%15 hobetu da hondarkinen bereizketa Garazi-Baigorri eskualdean, 2022tik 2023ra. Bil Ta Garbi sindikatua baikor agertu da emaitzarekin berriki egin duen bilanean. Haatik, hondarkin geldoak Baxe Nafarroan pausatzeko gune eskasia nabarmendu dute. Momentuko Urruñako Bidexka zentroa da Bil Ta Garbik duen gune bakarra eraikuntzako ekaiak edo bestelakoak botatzeko. Bestalde, negu bukaeran etxaldeetako errota zaharren bilketa antolatuko dute Garazi-Baigorri eta Iholdi-Oztibarre lurraldeetan, eta horretarako herriko etxeetan izen-eman beharko da.

Idoia Rodriguez Mondragon idazleak Euritan eleberria aurkeztu berri du Baionan. Euri izeneko neska baten bizipenak kontatzen ditu, egunkari moduan. EKE-Elkar literatura bekaren laguntzaz idatzitako liburu hau Ipar Euskal Herriko idazleen lana sustatzeko helburuz sortu da. EKE-Elkar literatura bekak edizio berriari begira jarraitzen du, oraingoan helduentzako literaturako proiektu bati lagunduz. Proposamenak maiatzaren 31 arte aurkez daitezke.

Munduan 123 «pommelier» zenbatzen dira. Hau da, sagardo sommelierra, edo sagardoan aditua dena. Eta hain zuzen, pommelier titulua eskuratu berri du Haritz Rodriguez donostiarrak. Titulu hori American Cider Association erakundeak eman dio, munduan errekonozitua. Rodriguez, marketing gastronomiko eta turistikoko aholkulariak proba teoriko eta praktikoak gainditu zituen, sagardoaren ekoizpena, historia eta ezaugarriak aztertuz. 

«Ortzaiztar bat, arbola bat» proiektua eraman du Ortzaizeko herriko etxeak 2024 urtean. Orotara 880 arbola landatu dituzte mendian eta herrian berean. Aurten, aldiz, herria egokitzeko lanen urtea izanen da, eta abantsu bi milioi euroko aitzinkontua aitzinikusi dute horretarako. Batetik, herriko etxea Arrosategia izeneko eraikinera lekualdatzeko xedea dute, eta bigarrenik, herriko plaza bat eraikitzekoa. Lan horiek martxoan abiarazi nahi dituzte, baina finantzamenduak oraino ez dira osoki ziurtatuak, besteak beste, Departamentuak bizi duen egoera dela eta. Momentuko, Euskal Hirigune Elkargoak bakarrik baieztatu du bere babesa.

Euskal Sagarnoa mugaz gaindiko sormarka baimendu behar luke Europak aurten. Arautegia errespetatuko duten Iparraldeko eta Araba, Bizkaia eta Gipuzkoako sagar biltzaileak eta sagarnogileak sare horretan izanen dira. Nafarroa horretan sartzeko desmartxa egiten ari da. Helburu nagusia izanen da hemendik 2030. urterako, sagar guziak Euskal Herrian ekoitziak izan daitezen. Orain arte hiruetarik bat baizik ez baita Euskal Herrian ekoiztua. Iparraldeko sagarnoen sindikatuak sagarrondoen landatze proiektuak sustengatuko ditu, heldu diren urteetan, Hegoaldeko sagar galdeari erantzuteko.

Benito Lertxundi, kantugintzan egin duen ibilbidearentzat eta Txomin Dhers, musikari gazte gisa egin duen ekarpenarentzat. Bi sari banatu dituzte Eusko Ikaskuntzak eta Donibane Lohizuneko herriko etxeak larunbatean.

Donibane Garazin ospatuko du Aberri Eguna Ipar Euskal Herriko mugimendu abertzaleak, apirilaren 20an. 'Elkarrekin, herria, burujabetza' leloa hautatu dute eta heldu diren hamar urteetarako bide orria finkatu zuten hainbat eragile abertzalek Bagira prozesuaren bidez. Zentzu horretan, Aberri Egunean burujabetasuna eta Iparraldearendako estatus instituzional propio bat aldarrikatuko dute.

Duela hemeretzi urte berpiztu zen libertimenduen usadioa Donibane Garazin. Antton Lukuk abiatu zuen mugimendu hori, eta bi hamarkadetan, Ipar Euskal Herriko herri desberdinetara ez ezik, Hegoaldera ere hedatu da. Zortzi libertimendu muntatu dira aurten, eta datozen asteetan, joaldun, kaskarot, maskarada edota kokoak plazaratuko dira. Ihaute garaiaren zentzua eta funtsaz bere iritzia eman digu Antton Luku idazle, irakasle, antzerkilari eta ikerlariak. Zer da libertitzea? Zertan balio du karrikak eta plazak harrotzea?