Euskal Monetak sartze honetako bere helburuez puntua egin du. Hamabi langilerekin euskoak leku gehiago nahi du mediateka, igerileku edo jantegietan, baita Txik Txak garraio publikoaren sarean ere. Horretarako herriko etxeen inplikazioa beharko du. Gaur egun, 38 herriko etxeek eta Euskal Hirigune Elkargoak baliatzen dute Ipar Euskal Herriko tokiko moneta hau ordainketa zenbait egiteko. Duela hamabi urte sortu zen, eta gaur egun, 4,2 milioi eusko zirkulazioan dira, 4.200 norbanakok eta 1.400 profesionalek baliaturik. Aurten Ipar Euskal Herri barnealdean indartu nahi du moneta horren presentzia. Horri begira, Xiberoa, Baigorri, Iholdi, Oztibarre eta Amikuzen lanean arituko den lurralde animatzaile berri bat enplegatu dute.

LAB sindikatuak Ipar Euskal Herri mailako egitura sozioekonomikoak eta langileentzako negoziazio kolektiborako guneak sortzearen beharra aldarrikatu du, 'Hemen Erabaki' kanpaina berriaren aurkezpen agerraldian. Sindikatuaren arabera, proiektu horrek Ipar Euskal Herriko akordio kolektiboak negoziatu eta hobetzeko aukera eskainiko luke, lan baldintzak harmonizatuz eta hobetuz. Proiektu horren alde lan eginen du sindikatu abertzaleak heldu diren hilabeteetan, beste sindikatu eta entitate batzuekin batera.

Buruila bukaera, eta urri artean mahats biltzen hasten dira mahastizainak. Baina egin duen aroagatik hilabete zenbaitzuk aitzin mahastizainak aurtengo sasoiak emanen zuenarekiko mesfidati ziren. Izan ere, joan den maiatzean bazizkorra izan zen Baigorri eta Irulegi aldean, baita agorrilean ere Jatsu aldean. Irulegin jada fruituak ageri dira. Iazko galeren ondotik, beraz, itxaropena piztu da laborariengan.

Ehun bat pertsona bildu ziren larunbatean Luhusoko plazan Itaia emazte antolakundeak eta Luhusoko besta komiteak jakinarazi duten bortxaketa salatzeko. «Indarkeria matxistari aurre egin» edo «erasoen aurrean antolatu» lemak oihukatu zituzten, besteak beste. Luhusoko bestetan mutiko batek neska bat bortxatu duela salatua izan zen. Elkarretaratzearen bukaeran Itaiako bi kidek hitza hartu zuten, erasoen aitzinean arrapostu eraginkor eta antolatu bat ematearen beharra azpimarratzeko.

Gau eskolek ikasturte berria abiatuko dute buruilaren 30ean. Lapurdi, Baxe Nafarroa eta Xiberoan 1.200 ikaslek ekin zioten euskara ikasteari AEKn. Aurten kopuru hori gainditzea goaitatzen dute, eta preseski, irakasle beharretan dira. Izan ere, geroz eta eskaintza mota gehiago proposatzen dituzte, euskara zerotik abiatzeko, euskara hobetzeko edota tokian-tokian nahiz lantegietan taldeak sortzeko. 'Euskara goxoki ikasi eta bizi' leloa hautatu du AEKk aurtengo izen emate kanpainari begira.

Iparraldeko Pilota Batzordeko lehendakari berria izendatu dute euskal pilota elkarteek. Ustekaberik gabe, Henri Errandoneak gidaturiko zerrenda bakarra hautatu dute. Abiatutako proiektuak aitzina eramanen ditu azken zortzi urteetako idazkari nagusi ohiak, eta Ipar Euskal Herriko esku huska sailean bizi den tentsio egoerari buru egin beharko dio. Lilou Etxeberria FFPBko presidentearen eta Esku Pilota berezko pilotarien elkartearen jarrerak salatu ditu berriki Iparraldeko Pilota Batzordeak. Henri Errandonearen irudiz, «pilotan, gauzak hobetzeko, arduradunak aldatu behar dira». Frantziako Pilotako Federazioko bozak, hain zuzen, abenduan iraganen dira

Venezuelan bozak izan ziren uztailaren 28an, bertako presidentea hautatzeko. Hauteskunde biharamunean kalapitak piztu ziren, bozen garaile desberdinak atera baitziren. Alde batetik egungo presidente den Nicolas Madurok berak irabazi zituela adierazi zuen CNE hauteskunde kontseilu nazionalak. Oposizio eskuindarrak, aldiz, hastapenetik adierazi zuen bozak galtzen bazituen «iruzurra» salatuko zutela. Ondorioz, Edmundo Gonzalez hautagaiak bere garaipena aldarrikatu zuen.

Eskubaloian, Euskal Kostako neskak dira maila gorenean ari aurten Ipar Euskal Herriari dagokionez. Julene Arrijurria 15 urteko gazteak bere lehen minutuak jokatu ditu lehen taldearekin joan den aste buruan. Talenceko trebatze poloan sartu berri da bigarrenean, ikasketak eta goi mailako kirola uztartzeko xedez. Ostiraletan Euskal Kosta bere taldearekin biltzen da, aste buruko partiden prestatzeko. Nationale 1 mailako txapelgoa berdinketarekin hasi zuten La Roche Sur Yonen joan den astean. Igandean, Nantes hartuko dute Baionako Lauga gelan.

Elkarrekin abiatu dute ikasturte politikoa EH Bilduk eta EH Baik, Donostian. Agerraldian mintzatu dira Mathilde Hary Iparraldeko abertzaleen bozeramailea eta Arnaldo Otegi Hegoaldeko koalizio soberanistako koordinatzailea. Ezkerreko independentistek hauteskundetan sekulan baino emaitza hobeekin egiten dutela sartzea azpimarratu du Otegik, eta Mathilde Haryk herri gisa indarrak metatzearen eta jendea mobilizatzearen beharra. Agerraldian zehaztu dutenez, EH Bilduk bere konferentzia politikoa eginen du irailaren 21ean, eta EH Baik bere biltzar nazionala azaroaren 23an.