Mende batean, Baionako Euskal Museoak izan duen bilakaeraz erakusketa berezi bat sortu dute. Argazki, tindu edo objektuak ikusgai dira. 1924an William Boissel Bordaleko militarrakbultzatu zuen museoaren sorrera, «euskal herri tradizionalaren» ondarea babesteko xedearekin. Hura izan zen Euskal Museoko lehen zuzendaria, eta ondotik Jean Ithurriague edota Jean Haritxelarrek hartu zuten bere lekua. Mendeurreneko erakusteko urtarrilera arte izanen da ikusgai, eta bisita gidatuak euskaraz hilabetean behin egiten ahalko dira, urritik urtarrilera.

Osasun artak biltzen ari da Pablo Gonzalez Moskun une honetan. Joan den astean, Poloniako Radomgo segurtasun handiko espetxetik atera zen kazetaria bi urte eta bost hilabeteko preso egon ondoan. Poloniak leporatzen zion espioitza frogatu gabe libre atera da. Kazetariak Euskal Herrira itzuli nahi duela adierazi dio bere sendiari, baina Oihana Goiriena bere bikotekideak azaldu duenez, oraindik ez du berreskuratu bere espainiar pasaportea, eta ondorioz, ezin da Bizkaira itzuli.

Udatiar guttiago zenbatu dura uztailean Iparraldean. Departamenduko Turismo Agentziak egunean 200.000 bisitari zenbatu ditu, usaian 240.000 direlarik. Turista guttiago bai, baina aberatsagoak ere bai. Aldiz, zuhurtziarekin hartu beharreko zenbakiak dira, sasoia ez baita oraino bururatu. Hoteletan, oro har, %6 apaldu dira erreserbak eta Lapurdiko kostaldean %5 murriztu da bisitari kopurua. Barnealdean, kontrara, %5 emendatu da turismoa, eta %3 Aldude ibarrean adibidez. Lehen estimazio hau telefono mugikorretako datuen bilketari esker egin da, eta agentziaren arabera jende jarioa orekatuagoa izan da lurralde mailan eta ez da kostaldean hainbeste kontzentratu. Agorrilari begira, erreserbak %8 apalago izanen dira kostaldean iragan urteko sasoi oparoari alderatuz; barnealdean, aldiz, Donibane Garazin erraterako %12 erreserba gehiago aitzinikusi dituzte.

3000 festibalari bildu ditu Festilasaien 18.edizioak. Lerra kirola, karrikako artea eta musika biltzen dituen Miarritzeko hitzorduak arrakasta izan du, «aitzinikusi baino gehiago» antolatzaileen arabera. Tracy de Sa, Gérard Baste raplaria edo Rüdiger iragan dira oholtza gainean. Ingurumenaren zaintza eta euskara izan dituzte ildo nagusi aurten, Miarritzeko Mizanbu gaztetxeko kide guziek euskara kurtsoak segitu baitituzte aurten lehen aldiz. Edizio hoentan ere 70 laguntzaileren bultzadari esker eraman dute aitzina Festilasai.

Aro txarrak, inflazioak edota Olinpiar jokoen eragina ote? Turismoak %5 egin du beheiti Lapurdi, Baxe Nafarroa eta Zuberoan uztaileko hilabetean. Departamenduko turismo agentziak argitaratu zenbakien arabera 200.000 bisitari izan dira egunean bataz beste, lurralde osoan. Iaz, ordea, 240.000 izan ziren. Daniel Oltzomendi Elkargoko turismo jasangarriaren presidente ordearen arabera uztaileko datuek «ez dute anitz erraten udako turismo sasoiari buruz», eta uda bukaerako datuak goaitatu beharko dira.

Oztibarre, Iholdi, Amikuze eta Hazparne hunkitu ditu berriz ere behien eritasun hemorragiko epizootikoak. Eritasuna ulitxa batek hedatzen du, eta iragan urtean azkarki kolpatu zituen Ipar Euskal Herriko behi hazkuntzak. Kabalen heriotzek eta artatze gastuek galera are handiagoak sorrarazi zizkien jada idortearengatik ahulduriko etxaldeei. Oraino eritasunari buru egiteko txertorik ez bada ere, marexalen arabera aurten ez da iaz bezain egoera larria izanen, behien immunitatea azkartu delako. Haatik, ez da eritasun hau arrangura pizten duen bakarra. Izan ere, mihi-urdinaren eritasuna Belgikatik Euskal Herrira hedatzeko mehatxua ere baita. Azken horrek behi, ardi eta ahuntzei eragiten die, eta txertoa batekin buru egiten ahal zaio.

Bi urte pasa dira Errusiaren eta Ukrainaren arteko gerla abiatu zenetik. Beste elkarte eta gobernuz kanpoko erakunde anitz bezala, Misja Medyczna Fundazioak Ukrainari laguntza ekartzen dio ekonomikoki eta materialki. Profesionalen eta partikularren erremedioak eta bestelako puskak biltzen ditu gerlan den herrialde horretara garraiatzeko.

Uztaila osoan barna Euskal Herria trabeskatu duen espedizioa bururatu da jada. Euskal lurraldeko eta diasporako 160 gaztek parte hartu dute aurtengo edizioan, Atharratzetik Getxora. Herrialde desberdinetako gazte euskaldunen arteko harremanak azkartzea eta muga administratiboak sorrarazten dituzten «muga kulturalak» gainditzea ukan dute xede berriz ere.

Agorril osoan iraganen da aurten ere Donostiako musika hamabostaldia. 85. edizioa izanen da aurtengoa eta nahiz eta hitzordu gehienak Donostian diren Gipuzkoako beste herri batzuetara ere hedatuko dira, baita Lapurdira ere. Federico Garcia Lorca idazlearen figura goraipatuko dute emanaldi berezi batzuetan, horietarik bat Senpereko Larreko gelan izanen da. Sartzeak erosten ahal dituzue quincenamusical.eus webgunean.