«Bi pauso aintzina, eta bat gibelera» egitearen sentsazioa du Seaskak. Hezkuntza ministerioak brebetako azalpen oro frantses hutsean ematea deliberatu zuen iragan astean, nahiz eta ikasleek euskaraz ihardukitzeko eskubidea izanen duten. Edouard Geffray eskola irakaskuntzako Frantziako zuzendari nagusiak argudiatu duenez «seguritatea eta zuzentasuna» bermatzeko hartu dute erabaki hori. Joan den urtean galderak euskaraz ukan zituzten ikasleek, ez ordea oinarrizko testuak. Seaskak, ikasleen «hizkuntza eskubideak» berriz ere urratuak izanen direla salatu du
Sarako Eskutik kooperatibak pilotazale gazteenei egokituriko xistera sortu du. Iparraldeko Pilota Batzordearekin elkarlanean egin dute tresna pedagogiko berria, Euskal Hirigune Elkargoko diru laguntzarekin. Aztia ingeniaritza zentroak eta Mauleko Elkar zurgintza enpresak ere parte hartu dute xistera ttipi horren diseinuan. Francis Karrikartek azaltzen duenez «sorkuntza lan luzea izan bada ere, egiazko xisteraren ezaugarriak errespetatu dituzte». Larruz eta gaztainondo xafla batez egin dute, zumezko edo mihimenezko xistera baino azkarrago izan dadin, haurrek ez hausteko gisan. Eguberritarako opari ona izan daitekeela uste dute sortzaileek, eta jada eskutik.eus atarian salgai eman dute 160 eurotan.
Pertsona elbarrituen errealitateaz kontzientziatzeko hilabetea izan da azaroa. Abenduaren 3an euskararena ez ezik, Elbarrituen Nazioarteko Eguna ospatu zen ere bai. Sentsibilizazio beharra bada bi gaietan, eta horren kari Handi'gnite egitasmoa garatu dute Baionan, hamaika ikusgarri, erakusketa eta mintzaldirekin. Laster ere Telethon ekimena abiatuko da, urtero bezala, eritasun genetikoak jasaten dituzten pertsonei laguntzeko xedez. Lapurdin, Miarritzeko 'Argia' zentroa da elbarrituak laguntzeko den gune nagusietariko bat. Zentroan 30 paziente laguntzen dituzte eguneroko bizian ahal bezain autonomo izan daitezen. Uxue Guimon Argia zentroko monitore hezitzailearen arabera «gehienek gizartean normaltasunez bizi nahi dute, apartamentu, bikotekide eta lan batekin». Horretarako, «paziente bakoitzaren beharretara egokitzea ezinbestekoa da».
‘2032 Kolektiboak’ joan den ostiralean aurkeztu dizkio adostu proposamenak herriko etxeari. Hauen artean : gazteriaren inplikazioa indartzea besten antolakuntzan, besten aplikazio bat plantan ematea edo ostalari nahiz sokorrien arteko koordinazio bat sortzea. Horrez gain, bozgoragailuen musika murriztuz musika biziari leku gehiago ematea ere proposatzen dute, baita pisa egite basatiaren kontra borrokatzea etazaborren bilketa hobetzea ere. Kolektibo horretan biltzen dira, besteak beste, Baiona Ttikiko ostalariak, Baionako UMIH, Zizpa gaztetxea, peñak edota PAF talde feminista.
Ipar Euskal Herriko amateurren txapelketako finalak jokatuko dira igande honetan Iholdiko Hoxari trinketean. Lehen mailan, Denek Bateko Laffite-Harismendy eta Sarako Harotzarene-Elgart lehiatuko dira. Orain arte, partida oro irabazi dituzte Denek Batekoek, eta faborito gisa heldu dira finalera. Saratarrek aldiz ez dute honetan hastapen errez ukan, baina balentria egin dute egoerari itzulia eman eta finalera arribatzeko. Nolanahi ere, aurtengo txapelgoa berezia izan dela azpimarratu dute gehienek. Izan ere, aldi honetan bederatzi pilotari gutxiago izan dira, zazpik berezkoetara jauzi egin baitute, eta beste bi mailaz jautsi baitira. Horrek, bistan dena, maila apaltzea eragin du. Ekaina honetan ere Esku Pilotak, pilota profesionalaren elkarteak, hamabi pilotari gazte bere gain hartu zituen, eta plaza libreko txapelgoa bertan behera gelditu behar izan zen. Anitzek ez zuten begi onez hartu Esku Pilotaren egiteko manera horiek. Hori dela eta audita edo kontu-ikuskatze bat abiatu dute Iparraldeko pilota munduko eragileek; horien artean, FFPBak, Pilota batzordeak eta Esku Pilotak. Jada bi bilkura egin dituzte, eta urtarrilean, hartu eman horien bilana eginen dute.
