86 etxebizitza sozial berri izanen dira Hendaian hemendik bi urte inguru, Orio auzoan lehen harria eman berri dieten Itsas Talaia eta Orioko Etxeak promozioetan. Lehenak, 51 bizitza sozial eta 34 pribatu Izanen ditu. Bestean berriz 35 etxebizitza publiko izanen dira, horietarik 21 alokairuan. T3 motako etxeak 500 euro baina merkeago eskainiko dituzte bertan alokairuan, 200.000 euro baina guttiagoan salmentan. 86 etxebizitza berri hauek Hendaian behar diren bizitza sozialen %10 baina guttiago dira, 1000 lagun inguru baitira etxebizitza sozial baten esperoan. 

60 urteko ibilbideari bukaera ematea erabaki du Benito Lertxundik. Kantari eta musikari gipuzkoarrak iaz Gernikan grabatutako kontzertuaren zuzeneko diskoa aurkeztu du, eta horrekin batera eman du oholtzak uzteko erabakiaren berri. 19 urterekin hasi zen kantagintzan Frankismo garaian, Ez Dok Amairu taldeko kide gisa lehenik, eta bakarka ondotik. Sei hamarkadetan hogei disko argitaratu ditu oriotarrak, eta haren abesti anitz kantu herrikoi bilakatu dira.

Sei urtez lan berririk argitaratu gabe egon ondoren, Mattin Lerissak hirugarren diskoa kaleratu du, 2024ko Durangoko azokaren atarian. 'Mundu zabalerako' izenburua du lan berriak, Manex Erdozaintzi Etxarten kantu bati begi kliska eginez. Kantu gehienak Lerissak berak musikatu ditu, eta Aguxtin Alkhat, Mixel Ducau, Jojo eta Ramuntxo, Manex Pagola eta Robert Charlebois-en doinuak berriz harturik ere batzuetan. 2018an ondu zuen 'Gazte naiz gazte' lanean bezala, Mixel Ducau (gitarra, ukelelea, perkusioak, txirula, saxofoia) musikari fina ukan du ondoan Lerissak, baita Iñaki Dieguez eskusoinuan eta Txomin Duhalde baterian ere. Kantuen hitzen sortzaileak Aguxtin Alkhat, Manex Pagola, Itxaro Borda, Manex Erdozaintzi Etxart, Pantzo Hirigarai, Daniel Landart eta Jean-Louis Davant dira. Kantuek euskara, adiskidetasuna, libertatea edota migranteen egoera zaila dituzte hizpide.

Euskararen Urtaroaren karietara hitzordu ezberdinak, ainitz, badira hilabete guztian zehar, abenduaren 3a arte, euskararen nazioarteko eguna arte. Begirada berezia ezarri nahi izan diogu euskararen urtaroari, eta horretarako Antton Kurutxarri gomitatu dugu goiz berrira: Euskal Elkargoko lehendakariordea, hizkuntza eta kultura arloan. Euskarak pairatzen dituen erasoak eta bereziki Euskararen Erakunde Publikoaren aurrekontua urtez urte ber kopuruan mantentzen dela azaldu du Antton Kurutxarri, Euskal Hirigune Elkargoko hizkuntza eta kultura lehendakari-ordeak.

Urtero bezala, Piarres Larzabal Kolegioko ikasleek Elkartasun Hilabetea antolatu dute azaroan zehar, "Eguberrin jaso aitzin, beharretan direnei ematen ikas dezagun!" lemapean. Iragan urteetan, 'Etorkinak', 'Suhiltzaile solidarioak', 'Integrazio Batzordea', 'Haur eri' eta 'Nesk'à'paillettes' bezalako elkarteak lagundu zituzten, eta aurten Madag'Azkar elkartea laguntzea erabaki dute. Izan ere, Madagaskar munduko bosgarren herria txiroena bezala sailkaturik da, eta elkarte horrek herrialde afrikar horretako eskolak bultzatzen ditu. Horren harira, Ione Lopez Manterola surflari ezaguna eta elkarteko lehendakaria gonbidatu dute kolegiora mintzaldia ematera. Ikasleek materiala eta diru bilketa bat antolatu dute, eta Ione Lopezek eramanen du Madagaskarrera apirilean. Orotara, mila euro baino gehiago biltzea erdietsi dute ikasleek.

