%100ean tokian ekoitzitako behikiaren astea antolatu du, hirugarrenez, Herriko Haragiak. 2013 urtean sortu zuten marka hori Ipar Euskal Herrian berean sortutako, hazitako, hildako eta tokian berean kontsumitua izateko ekoitzia den behi haragia balioan emateko, eta gaur egun, hirurehun hazlek osatzen dute. Izan ere, gure lurraldean behiki kontsumoaren %2 baizik ez da tokian ekoizten. Abenduaren 2tik 6ra, Herriko Haragiaren astea ospatuko dute, elkarteko hazleen produktuak ezagutarazteko. Horretarako, hainbat jatetxerekin partaidetzan, Herriko Haragia dastatzeko aukera izanen da astelehenean Ligiko Irrintzina jatetxean, asteartean Mauleko Euskaldunan, asteazkenean Baionako Nuancen, ostegunean Hazparneko La Maison de Pierren, ostiralean Donibane Lohizuneko Erroan eta larunbatean Donibane Lohizuneko Aux Pigeons Blancs jatetxean.

ELB sindikatua zurgin lanetan izan da Baionan. Zurezko zoladura bat eraiki dute suprefetura aitzinean, diru sartze minimoak aldarrikatzeko. Zoru prezioak=irabazi duinak zioen banderola bat eman duten dilindan suprefeturako hesian. Izan ere, ekintza sinboliko honetan, frantsesezko «prix plancher» hitz jokoarekin jolastu dira sindikatuko kideak. ELBk laborariei prezio minimo bat segurtatzea aldarrikatzen du, ekoizlea duinki ordaindua izan dadin. Jakin behar da laborarien %18, pobreziaren heinez petik ordainduak dela hilabetero. Prezio minimo horren gaia Marie Pochon diputatuaren lege proposamen bat da, legebiltzarrean bozkatua udaberrian. Haatik, laborantza ministroak gibelera bota du neurria berriki.

Camille Chopin argazkilariak Altxalili kolektiboko kideen inguruko erakusketa ezarri du Baionan, Atalante zine-gelan. Azaldu duenez, «etsi nahi ez duten eta beren nortasuna konpromisorik gabe bizitzea erabakitzen duten pertsonen erretratua» egin du. Ipar Euskal Herriko herri desberdinetako zortzi gazte dira protagonistak, euskal nortasunari uko egin gabe queer izatea aldarrikatzen dutenak. Pariseko La Pièce blanche galerian estreinatu zuen erakusketa Chopinek.

Sare sozialei buruzko gogoeta kritikoa eramaten ari dira hainbat hedabidek eta erabiltzailek. X sare sozialean egon edo ez? eztabaida ireki dute Berriak, Argiak edota Sud Ouest kazetak. Twitter zenaren bilakaerak arrangura pizten du, Donald Trumpen aldeko propaganda, ideia faxisten edo berri faltsuen hedatze kontrolgabea bultzatzen baitu, bereziki, Elon Munsk enpresariak duela bi urte erosi zuenetik. Egia da ere euskal komunitateak eta euskarazko hedabideek ainitz baliatzen duen sarea dela. 93.000 segitzaile dituen BERRIA egunkariak erabaki du X sarean egotea «euskaldunak informatzeko betebeharrari eusteko» xedez, eta Argia asteakaria oraino barne gogoeta egiten ari da.

Heldu da eguberriko opariak hautatzeko garaia. Azken urteetan anitz emendatu da internet bidezko salmenta, eta horrek tokiko merkataritzari kalte egin dio. Hori dela eta, Iparralde barnealdeko merkatariek kontzientziazio kanpaina abiatu dute Pays Basque au Cœur elkartearekin, herritarrek hurbileko saltegietan egin ditzan eguberriko erosketak. Azken urteetan, opari-txekeak argitaratu ditu elkarteak, enpresek haien langileei eskaintzeko.

Asisko Urmenetaren 'Ni ez naiz sorgina' dokumentala, bidean da. Sugarren Mende liburuaren ondotik dokumental baten egitea pentsatu du artistak ikusirik sorgin ehiza gaia beti aktualitatean dela eta euskal kulturan presente dela. Horretarako, aktore, nazioarteko eta Euskal Herriko aditu ezagunak, historialariak, herrietako ikerlariak eta musikari zenbaitzuk ere parte hartuko dute proiektu horretan. Artista oztibartarrak 2025 urtean estreinatu nahi luke lan berria. Anartean diru biltze kanpaina abiatu dute sarean, eta nieznaizsorgina.eus webgunean egin daitezke ekarpenak.

Lau egunez idekia izanen den merkatu bat antolatzen du Plazara kooperatibak euskararen aldeko beste hamar bat eragilerekin. Eguberriko merkatu solidario, etikoa eta euskaltzalea izanen dela iragarri dute. Hitzorduaren prestatzeko, Etxepare lizeoko merkataritza saileko ikasleen laguntza izan dute.

Xiberoako industria lantegien bisita egin dute seiehun ikasle inguruk, Industriaren Astearen kari. Gazteak industriaren mundura hurbiltzea eta lan-aukerei buruzko aitziniritziak gaindiaraztea helburu duen hitzordu hau, ODACE enpresabu xiberutarren elkarteak eta AZIA elkarteak antolatzen dute. Iragan asteartean, Spi Aero, Donquichosse eta Elkar enpresek, beren jarduera aurkeztu diete Manex Erdozaintzi Etxart, Argia  eta Atharratzeko kolegioko ikasleei, baita Sohütako lizeokoei ere. Enpresek beren lan-eremua eta industriaren balioa gazteei erakutsi nahi izan diete, sektoreari buruzko ikuspegi baikorragoa sustatzeko.

Baxe Nafarroko lehen Kopla Topelketa hartuko du Amenduzek, azaroan 30ean. Hamahiru bertsolarik hartuko dute parte: Xan Alkhat, Ramuntxo Christy, Battitt Crouspeyre, Gus Elizondo, Nahia Etxeberri-Lopepe, Elixabet Etxandi, Mizel Mateo, Peio Minhondo, Paul Moal-Darrigade, Jean-Marie Oillarburu, Pettan Prebende, Bittor Thikoipe eta Oier Urreizti. Topaketa eta txapelketa uztartzen dituenKoblaka arituko dira eta publikoak ditu txapeldunak hautatuko. Ekimen horren bidez, bertsolaritza bultzatu nahi dute Baxe Nafarroan, eta bertsolaritzara lotu berri diren gazteak oholtza gainera eraman.