Baionako karrikako arteen festibala urriaren 16tik 20ra ospatuko da. Lapurdiko hiriburuaren horma, zubi eta eskaileretan, eta bi aste lehenago, Ipar Euskal Herri barnealdeko bi herritara hedatuko da, Sohütara eta Ahurtira. Aurten, antolatzaileek, hamahiru artistei zuri eta beltzez lan egitea proposatu diete. San Izpiritu Zubian, Didam museoan edo Pausa guneko murruetan kokatuko dira obrak. Barnealdean, aldiz, Sohütako Ikastolaren hormetan lanean ariko da LadyBug artista, inklusioa eta parekotasuna gaien inguruko obra bat tindatzeko.

Euskal Herriko azken 50 hamarkadetako historia soziopolitikoa eta kulturala ezagutzeko erreferente da Lazkaoko Beneditarren dokumentazio funtsa. Funtsak orotariko afixa eta pegatinez gain, euskal mugimendu politikoei edota euskal gaiei buruzko ehunka artxibo gordetzen ditu. Juan Jose Agirre Begiristainek sortu zuen, Beneditarren Monasterioko liburuzaina zelarik. Fundazioan laurogeitik goiti bilduma dokumental daude, politikoak, lan munduarekin lotura dutenak, gizarte alorrekoak edota kulturalak. Bertan eskuorriak, barne dokumentazioa, prentsa zatiak edota agiriak atzeman daitezke. Gutxienez, 22.000 afixa eta 25.000 otokolanta gordetzen dituztela neurtzen dute. Miren Barandiaran fundazioko langileak azaldu digunez, azken hamarkadetako «kontakizun ofizialetik at» gelditu den eta «galtzeko lanjerrean» zen historiaren parte hori biltzen entseatu dira, ikerlariek helduleku material bat ukan dezaten beren ikerketen ontzeko.

Lehen edizioaren arrakastaren ondotik, Emeki festibala berriz heldu da bere bigarren edizioa ospatzera asteburu honetan. Urruñako herriko etxeak antolaturik, bi eguneko festibala emazteei dedikatua da, eta Euskal Herriko nahiz nazioarteko artista ainitzen talentua agerian ezartzeko xedea du. Musika estilo guztietako programazio anitza eskainiko da. Berrikuntza batekin aurten: dantza ere ohoretan ezarria izanen da Donibane-Lohitzuneko Begiraleak taldeko neskekin. Festibala arratsaldeko 16:00tan hasiko da larunbatean, urririk.

Baionako ospitaleko langileek petizio bat abiatu dute interneten aparkaleku eskasa salatzeko eta irtenbide bat aurkitzeko. Langileek azpimarratu dutenez, batzuetan ordu bat lehenago abiatu behar dute leku bat aurkitzeko, usaian langileentzat erreserbaturik duten aparkalekua biziki azkar betetzen baita. Langileek azpimarratzen dute horrek eragina duela bai ordutegietan, bai lanaren kalitatean ere. Segurtasunaren argumentua ere aipatu dute, autora bidean, zenbait langile erasotuak izan baitira.

«Segurtasun gehiago, inmigrazio gutxiago». Bruno Retailleau barne ministro frantsesa argi mintzatu da, kargua hartu berritan. Etorkinen gaineko kontrola azkartu nahi du Michel Barnier lehen ministro eskuindar-kontserbadorearen gobernuak, eta jada Retailleauk aitzinatu duenez, «kanporaketa gehiago, eta erregularizazio gutxiago» egiteko xedea du. Anitzetan, ultraeskuinaren posizioekin bat egin duen ministroaren hitzek «izua» eragin dute etorkinen eskubideen alde lan egiten duten elkarteengan, baita ezkerreko eragile politikoengan. Horien artean, Ipar Euskal Herriko Etorkinekin Diakitéko Amaia Fontang kideak, elkarteak duen arrangura adierazi du. Testuinguru honen erdian, Mugarik Gabe topaketak antolatu dituzte irailaren 24tik 28ra, eta urriaren 3tik 5era iraganen direnak Baionan, Larzabalen, Donapaleun eta Uztaritzen.

Mauleko eta Atharratzeko osasun etxeak estreinatu dituzte asteazken honetan. Xiberoako hiriburuan mediku, erizain eta espezialista polo berria izanen da, baita dentista kabinete bat ere. Atharratzeko egoitzan, aldiz, lau mediku eta bi erizain izanen dira. Mauleko osagarri-etxeko lanek 2,3 milioi euroko kostua izan dute eta Atharratzekoarenak 700.000 euro. Bi proiektuek Akitania Berriko eskualdearen eta Europar Batasunaren bultzada ekonomikoa jaso dute. Orotara, 340.000 eurokoa izan da eskualdearen laguntza, eta 420.000 eurokoa Europakoa.

Ikasturtea abiatu da jada eskola orotan, baita Luzaide eta Arnegiko eskola berezian ere. 2016an elkartu ziren garaian Garazi inguruko haur guziak Garazin eskolatzeko xedea zelako. Ikasleek gaztelania, frantsesa eta euskara lantzen eta ikasten dituzte, eta bi estatuetako hezkuntza modeloak uztartzen dituzte. Arnegiko eskolan, lehen, bigarren eta hirugarren mailak iragaten dira, eta Luzaiden ama-eskola eta laugarren, bosgarren eta seigarren mailak. Beste eskolekin trukaketak egiten dituzte ere, izan Nafarroakoekin zein Iparraldekoekin. Buruilaren 2tik 6arte Luzaide eta Arnegiko ikasleak Parisera joan ziren Joko Paraolinpikoen kari. 

Xare Euskarazko Kultura Digitalaren Jardunaldia iragan da Baionan astearte goizean. Baionako eta Hondarribiko 242 ikaslek parte hartu dute ekitaldian. Ideia zen Informazioaren eta Komunikazioaren Teknologien munduan, euskararen sustatzea eta euskarazko kultura digitala ezagutaraztea. Ikasleek tailer desberdinak egin dituzte, hala nola, bideo joko eta errealitate birtualaren inguruko tailerrak edota teknologia berrien erabilpenari buruzko hitzaldiak. Lehen aldia zen holako ekitaldi bat antolatu dela Ipar Euskal Herrian.