Irungo Hiriko Bandaren doinupean, espainiar agintetik frantsesera iragan da asteazken honetan Konpantzia edo Faisan uhartea. Sei hilabetero egiten da aldaketa 1901e urtetik. Uhartearen kudeaketa Pauline Potierren esku izanen da; azaldu duenez, lur horren balio sinbolikoaz gain, uraren kudeaketa ere hartzen du akordioak barnean. Heldu diren sei hilabeteetan, Hendaiako herriko etxeak zaindu beharko du beraz uhartea.
Urteko hitzordu handia aitzina doa Garruzen. Asteazken goizean abiatu da feria zaldi eta behorrekin. Osteguna, aldiz, behien eguna izaten da urtero. Zaldien egunean toki guzietako jendea ibiltzen da eta Garruzeko herritarrek programa aberatsa antolatu dute.
Pantxix Bidart, literatura sorkuntza egonaldian izanen da udazken honetan. Hilabete bana pasako du Hendaiako Nekatoenea baserrian, eta Pasai Donibaneko Hugoenea etxean. Euskal Kultur Erakundeak, Euskal Idazleen Elkarteak eta CPIE Euskal Itsasbazterrak bultzaturik. Hazparneko musika egilearentzat, aspalditik buruan duen istorio bat gauzatzeko parada izanen da. Bere lehen lana fikziozkoa izanen da eta gazte irakurleei zuzendua izanen da. Kontakizuna 60 hamarkadan kokatuko da, Hazparne herrian.
Xerar Urrutia idazle, kantagile eta abeslari Urruñarrak olerki liburu berria argitaratzear da: “Barneko Galderak”. Maiatz argitaletxearen eskutik plazaratuko duen lan berri hori bere bizipenetan oinarritzen da, eta ehundik gora olerki bildu ditu. Olerkiak metrikaz eta errimaz osatuak dira, eta askotan, koblak eta errepika eta doinua ere badute. Liburua ofizialki abenduaren lehenean aurkeztuko du Urruñako Loraldiberri liburu eta diska azokan, baita Durangoko Azokan ere.
Uztapide eta Xalbador bertsolari handiak biziki adiskideak izan ziren eta historia markatu zuten. Bat Zestoakoa, bestea Urepelekoa eta orain bi herriak ahaidetuak dira. Hori dela eta, “Uztapide eta Xalbador bi adiskide mugaz gaindi” liburu argitaratu berri du Pako Aristi idazle eta kazetariak, Xabier Amuriza bertsulariaren aitzinsolasarekin. Liburua Urepelen aurkeztuko dute uztailaren 31an.
Besteak beste Euskal Kultur Erakundeak, Atabal aretoak edota Azpeitiako Dinamo guneak antolatu deialdia da. Iaz Ekhi Lambert izan zen, aurten Lapurdiko lau raplariek aukera izanen dute Azpeitiko sormen gunean egoteko urrian, eta ondotik Atabal gelan kontzertua eskaintzeko. Helburua da Iparraldeko musikariei haien zuzeneko kontzertuak lantzeko egonaldi bat proposatzeko. Urriaren 26tik 29ra iraganen da RTZ kolektiboarentzat. Heldu den urteko deialdia 2025ko udaberrian hedatuko dute.
Naroa Anabitarte Euskal Herriko Unibertsitateko Psikologia fakultateko ikerleak liburua karrikaratu berri du Renoko Unibertsitatean, ingelesez: "Zer den (esaten) eta zer ez. Begiratu labur bat euskararen ideologiari". Proposamen berri bat plazaratzen du: hizkuntzen ikerketa soziolinguistikoa egin behar dela norbanakoa bereizi gabe bere testuinguru sozialetik. Eman dezagun, euskararekiko jendearen motibazioa edo jarrera konprenitzeko, beharrezkoa dela jende horren testuinguru soziala ikertzea. Funtsean, norbanakoak hartzen dituen deliberoetan baitu eragina testuinguruak.
Izenpedura bilketa bat sarean, kostako hondartzetan dutxen itzulera galdegiteko… 2022ko udan jasandako idortearen biharamunean, Euskal Hirigune Elkargoak erabaki zuen hondartzetako dutxak kentzea, uraren xahuketa apaltzeko. Geroztik ez dira berriz ezarri plantan dispositiboak, hala nola Miarritze, Getaria edota Hendaian. Guillaume Barucq Miarritzeko mediku eta hautetsia dutxen itzuleraren alde borrokan ari da bereziki uretako kutsaduren ondorioak saihesteko duten garrantziarengatik. Abantsu mila izenpedura bildu ditu jada dutxen aldeko petizioak eskaerak.
Nikolas Regerat Angeluko suhiltzaile kasernaren buruzagiak, erretreta hartuko du urrian. 1988an hasi zen suhiltzaile gisa, eta 2010etik Angeluko kasernako kapitaina izan da, 260 suhiltzaile kudeatuz 170.000 biztanle dituen eremuan. Suhiltzaile karreraz gain, munduko hainbat lurraldetan aritu da, Muga Gabeko Suhiltzaileekin eta bere Emanik elkartearekin. Hortaz, Perura itzuliko da laster bigarren aldiko Limako okindegi kooperatibo berri bat sustatzera.
