Aurtengo gerezi sasoia gaizki hasia da. Aro heze, eguzki gutti eta harriak desmasi zonbait eragin ditu gereziondoetan. Itsasun bereziki hiru gerezi mota ekoizten dira, peloa hau da lehen mota biltzen dena, eta arrunt gutti agertu dira. Ondotik, oraindik goiti biltzen hasten dena xapata mota da eta aurre ikusten da ez dela ainitz izanen eta azkena beltxa deitzen da eta mota horren ekoizpenaren uzta kopurua oraindik ezin da aurreikusi. Etxe batzuetan 10-20 kilo inguru bildu izan dituzte, etxalde batean ehun kilo, jakinez sasoi on batean lortzen ahal dela 500 kilo et tona baten artean. Hala ere, Itsasuko Gerezi besta eginen da, Etxauriko ekoizleek soberakinean dituzten gereziak ekarriko baitituzte.

Farmaziek greba eguna dute ostegun honetan, Ipar Euskal Herrian eta Frantzia osoan. Sendagaien eskasiak sorrarazten duen egoera, laborategien hestea edota ordainsarien birbalorizazio falta salatzen dute. USPO farmazialarien sindikatuen batasunak azaldu duenez, Frantziako prezioak apalago izanki, hornitzaileek Europako beste herrialdeetan saltzea lehenesten dute; horrek, 5.000 sendagai erreferentziaren eskasa eragin du, 2014 urtean 400 baizik ez zirelarik. Sindikatuen arabera greba deialdia farmazialarien %90ak segituko du.

LAB sindikatuak enpresa ttipien hauteskundeetan parte hartzen ahalko du. Hala deliberatu du Parisko Auzitegi Judizialak. Haatik, Bretainiako SLB eta Korsikako STC sindikatuen hautagaitzak errefusatu ditu. Force Ouvrière sindikatuak hiru sindikatu independentista horien kontrako helegitea aurkeztu zuen arauak betetzen ez zituztelakoan. LABen kasuan, FO sindikatuak salatu zuen sindikatu abertzalea egiazki elkarte bat zela, eta ez zituela finantza arloko gardentasun irizpideak betetzen. Eñaut Aramendi, LAB sindikatuko koordinatzailearen arabera, «LABek dena behar den bezala egin du».

Pastorala, Maskarada, libertimendu edo kabalkada, plaza ikusgarriak zertan dira Ipar Euskal Herrian ? Gai mamitsu hori lantzen saiatuko dira bi egunez Euskal Kultur Erakundeak antolatzen duen kolokioan, Baionako Arte Eskolan. Kabalkadaren dinamika, Uztaritzeko kaskarotetan emazteen integratzea edo libertimenduaren hedatzea, izango dira jorratuko diren gaiak. Terexa Lekunberri EKEko etnologoak azaldu digunez «plaza ikusgarri hauen erronka geroan zein den aztertuko dugu kolokioan». Hitzordua Baionako Arte Eskolan iraganen da, eta ostegun arratsean hasiko da 18:30etan Elena Bertuzziren “Sous la jupe des filles” ('Nesken gonapean') filmarekin.

Dantzaren besta handia izanen da berriz ere Le Temps d’Aimer la Danse festibala. Irailean ospatuko da Miarritzen, eta horrez gain, 80 dantza ikusgarri proposatuko dituzte Ipar Euskal Herri osoko beste hamazazpi herritan. 41 dantza konpainia hurbilduko dira nazioartekoak eta tokikoak. Tokiko konpainietan Bilaka, Kukai edo Dantzaz ikusgai izango dira. Lehen aldiz Bardoze, Donibane Garazi eta Mauleko jai alaietan Metzeko balletak emango du ikusgarria. Irailaren 4tik 16ra iraganen da Le Temps d’Aimer la Danse festibala.

Laborantzaren Orientazio Legea bozkatu du Parisko legebiltzarrak. Maiatzean hamar egunez eztabaidatu ondotik, azkenean diputatuen gehiengoak baiezkoa bozkatu du, 272 alde eta 232 kontra. Puntu nagusietan dira, elikadura burujabetasunaren printzipioa baieztatzea, 2030erako 500.000 laborarien helburua finkatzea edo lur landatuen %21 biologikoan izan beharra, eta %10ak lekadunak izan beharko dute. Eztabaida piztu duen gaien artean «nahikeriaren» nozioa ingurumenari buruzko kalteen kasuan; laborari batek ingurumena kaltetu baldin badu baina frogatzen badu nahigabean zela, zigor arindu bat ukanen du.

Zuzendaritza bulegoa berritu du Xiberoako Ikerzaleak elkarteak berriki. Bederatzi lehendakarikide izendatu dituzte, eta bost batzordetan berrantolatu dute elkartea: arkeologia, komunikazioa eta proiektuak, kanpo-harremanak, finantzak eta dokumentazio funtsak. Iazko «trantsizio» urtean liburu bakarra argitaratu badute ere, proiektu andana garatu dituztela azaldu du Robert Elizondo presidentekideak. Azken argitalpena 'Alemaniatik ihesaldi nola egin dütan' liburua izan da, eta laster Ospitalepeko sarekadaren inguruko lana emanen dute argitara, orain arte ezezagunak ziren dokumentu eta lekukotasunekin. Horrez gain, Xiberoako herriak bisitatzeko gida batzuen egitasmoa abiatua dela jakinarazi dute Ikerzaleak elkarteko kideek.

Euroeskualdeak POCTEFA 2021-2027 proiektu deialdia abiatu du. Eremu funtzional horren graparenaz eta bultzada koordinatzeaz arduratzen da. POCTEFA programa europarrak 14,8 milioi euroko funtsa ireki du Mendebaldeko Eremu Funtzionalaren eta Euroeskualdearen proiektu egituratzaileak finantzatzeko. Hiru ardatz nagusi hartu dira proiektu-deialdiarentzat: enplegua, mugikortasuna eta eleaniztasuna. Proiektu deialdia urriaren 23ra arte irekia izanen da, eta proiektuak 700.000 eurotik goitikoak izan behar dira.

Azken bi asteetan artzainak bortura igaiten hasi dira. Aurten, aroak eragin duenez bortuan, batzuk berantago abiatzekotan dira. Hala ere, Garaziko mendietan artzain franko badira. Mendiak betetzen hasiak dira, bai kabalez, bai artzainez. Udako sasoia hastera doa, baina aroa ez denez haien alde, artzain batzuek berantago igaiteko deliberoa hartu dute. Hala ere, bortu batzuetan, beti arrakasta bada. Garaziko mendietan adibidez, bi etxola salbu, beste guziak artzainez beteak dira. Garaziko mendi sindikatuak, hainbat obra hasi ditu bai artzainentzat, eta baita ibiltarientzat ere: uraren garraiatzea idortearen desmasien saihesteko, edota ibiltari eta turisten lekuetan egokitzapen batzuk.