Hendaia, Bordele eta Tolosa arteko abiadura handiko trenbidearen kontrako mobilizazioa izanen da urriaren 13an Bordelen. 'Larrialdiko balaztatzea' lemapean, hainbat elkarte bildu dira TGV Non Merci eta Lurraren Altxamenduak egin deialdi horren inguruan. Zentzu horretan, CADE ingurumenaren babeserako elkarteen kolektiboak bilkura publiko ezberdinak egin ditu Mugerren zein Baionan, gehienbat AHT proiektuaren finantzaketa aipatzeko. Kolektiboaren arabera, nahiz eta Euskal Hirigune Elkargoak gehiengoz kontra bozkatu zuen, abiadura handiko trena pasako den hirietan gutxienez 20 euroko zerga emendaketa izanen dute herritarrek 30 urtez. ordaindu beharko litzateke pertsonako, 30 urtez. Injustizia fiskala CADEn erranetan.

Ikasturte hastapeneko lehen mobilizazioaren segipenarekin kontent agertu dira CGT, Solidaires, FSU eta LAB sindikatuak. Greba eguna deitua zuten atzo, lansarien emendatzea eta zerbitzu publiko hobeak aldarrikatzeko. Duela urte bat indarrean den erretreten erreformaren kontrako mobilizazioen oihartzunak oraino entzuten dira. Duela aste bat, Frantziako lehen ministroa prest agertu zela erretiratzeko adina 64 urtera igan zuen erreforma «hobetzeko». Orokorki, hauteskunde legegileen ondotik, gobernu eskuindarraren izendatzeak ekarri ditu karrikara herritarrak.

Greba eguna deitu dute CGT, Solidaires, FSU eta hainbat gazte antolakundek frantses estatu osoan. Erretreten erreformaren ezeztatzea eta lansarien igaitea galdeginen dute, urriaren lehen honetan eginen diren 188 protesta ekintzetan. Ipar Euskal Herrian, Baionan eginen dute sindikatuek manifestaldi nagusia, eta LAB sindikatuak ere bat egin du deialdiarekin. Ber egunean, gainera, Michel Barnier Frantziako lehen ministro berriak politika orokorreko adierazpena eginen du. LAB sindikatuko Argitxu Dufauk azaldu duenez, «zailtasunak» ukanik ere, elkarrekin mobilizatzeko adostasuna erdietsi dute beste sindikatuekin.

Integrazio Batzordeak arranguraturik hasi du ikasturtea. Iaz, Frantziako Hezkuntza Nazionalak ez zituenez behar ziren diru laguntzak eman, 40.000 euro bere gain hartu zituen Integrazio Batzordeak. Aurten, ber laguntza zama mantendu du administrazioak, behar berriek sorrarazi kostuak kontutan hartu gabe. Ondorioz, 180.000 euro gehituko dira aurten Integrazio Batzordearen bizkar gainera. Bestalde, AESH langileen kontratu desegokiak salatzen dituzte. Asteko kontratua 23,5 orenekoa izanki, abantzu ezinezkoa da beharra duten ikasleez okupatzeko.

6,1 milioi turistek bisitatu dute Ipar Euskal Herria urte hastapenetik. Azken zortzi hilabete hauetan, iaz baino %2 bisitari gutxiago zenbatu dira, bereziki, Lapurdiko kostaldean. Turista gehienek gau bakarra iragaten dute gure artean, eta Baionako besta garaian da jende kopuru handiena hurbildu. Agorrilean 3,5 milioi bisitari ukan ditugu eta maiatzean abantzu bi milioi. Daniel Oltzomendi, Euskal Elkargoko turismo arloko presidenteordearen ustez, agorrileko lehen hamabostaldiaren salbuespenarekin, turismoak ez du tokiko populakuntza trabatzen.

HIESA, hepatitisa edota sexu bidezko infekzioak detektatzeko eta diagnostikatzeko zetro berria ireki dute Donapaleun. Buruilean ireki ditu ateak Amikuzeko CEGIDD egitura berriak, eta asteartero izanen da zabalik. Detektatzeaz harago, prebentzio lana egitea du xede. Horretarako informazioa eskaini eta kontzientziazioan sakontzeko lana eginen du. Zerbitzu guztiak urririk eskaintzen ditu, eta erabat anonimoa da.

Aldak etxebizitza baten alokairuaren igoera ilegala salatu zuen atzo Lehuntzen, herriko auzapezaren sostenguarekin. Alokairua behar litzatekeena baino 111 euro gehiago kostatzea salatu dute. Aldak jasotako informazioen arabera, alokairua 840 eurotik 980 eurora pasa da urtebetez, %16 igo da. Lehuntzeko auzapezarekin batera, Euskal Hirigune Elkargoak botere gehiago izan dezan eskatzen du Aldak. Elkargoak onartutako etxebizitza turistikoen alokairuen mugatzeko neurria etxebizitza guztietara zabaltzea nahi dute.

Baionako karrikako arteen festibala urriaren 16tik 20ra ospatuko da. Lapurdiko hiriburuaren horma, zubi eta eskaileretan, eta bi aste lehenago, Ipar Euskal Herri barnealdeko bi herritara hedatuko da, Sohütara eta Ahurtira. Aurten, antolatzaileek, hamahiru artistei zuri eta beltzez lan egitea proposatu diete. San Izpiritu Zubian, Didam museoan edo Pausa guneko murruetan kokatuko dira obrak. Barnealdean, aldiz, Sohütako Ikastolaren hormetan lanean ariko da LadyBug artista, inklusioa eta parekotasuna gaien inguruko obra bat tindatzeko.

Euskal Herriko azken 50 hamarkadetako historia soziopolitikoa eta kulturala ezagutzeko erreferente da Lazkaoko Beneditarren dokumentazio funtsa. Funtsak orotariko afixa eta pegatinez gain, euskal mugimendu politikoei edota euskal gaiei buruzko ehunka artxibo gordetzen ditu. Juan Jose Agirre Begiristainek sortu zuen, Beneditarren Monasterioko liburuzaina zelarik. Fundazioan laurogeitik goiti bilduma dokumental daude, politikoak, lan munduarekin lotura dutenak, gizarte alorrekoak edota kulturalak. Bertan eskuorriak, barne dokumentazioa, prentsa zatiak edota agiriak atzeman daitezke. Gutxienez, 22.000 afixa eta 25.000 otokolanta gordetzen dituztela neurtzen dute. Miren Barandiaran fundazioko langileak azaldu digunez, azken hamarkadetako «kontakizun ofizialetik at» gelditu den eta «galtzeko lanjerrean» zen historiaren parte hori biltzen entseatu dira, ikerlariek helduleku material bat ukan dezaten beren ikerketen ontzeko.