Zuzendaritza bulegoa berritu du Xiberoako Ikerzaleak elkarteak berriki. Bederatzi lehendakarikide izendatu dituzte, eta bost batzordetan berrantolatu dute elkartea: arkeologia, komunikazioa eta proiektuak, kanpo-harremanak, finantzak eta dokumentazio funtsak. Iazko «trantsizio» urtean liburu bakarra argitaratu badute ere, proiektu andana garatu dituztela azaldu du Robert Elizondo presidentekideak. Azken argitalpena 'Alemaniatik ihesaldi nola egin dütan' liburua izan da, eta laster Ospitalepeko sarekadaren inguruko lana emanen dute argitara, orain arte ezezagunak ziren dokumentu eta lekukotasunekin. Horrez gain, Xiberoako herriak bisitatzeko gida batzuen egitasmoa abiatua dela jakinarazi dute Ikerzaleak elkarteko kideek.

Euroeskualdeak POCTEFA 2021-2027 proiektu deialdia abiatu du. Eremu funtzional horren graparenaz eta bultzada koordinatzeaz arduratzen da. POCTEFA programa europarrak 14,8 milioi euroko funtsa ireki du Mendebaldeko Eremu Funtzionalaren eta Euroeskualdearen proiektu egituratzaileak finantzatzeko. Hiru ardatz nagusi hartu dira proiektu-deialdiarentzat: enplegua, mugikortasuna eta eleaniztasuna. Proiektu deialdia urriaren 23ra arte irekia izanen da, eta proiektuak 700.000 eurotik goitikoak izan behar dira.

Azken bi asteetan artzainak bortura igaiten hasi dira. Aurten, aroak eragin duenez bortuan, batzuk berantago abiatzekotan dira. Hala ere, Garaziko mendietan artzain franko badira. Mendiak betetzen hasiak dira, bai kabalez, bai artzainez. Udako sasoia hastera doa, baina aroa ez denez haien alde, artzain batzuek berantago igaiteko deliberoa hartu dute. Hala ere, bortu batzuetan, beti arrakasta bada. Garaziko mendietan adibidez, bi etxola salbu, beste guziak artzainez beteak dira. Garaziko mendi sindikatuak, hainbat obra hasi ditu bai artzainentzat, eta baita ibiltarientzat ere: uraren garraiatzea idortearen desmasien saihesteko, edota ibiltari eta turisten lekuetan egokitzapen batzuk.

Puntu bakar bati esker, Mauleko errugbi taldea Nazional 2 mailara iganen da. Igandean 21-8 galdu zuten xiberotarrek Isle Jourdainen kontra; haatik, finalerdiak jokatzen ahalko ditu etxeko partidan 20-6 nagusitu baitziren. Nazional 2 maila sortu zenetik ukan dute mauletarrek mailaz igaiteko parada, baina ez zuten onartu. Aldi honetan, aldiz, bai. Heldu den urtean nazional 2an ariko dira beraz mauletarrak, baina lehen hitzordua bi asteren buruan dute Orleansen, finalerdien kari.

Gure inguruan ditugun basa belar eta loreen ezagutzea balio duela erakutsi du Garbiñe Larrea naturopatak larunbatean Lartzabalen proposatu egun berezian. Goizean ibilbide botanikoa izan da, besteak beste plantaina, berbena, asuna, izpilikua edo intsusa nolakoa den eta non pusatzen den erakusteko. Eta arratsaldean landare horiekin ukendu, tisana, tinta edo ozpinak nola egin erakutsi du. Euskal Herrian diren landareez jakitate handia du Garbiñe Larreak eta horren transmititzea du helburu. “Sendabelarrek dakitena” arta liburuaren ondotik, ari da liburu berri bat lantzen, kosmetikarako diren landareak aurkeztuz.

Kanboko Marieniako higiezin proiektuaren kontra bildu dira elkarte eta herritarrak larunbat honetan. Larunbatean, mahai inguru eta tailerren bidez herritarrak sentsibilizatu nahi izan dituzte Bouygues Immobilier agentziaren proiektuaren desmasiez. CADE, ELB, Lurzaindia, Ostia eta Nahi Dugun Herria elkarteek adierazpen bateratua egin dute, proiektua gelditu arte borrokak segituko duela azpimarratuz, eta lurren okupazioa ez dutela baztertzen jakinarazi dute.

EAJ alderdiak Europar Legebiltzarreko bozetan aurkeztuko dituen hautagaiak batu ditu aste hondar honetan, Hendaia eta Irun arteko zubian. Ipar eta Hego Euskal Herriko hautagaiak bi zerrenda desberdinetan aurkeztuko dira. Iparraldean ekologista zentristen aliantzara batu dira jeltzaleak Yann Wehrling alsaziarra buruan eta Jean Telletxea zerrendako hirugarren postuan. Hegoaldean, EAJk bere zerrenda propioa defendatuko du Oihane Agirregoitia lehen lerroan. Ikerketen arabera aukera handiak ditu EAJk eurodiputatu bat erdiesteko.

Peio Etxeleku Errobiko lurraldeko erreferente eta animatzaile ohiaren kargugabetzeak eztabaida piztu du Euskal Hirigune Elkargoan. Sei auzapezek gutuna Iparraldeko EAJko buruaren jarrera salatu zuten, eta horretan oinarritu zen Jean René Etxegarai Elkargoko lehendakaria erabakia hartzeko. Orain, Errobi lurraldeko zenbait hautetsik delibero «idor eta errekurtsorik gabeko» horren kontra agertu dira gutun baten bidez. Horrez gain, Lurralde batzordeko hautetsien betebeharrak Elkargoko gobernantza itunean hobeki zehaztuak izan daitezela galdegin dute. Testu horren izenpetzaileen artean dira, besteak beste, Nicole Etxamendi, Françoise Gallois, Mikel Goienetxe, Argitxu Hiriart-Urruti, Erik Mailharrancin edota Mizel Hiribarren.

Citroën auto enpresak C3 eta DS3 modeloetako autoak gibelera hartu ditu, airbag arazo baten ondorioz. 2009 eta 2019 arteko auto modelo horietan airbagean den gasak indar gehiegi duela aitortu du markak. Horren ondorioz, jabeei gutunak bidali dizkiete galdeginez auto horiek ez baliatzea. Orotara 180.000 auto lirateke kasu horretan. Takata airbaga ekoizten duen markak, beste auto markak ekipatzen ditu ere, Volkswagen edo Toyota bezala, baina momentuz beste markek ez dute deus komunikatu.