EH Bai europar hauteskundeetara aurkezten ez den arren, EH Bilduko zerrendaren zazpigarren lekuan joanen da Oier Imaz Iparraldeko koalizio abertzaleko kidea. Bigarren aldiz segidan, Pernando Barrenak zuzenduko du ezker subiranistaren zerrenda. Euskal Herriaren lurraldetasuna eta erabakitzeko eskubidea defendatu nahi dute, baita eskuin muturraren adierazpen elektoralari buru egin. EH Bilduren zerrendan espainiar estatuko beste hainbat alderdi subiranista ere aurkeztuko dira, ERC edo BNG bezala. Europako hauteskundeak ekainaren 9an iraganen dira.

Errugbiko ProD2 mailaren amildegi ertzean da Biarritz Olympique. Sailkapeneko azken-azken aitzinekoak dira 53 puntu eskasekin. Gibeletik ditu Montauban 50 punturekin eta Rouen 48 punturekin. Azken aitzinekoak barragea jokatuko dute Nationale mailako lehen taldearen kontra, eta azkena mailaz jautsiko da zuzenki. Hiru talde hauek partida jokatuko dute etxetik kanpo ostiral honetan. Mont de Marsanen ariko da Rouen, Montauban Aurillacen eta Miarritze Briven. Aurillacek ez du deus jokoan; haatik, Mont de Marsan eta Brivek bai. Beraz, xantza gehiago baluke kanpoan irabazteko Montaubanek. Miarritze ez da jautsieratik salbatua.

Euskaraz lanean ari diren hainbat eragilek eta elkartek lan eremu berri bat ukanen dute Baionan. Baiona ttipian da, San Andres plaza eta Patxa plaza artean, toki estrategiko batean. Lan egiteko “coworking” gune bat atzeman daiteke, bilkura gela bat eta sukalde bat. Plazara, Bada, Euskal Hedabideak, Euskal Konfederazioa, Biga Bai eta Topagunea atzeman daitezke lokal horretan momentuz. Gobernantza horizontala da eta hilabetean behin biltzen dira gunearen kudeaketaz mintzatzeko.

"Zubiak zeharka” lemapean, egun osoko egitaraua prestatu du maiatzaren 18an UEMA udalerri euskaldunen elkargoak. Herriko eragile guztiek hartu dute parte programaren prestaketan eta ekimen herrikoi eta partehartzailea izatea lortu dute horrela. Euskal Herriko 175 udalerri dira gaur egun euskaldunak, herrialdeko %70a hain zuzen ere. Horietatik 107 dira momentu honetan UEMAko kide, baina maiatzaren 18an lau kide berri sartuko dira elkargora: Zegama, Lakuntza , Bakaiku eta Ituren .

Nepalgo Kyanjin Ri mendiko kaskoan, burmuineko elbarritasun batekin. Hegoak Mendian kirol elkarteak joelette errotadun kadira batekin igan ditu 4.400 metroak. Bastien kirolari elbarri gaztearekin batera, kirol elkarteko 14 kidek bat egin dute abenturarekin. Maiatzaren 6an hartu zuten mendean Kyanjin Riren kaskoa, eta joan den igandean arribatu ziren Ipar Euskal Herrira. Helburua erdietsi dute, baina ez oztoporik gabe; izan ere, joelettaren errota zulatzea, mendiko mina... Nolanahi ere, esperientzia ezin hobea izan dela segurtatu dute mendizaleek.

Korrikak Euskaraldiari eman dio lekukoa. Euskaraldia 2025eko maiatzaren 15etik 25era iraganen da. Herritarren bultzadak urrats berri bat eman diezaien euskararen aldeko politikei. Euskalgintzaren kontseilua eta eragile nagusiak elkartu dira politika publiko indartsuak aldarrikatzeko. Toki sinboliko bat hautatu dute horretarako, Baionako herriko etxeko plaza, Korrika bukatu zen gunea. Idurre Eskisabel Euskalgintzaren Kontseiluko buruak zehaztu duenez «gizarte engaiamenduak, botere publikoen engaiamendua baitezpadakoa du». Euskararen normalizazioa, «justizia soziala» erdiesteko prozesua dela babestu dute, eta erronka horrek «inbertsio publiko handiak» behar dituela azpimarratu dute.

Nola ezar euskara, gal-bidean, ahal-bidean eta zabal-bidean? Galdera horri ihardukitzen entseatuko da Mattin Irigoien Zabalik elkarteko kidea, ostegun honetan eskainiko duen mintzaldian. EHZ elkarteak luzatu dio gomita gai horren jorratzeko. Besteak beste, hitzaldiak hezkuntzaren, historiaren, estatistiken, hizkuntza komunitatearen eta elebitasunaren gaiak trabeskatuko ditu.

Baionako auzitegiak 500 euroko isunera kondenatu ditu Ostia kolektiboko lau auzipetuak. 2022ko abenduan Angeluko Bouygues Immobilier agentziako bulegoa eta maketa bat andeatzeaz akusatuak ziren. Prokuradoreak, aldiz, 1000 euroko isuna galdegiten zuen ekintzako partaide bakoitzarentzat. Isunaz gain, abantzu 6.000 euroko kalte ordainak ordaindu beharko dizkiote auzipetuek Bouygues promotoreari, baita 800 euroko abokatu gastuak ere. Hatz markak eta DNA ez emateagatik aldiz errugabetuak izan dira; epaileak adierazi du militanteak eta pertsona ezagunak izanik ez dela arrazoirik DNA eskatzeko. Marieniako laborantza lurren defentsan, mobilizazio eguna ospatuko dute maiatzaren 25ean Kanbon.

5.000 euroko isuna gibelapenarekin eta beste 750 euro irainengatik eskatu ditu prokuradoreak André Hirigoien Makeako laborariarentzat. Urte hastapen honetan, Hazparneko herriko etxeko atea hautsi zuen eta Makeako auzapezaren kontrako tindaketak egin zituen, eraikitzeko baimen bat ez onartzeagatik. Auzapez ainitzez inguraturik hurbildu dira Isabelle Pargade eta Alain Dubois auzapezak epaitegira. Erabakia maiatzaren 28an jakinen da.