriko adibidearekin, edota hizkuntza ttikituen egoera Europan Peio Jrajuria eta Paul Molacen parte hartzearekin. Abuztuaren 23an hasiko dira eta 25ra arte iraganen dira Baionako Bernat Etxepare lizeoan.

Maddi Kintanak Baiona, Angelu eta Miarritzeko gazteen euskara aztertu du bere tesian. Hitz berriak sortzen dituzte baina baita hitzak beste hizkuntzetatik hartzen ere, besteak beste, interneten eraginez. Maddi Kintanak aurkeztutako tesiak Alex Artzelusek mugaldeko hizkerei buruz egindako lanak berresten ditu: orain arte, helduenen artean euskalki bera partekatzen bazuten, adibidez, Luzaiden, Arnegin eta Garazin, gaur egun muga politikoa muga linguistiko bihurtzen ari da. Hortaz, bi hizkera ezberdin bereizten ari badira, beste nonbaitetik ere elikatuak dira: internetetik. Maddi Kintanak egindako ikerketak hori erakusten du behintzat. Ingelesa anitz entzun daiteke, baina frantsesaren eragina azkarrena da. Etorkizunean, bere tesiaren gaia Lapurdiko kostalde osora zabaltzeko xedea du.