Mixel Oronoz euskaltzale, idazle eta apeza zendu da 88 urtetan Baigorrin. Euskal Konfederazioko presidente izan zen urteetan. Bere bizian zehar hainbat lan idatzi zituen Euskal Pizkundeari buruz edota Iparraldeko Elizak hartu duen bide 'integrista' eta Marc Aillet Baionako apezpikua kritikatuz. Asteazkenean izan da erraustua Akizen; eta bere azken gogoei segika, bere hurbilekoek intimitatean eman diote azken agurra, ekitaldi laiko batekin.
Josu Martinezen 'Bizkarsoro' luzemetrai berria estreinatu zen atzo arratsean Donostiako Zinemaldian. Euskal zinea biltzen duen Zinemira sailaren barnean aurkeztu zuten, publiko zabalaren aitzinean. Azken bost urteetan filmatu dute lan hau Baigorrin, eta aurkezpenean bildu dira bertan parte hartu duten 50 heritarrak. Azken mendean euskararen zapalkuntza, desagertzea eta berpizkundea ditu ardatz filmak, Bizkarsoro izendaturiko fikziozko herrian kokaturik.
Plazara proiektua aurkeztu dute asteartean, Azkainen. Euskararen inguruko mediazioa, sentsibilizazioa eta motibazioa azkartzeko tresna izan nahi du. Momentuz atxikimendu kanpaina abiatu dute, eta 43tik mila bidelagun izaitera iragan nahi dute. Abenduan biltzar nagusia eginen du Plazarak eta bertan, elkarte egituratik kooperatiba bat izatera pasatzea aitzinikusten dute. Xan Aire, Plazarako kidea izan da Goiz Berri saioko gomita.
Iparraldeko nerabeei zuzendu eleberria sortu berri dute Elise Dilet eta Antton Hariñordoki idazleek. Kontakizuna Ainize Butronek egin marrazkiez ilustraturik da. Lana nafar-lapurteraz idatzi dute, tokiko gazteei irakurtzeko gogoa pizteko xedez. Hamabi urtetik goitiko irakurleei zuzendua zaie liburua eta adin horretako galdezketak ditu mamian. Eleberria historiaurrean kokatua da, eta Haizea nerabe bakartiaren abenturak kondatzen ditu.
Baserrialdean emazteen lekua eta ikusgarritasuna bultzatuko duten proiektuak proposatzeko momentua da. Euskal Hirigune Elkargoak 'Plazandere' izeneko proiektu deialdia abian eman du. Euskal mendialdean kokaturiko edozer egitasmo diruz laguntzea proposatzen du Elkargoak. 100.000 euroko laguntza banatzen ahalko du orotara. Berdintasunaren alde, bortizkeriaren kontra edo emazteen rola argitan emanen duten proiektuak proposatzea da xedea. Deialdia elkarte, sindikatu, enpres, eta egitura kolektiboei zuzendua da irailaren 30a arte.
Haragi ekoizpenen etapa guziak laborarien esku. Anhauzen kokatua den Xuhito CUMAk, lantegi berri bat ireki du Lartzabalen, haragia bestelakotzeko. Gaur egun, 30 laborari biltzen ditu laborantza materiala partekatzeko kooperatiba horrek. Orain, Larzabaleko lantegi berria baliatzen ahalko dute, haragizko produktua, hastetik buru, ekoizteko. Euskal Hirigune Elkargoaren laguntzarekin garatu dute proiektua, eta espero dute kide berriak erakartzea. Bilkura publikoak antolatuko dituzte ondoko egunetan. Betti Duhalde Xuhito CUMAko kideak lantegi berria eraikitzearen zergatia azaldu digu Euskal Irratietan:
Ipar Euskal Herrian kazetari euskaldunak sortzeko programa abian da. Hamabi parte hartzaileek Iparraldeko hedabide euskaldun edo elebidunetan lan eginen dute, eta unibertsitatean kurtsoak jasoko dituzte. Horrela, bi urteren buruan, kazetaritza diploma jasoko dute. Kazetari euskaldunen falta baitzen, diploma horren sortzea erabaki zuten Euskararen Erakunde Publikoak, UPPA Paueko eta Aturrialdeko Unibertsitateak, EHU Euskal Herriko Unibertsitateak eta IJBA Bordele-Akitania Kazetaritza Institutuak. Ikasle-aprendizek bi urteko profesionalizazio-kontratu bat izenpetuko dute hebabide batekin eta IJBA-rekin. EEP erakundeko Ibai Agirrebarrena izan da Goiz Berriko gomita.
Ostiralean hasi zen Donostiako Zinemaldiaren 71. edizioa. Zortzi egunez 232 filma emanen dituzte, horietatik 57 estrainekoz. Igandean, 'Sultanaren Ametsa' animaziozko filma aurkeztu zuten sail ofizialean. Euskal, espainiar eta alemaniar koprodukzioa da, eta 1905ean Bengalen, Bangladeshen idatzitako ipuin feminista batean oinarritua da. Bertan, emazteek kontrolatzen zuten jendarte bat imaginatzen zuen Begum Rokeya idazleak. Filman, gaur egungo neska gazte euskaldun bat Bangladeshera doa, idazlearen aztarnei jarraika bere ametsa ulertzeko. Urrezko maskorra lortzeko lehian da Isabel Hergueraren filma. Euskara, ingelesa, gaztelera, italiera, hindia eta bengaliera naturalki nahasten dira filma horretan. Preseski, Miren Arrieta aktore gazteak jartzen dio ahotsa protagonistari euskaraz, gazteleraz eta inglesez.
