Azaroan iraganen diren Amerikako Estatu Batuetako bozen emaitzek eragina ukanen dute mundu osoan. Buruz buru izanen dira, aldi honetan, alderdi errepublikanoko Donald Trump eta alderdi demokratako Kamala Harris. Berriki izendatu dituzte bi alderdiek beren hautagaiak ofizialki eta Euskal Telebistako Yerai Diaz kazetariak hurbiletik segitu du prozesua. Hark dioenez bi-biek dituzte aukera Etxe Zuriaren gidaritza eskuratzeko, inkestek lehia biziki estua handia iragartzen baitute.
10 urte bada, euskarak bere arnasgunea baduela Izturitzen. Artetxea kultur etxea sortu denetik, euskarazko jarduera ezberdinak eskaintzen zaizkie, gehien bat Arberoako biztanleei. Kantua, euskara kurtsoak, yoga, KEB komunikazio ez bortitza edota arte tailerrak, besteak beste. Ibarreko ekoizleen merkatua ere bada orain, ostiral arrats guziez. Lehengo eskola giristinoa aterpetzen zuen «patronaia» hutsari, funtzio berria eman zioten elkartekoek. Ospakizunak abiatuko dira ostiral honetan, agorrilaren 30ean, arratseko 7 orenetarik goiti: mutxikoak lehenik Arberoa txarangarekin, ondotik Tapia eta Leturia bikote mitikoaren kontzertua eta bururatzeko, dantzaldia Andoni Oillokiegirekin.
Ospitaleetako larrialdiak «tentsiopean». Azken urteetan larrialdietan langile eskasia badela salatu dute behin eta berriz osagarri langileek. Horrekin batera, hainbat ospitaletan larrialdi zerbitzuak hetsi dituzte zenbait aste edo hilabetez, eta horrek zerbitzuaren gainezka egoera areagotu du. Ipar Euskal Herrian, bereziki, udan egoera are larriagoa da, turismo uhinarekin batera Baionako ospitaleko langileak murrizten baitira. Arta ukaiteko itxaronaldi luzeek pazienteen egonezina azkartu dute, eta horrek egoera bortitzak sorrarazten dituzte. Baionako larrialdietan, adibidez, bi eraso zenbatu dira uda honetan.
Eguzki Urteaga soziologoarekin, Frantziako gobernuaren egoera barnatu dugu. Frantziako lehendakariak ez du oraindik lehen ministro berririk izendatu. Bigarren solasaldi ziklo bat abiatu du eta Ensemble bere alderdiaren inguruko koalizio gobernu baten osatzeko aukerak agortzen ari zaizkiola erran digu Eguzki Urteaga soziologoak, eta V. Errepublikaren «joko-arauak ez ditu errespetatzen ari» frantses presidenteak.
Bidasoa Mintzatuko Balitz proiektuarekin buru belarri lanean ari dira Axut antzerki konpainiako kideak. Antxeta Irratiarekin elkarlanean, Antzerki ibiltaria eskainiko dute dozena datatan irailean. Atzoko eta gaurko mugaren historia kontatzea da xedea. Izan ere, beste garai batzuetan euskaldunek, juduek, espainiarrek edota portugaldarrek ere trabeskatu behar izan zuten muga hori. Argazkilaritza eta soinuaren bidezko ikusgarria izanen da, Gari Garaialde eta Xabier Erkiziaren parte hartzearekin. Emanaldia ibiltaria izanen da, hiru oren iraunen du eta 50 pertsonako talde bati zuzendua izanen da. horrenbestez, aitzinetik ezinbestekoa izanen da izena ematea. Lehen emanaldia buruilaren 14an izanen da.
Lan istripuak salatzeko eta saihesten saiatzeko protokolo bat aurkeztu dute LAB, CGT, Solidaires eta FSU sindikatuek. Askotan isilduak diren gertakariak dira lan istripuak. Ipar Euskal Herrian, Mohamed Kichouhi garabi gidaria izan da lanean zendu den azken langilea, Baionan, 2022 urtean.
Udako bakantza garaia bururatzear da, eta laster heldu da ikasturte berria. Buruilaren 5ean abiatuko da, eta usaian bezala, ikasturte erabakigarria izanen da terminala abiatzen duten ikasleendako. Baxoaren urtea hasiko dute eta goi mailako ikasketak egin nahi dituzten horiek, hautuak egin eta hautagaitzak plazatu beharko dituzte. Baionako Aldazia orientazio eta formakuntza zentroko Helene Charritonek dioenez, «baitezpadakoa» da ikasturte hastapenetik erabakiak argitzen hastea, «bereziki atzerrian edo Hego Euskal Herrian edo atzerrian ikasi nahi dutenendako».
Usaian hektareaka bost tona gari biltzen dira Ipar Euskal Herrian, baina aurtengo uzta urriagoa izan da. Iragan larrazken eta neguko euriek zerealaren ereitea gibelatu zuten, eta horren ondorioz, uzta ez da iazkoa bezain oparoa izan. Haatik, baldintza zailak izanik ere, tokiko lehengaiekin Iparraldean ekoizten den Herriko ogiaren sailak uste baino uzta hobea ukan du. Aurtengo zerealaren kalitatea, gainera, aski ona dela erakutsi dute analisiek. Bildutako uzta, ordea, ez da aski izan Herriko kalitate-irizpideak segitu nahi duten bezero ororentzat. Eskaria asetzeko, beraz, Biarnoko gari-soroetako uztatik hornitu behar izan dira.
European Free Alliance edo Europako Aliantza libreak 19 herrialde ezberdinetako 40 bat alderdi biltzen dituen Europako taldea da. Autonomia, erabakitzeko eskubidea edo hizkuntza gutxituen gaia jorratzen dute herrialde ezberdinetan, hauetan euskal herrian. Preseski 2019tik, horren presidentea, euskalduna da Lorena Lopez de Lacalle. Eusko Alkartasuneko kidea da. Aste buru honetan parte hartu du Régions et Peuples Solidaires alderdiaren udako unibertsitateetan.
