Espartinaren interpretazio gunea lau urteren buruan zabalik ikusi nahi luke Louis Labadot Mauleko auzapezak. Zentroa herriko etxearen gibelean diren eraikin hutsetako batean kokatuko dute, Ühaitza ibaiaren hegalean. Hastapenean, espartinei buruzko museoa eraikitzea zen herriko etxearen helburua, baina hiriko espartingileak kontra agertu ziren, gune horrek lehia eginen zielakoan. Labadok aurkeztu egitasmo berrian, haatik, ez da salmenta gunerik izanen, eta espartin-industriaren historia soziala ere agertaraziko dute, langileen borroka eta greba gogoangarrien oroigarri.

Supermerkatuetako ezantzategietan, erregaia bere kostuaren petik saltzea. Horixe proposatu du frantses Gobernuak ezantzaren prezioaren goititzeari buru egiteko. Abenduaren lehenetik litro bakoitzaren prezioa, gehienez, 50 zentimoz jautsi liteke. Sei hilabetez luzatuko litzateke neurria, eta banatzaile handien nahiz independenteen arteko lehia mugaraino eraman lezake, bigarren horien kaltean. Abantsu 6.000 ezantzategi biltzen dituen Mobilians sindikatuak, galduz saltzea ez dela eztabaidagarri adierazi dio Gobernuari.

Urketako eskola publikoan, murgiltze sistema plantan eman dute. Euskararen Erakunde Publikoaren protokoloaren urratsak segitu dituzte, Bordaleko Hezkuntza Ikuskaritzaren onespenarekin. Iragan irailean abiatu zituzten gogoetak, ama eskolatik lehen mailako lehen urtea bitarteko ikasleei euskara hutsean ikasteko aukera emateko. Orotara, 50 ikasle izanen dira murgiltze ereduan, ikasturte honetan. Eskola sartzea prestatzeko bilkurak egin dituzte gurasoekin, eta beste eskoletako gurasoen esperientziak ere entzun ahal izan dituzte.

Ez da bide erraza izan, eta oraino bost urte goaitatu beharko dira, baina Yves Ugalde Baionako Euskal Museoko presidenteak baieztatu du, «Xiberoan adar bat sortzeko asmo fermua du Euskal Museoak». Ondarearen etxean izanen da, baina eraikina funtzio berriei egokitzeko lan andana egitekoak dira oraino. Badu urte zenbait xede hau gogoetatzen ari direla, Xiberoan bildutako aurkikuntza arkeologikoak tokian berean erakutsiak izan daitezen. Gaur egun, materialak Baionara igortzen dira Xiberoako lurraldean ez baita horiek zaindu eta aztertzeko gunerik. Egitasmoa programazio fasean da; elkarte eta interesa duten eragileekin lankidetzan dihardute, eta arkitektoekin urte eta erdiko lana dute oraino egiteko. Egokitze lanak burutzeko 18 hilabete beharko dituzte. Departamenduaren eta Akitania Berria eskualdearen babesa bildu dute, eta beranduenik, 2029an irekiko da.

2013ko 'Alternatiba' egunetik hamar urtera, 10.000 pertsona bildu nahi ditu Bizi mugimendu ekologistak bi egunez Baionan. ‘Euskal Herria Burujabe’ topaketak antolatu ditu urriaren 7tik 8ra, lurralde iraunkor, solidario eta burujabe baten aldarrikatzeko. Orotara berrogei konferentzia inguru izanen dira bi egun horietan, animazio franko Baionako karriketan, eta 150 bat elkarte edo eragileren erakus-mahaiak. Euskal Herria eta Frantzia osoko ordezkariak goaitatzen dituzte.

Euskara, katalana eta galiziera Europako hizkuntza ofizial izendatzearen inguruko erabakia gibelatu du Europako Kontseiluak. Ez da adostasunik erdietsi, eta dudak nagusitu dira. Zailtasun horiek direla tarteko, Espainiako Gobernuak erran du katalana ofizialtzeko bidea lehenetsiko duela. Hitz horiek arrangura eta kexua piztu dute Euskal Herrian. Neurriaren bideragarritasun juridiko, tekniko eta ekonomikoaren inguruko azterketa egin anartean ez da bestelako erabakirik hartuko. Eztabaidari berriz noiz ekinen dioten, beraz, ez dute zehaztu. Gaiaz solastatu gara Goiz Berri saioan Izaskun Bilbao EAJ alderdiko euro-diputatuarekin.

Lehen haurtzaroko zaintza osoki euskaraz egiten duten egiturek sustengu deiadarra jo dute. Murgiltze ereduan diren hiru haurtzaindegi eta bost haurtzain-etxe biltzen ditu Konkolotx elkarteak, eta urtero ehun bat haur errefusatzera behartuak dira, ahal eta leku eskasagatik. Aurten, gainera, egitura horien garapena sustatzeko egin diru-laguntza eskaera ukatu dio Euskararen Erakunde Publikoak. Hori dela eta, langile baten postua diruztatzeko 10.000 euro biltzeko diru bilketa abiatu du Konkolotxek.

Euskarazko lau film estreinatuko dituzte Donostiako 71. Zinemaldian, eta horietatik bi, Josu Martinez zuzendari baigorriarrak zuzendu ditu. Lehena, bost atalez osatua da eta 'Bizkarsoro' izenburua du. Euskal hizkuntzak jasaten dituen gora beherak azaltzen ditu. Bigarrena, aldiz, Jon Mirande Xiberoko idazle polemikoari eta bere lanari eskaini dio: 'Mirande. Film bat egiteko zirriborroa'. Josu Martinez izan da Goiz Berri saioko gomita.

Salaketa mezuak hedatu ziren sareetan, eta ikerketak abiarazi. Eta ororen buru, Googlek bere bilaketa-parametroak berrikusi eta zuzendu egin ditu, euskarazko sarrerak ez daitezen baztertuak izan. Bilatzailea euskaraz konfiguratua izan arren, Googelek erdarazko emaitzak lehenesten zituen, adibidez, bi hizkuntzetan berdin idazten diren hitzak, edota pertsona izenak xerkatzean. PuntuEus fundazioak eta Kataluniako beste eragile batzuk egin salaketari esker, pettoa zuzendu du muktinazional estatu batuarrak hilabete honentan. Noalanahi ere, Euskal Herriko erabiltzaileen %15ak baino gutiago du ordanagailua eta bilatzailea euskaraz kongiguraturik. Josu Waliño PuntuEus fundazioko presidenteak argipenak eman dizkigu Goiz Berri saioan.