Euskal Irratiak irrati sareko Eguberri Kantuz emankizunarentzat, Gure Irratiak artistak gomitatu ditu bere Diskotekan sartzera. Urtarrilaren 2an INDIGO bikotea hurbildu da, Eneko Lamothe eta Mathieu Bordenaven doinu goxoak deskubritzeko parada. Diskorik ez du atera oraindik bikoteak, bainan urtean zehar EP bat grabatu nahi lukete, eta kontzertuentzat bi edo hiru kidez handitu ere. Arantxa Idiederren gomitak izan dira Eneko Lamothe eta Mathieu Bordenave.
Otxalde taldea 1976an Beskoitzen sortu zen, egun 8 dira taldean. Maitexa Duhalde (kantuz), Cédric Destribats (eskusoinuan), Beñat Eyherabide (kantuz eta gitarran), Marc Eyherabide (kantuz, harmonikan eta flautan), Miren Eyherabide (kantuz, pianoan eta gitarran), Johana Irigoien (kantuz), Arnaud Gachen (perkusioetan) eta Rémi Castanet (teknikan). Kantu herrikoiak eta sorkuntzak, folk moldean musikatzen dituzte. Euskal musika, bai eta munduko folk musika giroan, taldeak kantatzen du herria, hizkuntza, lurra, haurtzaroa, anaitasuna, askatasuna, nostalgia, emigrazioa, amodioa... Bosgarren diskoa “Iturrien lilura” urte hundar huntan daukute aurkezten.
Gerla hotsak 2023an. Nazioartea inarrosi du Israelek Gazako zerrendan abiaturiko oldarraldi militarrak. Orotara 20.000 hildako palestinar zenbatu dituzte, horien erdia haurrak. Ane Irazabal euskal kazetaria Palestinan eta Egipton bizi izan da. Egun aldiz Alemanian bizi da eta Euskal Telebistako berriketaria da. Israelek eragin sarraskiaren aitzinean Alemanaiar gobernuak eta alderdiek erakutsitako jarrera amultsua gaitzetsten du nazioartean aditua den kazetariak.
Dominika Epherre, Jean Etxart, Jean Etxegoihen, Pierra Jaragoihen, Jean-Philippe Prat eta Beñat Queheille 1979an juntatu ziren Altzükütarrak taldea muntatzeko. Akapela, Gitarrarekin eta eskusoinuarekin, Xiberotar ohizko kantuak eta sorkuntzak dituzte ematen. Taldeak 5 disko grabatu ditu, berriki berrargitaratutakoak. Altzükütarrak, 1979an sortu zenetik, kontzertu franko ditu emanik, lehenik Xiberoan, baina haien famak Euskal Herriko leku anitzetarat jotzeko parada eman die, Kaledonia Berrian bezala. Eguberriko aste honetan, haien ibilbideko kantu zonbait eskaini dizkigute.
Iragan urteko aktualitatea markatu du euskalgintzak. Azken ikerketa soziolinguistikoek erakutsi dutenez, euskal hiztunen gainbehera absolutua geldiaraztea erdietsi bada ere, balore erlatiboetan errealitatea ezkorragoa da. Hori dela eta Euskal Konfederazioak argi utzi zuen, «euskara biziraun dezan 2050ean Iparraldeko herritarren %30a euskalduna izan beharko da». Gaur egun, hiztunen %19k daki euskaraz. Euskararen irakaskuntzaren alorrean Seaskak betetzen du funtzio garrantzitsuena Ipar Euskal Herrian. Zentzu horretan, hainbat auziri egin diete buru 2023an, hala nola, Senpereko lurren salmentaren auzia, Beskoitzeko ikastolaren baimen ukatzea edota azterketak euskaraz egiteko etengabeko erronka.
Kultur urte aberatsa izan da 2023a Iparraldean. Euskal Kultur Erakundeak 1.500 ekitaldi baino gehiago zenbatu ditu Ipar Euskal Herrian, eta 70 sorkuntza argitaratu dira. Gainera, irakurle taldeek antolatu hitzorduak azpimarratu daitezke. Bestalde hiru kabalkada izan dira Heletan, Luhuson eta Arrosan, Mehaineko Buhame Erreka 'kakolada' ere ahantzi gabe. EKEk 120 egitasmo lagundu ditu iaz, eta urte berrirako 170 eskaera jaso ditu jadanik.
Duela aste bat Biper sindikatak bere biltzar nagusia egin du. Urteko bilduma egin dute eta ondoko urteen lanak aipatu dituzte, horien artean sormarkaren araudiaren moldaketak. Antton Castoreo mintzatu da Panpi Olaizola Biper sindikatako lehendakariarekin.
MHE edo eritasun hemorragiko epizootikoa, behien eritasun hori lehen aldikotz sartu da Ipar Euskal Herrian aurten. Harridura eta kezka sortu du hazleen artean baina azkenean neguarekin epidemia lasaitu egin da. Antton Castoreo, Pierre Diharce behi hazlearekin eritasun hortaz berriz solastu du, urtearen bildumaren egiteko:
Xabi San Sebastian Donostiar kantautoreak eta musikariak Betazalak bere bosgarren diskoa urte hondar honetan argitaratzen du. Musika ikasketak Madrilen bukatu eta gero, Izotz taldean sartu zen eta geroztik Euskal Herriko tauletan gaindi ibili da. Lehen diskoa grabatu zuen 1995. urtean. Ondoren, musika tradizionalean murgildu nahian, Alboka taldean sartu zen eta Joxan Goikoetxea eta Alan Griffin-ekin elkarlanean aritu zen lau diskoetan baita kontzertu anitzetan munduan zehar ibili, besteak beste WOMAD edo Celtic Connection bezalako festibaletan. Eguberri kantuz saioan disko berriko eta bere ibilbideko kantu zonbait eskaini dizkigu.
