Gazte belaunaldiek jasaten dituzten adikzioek goiti egin dute nabarmen, COVID19 eritasunaren pandemiaren ondoko garaian. Kirol joko parioak, drogak, alkohola edo beste izan daitezke. Horri buru egiteko Donapaleun adar bat sortu zuen BIZIA elkarteak. Berrogei langile inguru dira, mediku, psikologo, erizain eta prebentzio lanetan ari diren langileak tartean. Ostegunero elkartzen dira Amikuzeko egoitzan, eta gazteei laguntza eskaintzeko 05 59 44 31 00 telefono linea ireki dute.
Dantza garaikidearen eta tradizionalaren uztarketa ardatz harturik, ikusgarri bateratua eskainiko dute Kukai eta Bilaka konpainiek, igande honetan, Baionako Lauga aretoan. 2015ean sortu zen Bilaka kolektiboa Baionan, eta duela hogei urte Kukai Jon Maya koreografoaren eskutik. Errenteriako konpainia horrek berriki hitzarmena sinatu du Malandain Ballet Biarritz konpainiarekin, mugaz gaindiko lankidetza indartzeko nahian. Baionako Lauga aretoan, Bilakako zortzi dantzari eta Kukai konpainiako sei iganen dira oholtza gainera. Ikusgarria, dantzaldi ireki batekin bururatuko da.
Laborariak karrikara atera dira Europa osoan, bizi eta lan baldintza hobeak aldarrikatzeko. Mobilizazioek eragin duten krisi politikoari, pestizidak apaltzeko planaren gibelatzearekin iharduki dio Europako Batzordeak. Laborari sindikatu kontserbadoreenek Agenda 2030 planaren barneko neurriak ezarri dituzte jo puntuan, etxaldeen produktibitatea trabatzen eta laborarien egoera okertzen dutelakoan. Neurri horien artean dira, besteak beste, lurren %4 lugorrian atxikitzea, hazkuntzetako CO2 isuriak murriztea edota 2023erako pestiziden baliapena erdira murriztea. EELV Europa Ekologia-Berdeak alderdiko Alice Leiziagezahar mobilizazioen alde agertu da, baina haren ustez Europako Batzordearen arrapostua «egiten ahal zen errazena» dela, eta «ez duela laborarien bizitza egiazki hobetuko» uste du.
Azterketak tokiko hizkuntzetan egiteko aldarria entzun da gaur Frantziako hiriburuan. Euskal Herria, Korsika, Okzitania, Alsazia eta Bretainiako lizeoetako ikasle talde bat Frantziako diputatu multzo batekin bilduko dira asteazken honetan, Pariseko legebiltzarrean. Konstituzioko bigarren artikulua aldatzea galdeginen diete, azterketak tokiko hizkuntzetan egin ahal izatea, legez, eskubidea izan dadin. Ipar Euskal Herritik hogei ikasleko ordezkaritza bat mugitu da Parisera, horien artean, Baionako Bernart Etxepare lizeoko eta Larzabaleko Manex Erdozaintzi-Etxart kolegioko ikasle eta irakasle batzuk, baita Seaskako eta Euskal Konfederazioko ordezkariak ere.
Geldialdietako bakantza egunak berreskuratu, Europako legedia ezarriz. Europar Batasunaren arabera, langile orok bi opor egun eta erdi eskuratu behar lituzke hilabetean, lan geldialdian izanik ere. Alta, neurri hori ez da azken bi hamarkadetan errespetatua izan frantses Estatuan, Kasazio auzitegiak ebatzi zuenez. Horren kari, hogei urtez «ebatsiak» izan diren opor egunak berreskuratzeko aukera galdegin du LAB sindikatuak. Egoera horretan diren langileak batzeko deia luzatu du, desmartxa kolektibo bat abiatzeko xedez.
Etorkinen eskubideen aldeko elkarretaratzeak, Tarajaleko sarraskiaren hamargarren urtemugan. Frantziako gobernuak bultzatu duen Immigrazio legea gaitzetsi dute, behin ere, hamarnaka herritarrek. Hendaia eta Donapaleun elkarretaratzeak antolatu dituzte, eta Espainiako Guardia Zibilak 2014ean Ceutako mugan hil zituen hamar etorkinak gogoratu dituzte, baita, 2021ean Bidasoa ibaia trabeskatu nahian zendu diren bederatzi etorkinen memoria aldarrikatu ere.
Elkarrizketari bideak ireki dizkio FDSEA sindikatuak. Hainbat egunez luzatu den mobilizazio aldi azkarrak, esperotako fruituak eman ditu sindikatu frantses kontserbadorearentzako. Departamentu mailan, Julien Charles prefetarekin bildu dira astelehen honetan, frantses gobernuak hitzeman dituen neurriak aipatzeko. Bereziki, laborantzako erregaiaren gaineko zergen apaltzea, NPB Europako diru laguntzen berehalako isurketa, kabalen eritasun hemorragikoaren gastuei buru egiteko kalte ordainak eta Egalim legearen ezarpena landu dituzte. Hemendik aitzina abantsu egunero izanen dituzte harremanak prefetarekin, eta neurriak aplikatu daitezen presioa egiten segituko dutela ohartarazi dute.
Hamabi urte eta hiru kargualdiren ondotik, Jean Mixel Garayarrek Iparraldeko Pilota Batzordeko lehendakari kargua utziko du. Berriki egin dute biltzar nagusia Hendaian, eta bilan baikorra egin dute. Orotara, 6.000 lizentziadun ditu egun pilota batzordeak, eta azken hiru urteetan, 780 izen berri gehitu zaizkie. Heldu diren urteetan, elkartea garatzen segitzea, usaiako jokoak hedatzea eta jokaleku berriak sortzea dute xede. Heldu den buruilaren 14an aurkeztuko dute zuzendaritza talde berria, baita lantaldeetan arituko diren pertsonen zerrenda ere. Arraberritze aldi horren bidez, herrietako pilota batasunetatik heldu belaunaldi berriko kideak sartuko dira antolakuntzan.
Ez dute erantzun baikorrik ukan ELB sindikatuko laborariek. NPB Laborantza Politika Bateratuaren diru laguntzen beranta salatu dute astelehen honetan, DDTM Lurraldearen eta Itsasoaren Departamendu Zuzendaritzak Baionan duen egoitza okupatuz. Goiz osoa bertan iragan ondotik, arratsalde hastapenean egoitzako kadira oro kanpora atera dituzte eta argindarra moztu dute. Garazi-Baigorriko eremuan, 515 laborariri zor zaio diru laguntza hori, batez beste, 15.000 euroen heinera iristen dena. Estatuko zerbitzuek martxoaren 15erako isuriko dutela azaldu duten arren, laborari anitzek, jadanik, zailtasunak ukaiten ari dituzte etxaldearen gastuei buru egiteko. Departamentuko prefeturak ELBren ekintza gaitzetsi du, eta sindikatuak «elkarrizketari uko egin izana» deitoratu du.
