Aste huntan eginen du sartzea AEK Alfabetatze Euskalduntze Koordinaketak. Izen emaiteei buruzko datu zehatzak urri bukaeran aterako dituzte, baina, iaz baino ikasle gehiago izanen direla badakite. Iaz 1500 bat ikasle izan ziren Ipar Euskal Herriko euskaltegietan, gaueko kurtsoak eta ikastaldi ezberdinak segitzeko. Hala ere, eremu batzuren estaltzeko, baliabide gehiago beharko lituzke AEKk, adibidez Bardoze, Hiriburu, Lehuntze edota Xiberoan. Egiazko hizkuntza politika bat plantan ezarriz baizik ez dituela helburu guztiak betetzen ahalko AEKk, erranen digu Ihintz Oliden Ipar EHko koordinatzaileak. Goizberriko gomita izanen da 8etatik goiti.

Lau karro izan dira aurten Lapurtarren Biltzarrean. Hiru karro, egia erran, Baionako bestetaz, Uztaritze lo egiteko herria izatea salatzeko eta Lapurdi ez dela salgai aldarrikatzeko. Eta laugarren bat, Lapurtarren Biltzarreko kideek beraiek egina, bi pertsona kamioi batean mutur banderola batekin “aperoan jende gehiago karroetan baino – 1000 aldarrikapen baina nehor ez da mugitzen”. Urtero bezala, trikitilari, zigante eta gaiteroek lagundu dituzte karroak bertsolarien kritikekin artetik. Ondoko urterako karro gehiago motibatuko direnaren esperantzarekin bukatu da aurtengoa.

2024ko ekainaren 28, 29 eta 30ean Arberatzen izanen da EHZ festibala. 50 gazte bildu ziren larunbatean Kanboko gaztetxean 2023ko Irisarriko azken EHZren bilduma egiteko eta 2024ko gunea hautatzeko. Bardozeren eta Arberatzeren artean izan da erabakia. Bi guneen potentziala aurkeztu eta gero bozkatzeko tenorea jin da. Eta erreski nagusitu da Arberatze. Nahiz eta Irisarriko edizioez balorazio baikorra egin duten, gune berri baten beharra azpimarratu dute, betiko filosofia eta ibilmoldeak atxikiz.

Korsikako asanbladaren aitzinean egin du adierazpena uhartea naziengandik askatu zenetik 80 urte bete direnean. Uhartea komunitate «historiko» eta «kultural» gisa aitortzea proposatu du, eta Konstituzioa aldatzeko prest agertu da. Autonomia hori frantses Errepublikaren barnean eraiki beharko da, eta talde politikoek sei hilabeteko epea izanen dute estatutuaren moldaketaz adostasun batera heltzeko.

Peio Etxeleku (EAJ):

Xabi Larralde (EH Bai):

Txirrindularitza mundua dolutan da. Francis Lafargue lapurtarra 68 urtetan zendu da, bihotzekoak jota. Reynolds eta Banesto taldeen harreman publikoez arduratu zen 80. hamarkadan, hastapenean Frantziako itzuliaren karietara eta ondotik bestelakoetan ere bai. Ezagun izan zen ere Pedro Delgado eta Miguel Indurain txirrindulari handien manager pertsonala izan zelako. Aurten Ipar Euskal Herriko txirrindularitzaren historiaz liburua idatzi zuen Ximun Larre kazetariarekin batera. Preseski, Ximun Larre elkarrizketatu dugu Goiz Berri saioan.

Urruñako herriko etxeak bultzatu nahi duen antolamendu-eremu hitzartuak arrangurak piztu ditu herriko auzoetan. Hirigintza plan horrek Urruña erdigunea eta periferia hartzen ditu, jada urbanizatua den eremuan etxebizitza gehiago eraikitzeko. Gainera, lehentasunez erosteko eta desjabetzeko eskumena ukanen du herriko etxeak eremu horretan. Lur jabeek aldiz salatzen dute ezinen dutela nahi duten prezioan saldu. Filipe Aramendi auzapezaren erranetan, antolamendu-eremua ez da oraino finkatua eta ikerketa bat bidean da. Urte bukaera aintzin erabakiko dute.

Fikziozko lan bat proposatu du nerabezaroari lotua. Idoia Rodriguez irakaslea, euskara eta letra modernoetan bi CAPES ditu, 2016an 'États de crise' izeneko liburua plazaratu zuen autoedizioan. Baionako besten konkurtso literarioaren euskarazko saileko irabazlea izan da ere berrikitan. Sari horri esker 6000 euroko diru laguntza eskuratuko du eta heldu den udaberrian argitaratuko du.

Gure Gain elkartea aurkeztu dute atzo Bidarrain, Baigura aldeko tokiko laborantza zaindu eta garatzeko. Zortzi herriko Mendiko Lur-funtsen Elkarteak eta herriko etxeak bilduko ditu. Laborarien beharrei manera eraginkorragoan ihardokitzea da helburua, bi erakunde mota horien eskumenak elkarte berean bateratuz. Hemendik goiti tokiko laborantzaren aldeko proiektu kolektiboak eta gogoeta-guneak bultzatuko dituzte. Urriaren 7an, elkar trukaketa eguna eginen dute Arrosan. Mahai-inguruan, besteak beste, elkar-erosketak, enplegatzaile taldeak eta laborantzako tokiko sailak izanen dituzte hizpide

Pinar Selek soziologo frantses-turkiarraren kontrako enegarren auzia iraganen da ostiral huntan Istanbulen. 1998tik, Pinar Selekek jazarpen judiziala pairatzen du Turkiar justiziaregatik. Urte hartan, Istanbulen gertatu leherketa bat leporatzen diote. Geroztik, kondenen eta hobengabetzeen ondotik, azkenean atxilotze aginduen mehatxuan bizi da Frantzian. Ostiralean bere sustengu komiteko kideak hurbilduko dira Istanbulera. Pinar Selek bera Parisen egonen da. Auzi saioa berriz gibelatzen ez badute, bizi osoko kondena arriskatzen du.