Zailtasunak ukaiten ari ditu Donibane Lohizuneko poliklinikak, bere larrialdi zerbitzua bizirik atxikitzeko. Irailetik hainbat gauaz bertan behera utzi dute zerbitzua, mediku eskasa dela eta. Badira hiru hilabete urgentzietako hiru mediku protesta-geldialdian direla, berrantolaketa plana salatzeko. Izan ere, urtarriletik goiti, zuzendaritzak mediku bat gutxiago jarri nahi du eguneko larrialdi zerbitzuan, gaur egun, bi direlarik. ospitaleko buruen nahia betetzekotan, egunez eta gauez mediku bana geldituko ziren bakarrik.  Zuzendaritzak beharrezkoa ikusten du mediku kopurua apaltzea, defizitaren ziloa txikitzeko, urgentzien aktibitatea ere apaldu dela argudiatuz. Gaur egun, berrogei paziente inguru hurbiltzen dira egunero Donibane Lohizuneko larrialdietara, eta bataz beste, paziente bakoitzak bost oren eta 24 minutu behar ditu behar bezala artatua izateko.

Euskal Kostaldeko ospitaleko zuzendaritzak aurkeztu duen lanaldien berrantolaketa proiektuak arrangura pizten segitzen du. Astearte goizean Cam de Prats egiturako langileen parte batek protesta egin du erietxeko bideetan eskuorriak banatuz. Berrantolaketa proiektu horrek RTT egun kopuruak murriztuko lituzke. Ospitaleko zuzendaritzak berrantolaketa hori defizit handiegia saihesteko neurri gisa defendatu du. CGT sindikatuak deitua zuen astearteko mobilizaziora, anartean UNSA sindikatua zuzendaritzarekin negoziaketan delarik.

FDSEA eta JA sindikatuko kideak hainbat hautetsi eta senatariekin bildu dira astelehenean, Donoztirin, laborarien lan baldintzen salatzeko. Azken aldiko laborarien mobilizazioen ondotik, berriz mobilizatzen hasteko parioa egin du FDSEAk. Konfiantza galdu dute haien aldarriak ez baitira kontuan hartzen. Haien lanetik bizitzeko zailtasunez, presio administratiboez edota gazteek plantatzeko ukaiten dituzten zailtasunez ohartarazi dute. Hartu-eman horretan parte hartu dute, besteak beste, Max Brisson senatariak, Peio Dufau eta Iñaki Etxaniz legebiltzarkideek eta Isabelle Pargade Elkargoko laborantza saileko lehendakari-ordeak. Senatuan pestiziden baliapenari mugak kentzeko legearen alde bozkatuko duela baietsi die FDESAkoei Brissonek. Peio Dufau diputatuak, aldiz, lege proposamen bat aurkeztuko du urte bukaera eta 2025 urte hastapen horretan lurren segurtamenaren inguruan.

Ipar Euskal Herriko bederatzi enpresaburuk bat egin dut, beren langileendako etxebizitza eskuragarriago batzuk proposatzeko. Duela urte bat sortu zuten Lan eta Bizi Herrian SCI higiezin sozietate zibila, eta jada, eraikin bana eskuratu dituzte Hazparnen eta Aiherran. Bertan, alokairuan proposatuko diren bizitegiak sortuko dituzte, eta Peio Etxeleku enpresaburuak azaldu duenez, urte batzuen buruan, egoiliar iraunkorrek bizitegi horien gozamena erosten ahalko lukete, higiezin sozietate zibilak jabetza soila atxikiz. Alta, gozamen hori arraerosteko eskubidea izanen du egiturak. Egitasmo horretan 700 langile enplegatzen dituzten bederatzi enpresa elkartu dira, horien artean, Agour, Bastidarra, Ladeuix, Elkarlan, Betiko, Somocap, Voltaire eta SOGECA. Enpresa bakoitzak 50.000 euro inguruko inbertsioa egin du, egitasmo bateratu horren garatzeko. Etxelekuren hitzetan, «langileei bizitegi horien gozamena salduz geroan operazio berriak egitea» espero dute. Hazparnen lau apartamentu eginen dituzte, eta Aiherrako Auxotea etxean beste zazpi. Horrez gain, eraikin horretan zen ostatua biziberritzeko nahia erakutsi dute, baita bere ondoan diren komertzioak mantentzeko ere.