Lau hamarkada suteak itzaltzen, istripuak kudeatzen, suak itzaltzen, guardiak egiten… eta anartean, lorezain gisa lan egiten Miarritzeko golf zelai batean. Hala eman du bere bizia Julien Ubiria suhiltzaile senpertarra. Irailean hartu du erretreta eta berrogei urtez eman zerbitzuagatik ohoreak jaso ditu Eskualdeko, Departamenduko eta herriko hautetsi eta zerbitzuen partetik. Orain, Senpereko kasernaren gidaritza izanen du behin-beinean Ubiriarekin urte luzez lanean ari izan den Jean-Claude Errandonea. Urte betez izanen da suhiltzaile buru, gazteago batek gidaritza hartu arte. Julien Ubiriaren ibilbidea ezagutu dugu, Goiz Berri saioan.

Ez da posible izan. Lapurdiko Arraun Taldeak bi segunduko gibelapena ukan du arrauneko lehen mailara igateko. Iragan aste hondarrean jokatu dira Eusko Label ligan lehiatzeko play offak, Bermeon eta Portugaleten. Bi egunetako denborak eta punduak gehituz, lapurtarrak hirugarren gelditu dira sailkapenean. Pasai San Pedro eta Galiziako Bueu izanen dira heldu den sasoian lehen mailan.

Ihizia sasoia joan den asteburuan hasi da. Aurten, Ipar Euskal Herrian 8.000 lizentziadun dira eta Biarnoan 7.000. Ihiztarien %12a baizik ez dira emazteak oraino. Ihiztari elkarteen arabera, basurde populakuntza arras emendatu da eta, ondorioz, laborantza desmasiak biderkatu dira. Duela hamar urte, 2.000 basurde akabatzen zituzten eta azken urteetan 5.000 pasa. Kalteen kopurua emendatu baita, ihiztariek kalte-ordain gehiago ordaindu behar dizkiete laborariei eta Gobernuaren laguntza galdegiten dute. Adibidez, laborariek 300.000 euro errezibituko dituzte aurten kalte-ordainetan, eta Landetan 1,2 milioi euro. Horrez gain, eraginkorrago izateko, draia larrizko kartutxoak baliatzeko baimena galdegin dute, arrapostu baikorrik gabe mementuko. Neurri horren kontrakoen erranetan, kartutxo mota hori lanjerosa da eta animalia basek gehiago sufritzen dute.

Familia-liburua elebitan argitaratuko du Hazparneko herriko etxeak hemendik aitzina. Horretarako, Hiriburuko eta Bretainiako Renne nahiz Vannes hirietako eredua hartu dute. Izan ere, herri horietan agiri elebiduna da ofiziala eta eskaintzen den aukera bakarra. Ipar Euskal Herrian Miarritzek, Uztaritzek eta Urruñak ere eskaintzen dute familia-liburu elebiduna, baina hautazkoa da. Hazparnen agiria frantses hutsean duten familiek, elebitan den berri bat galdegiten ahalko dute herriko etxean.

Joseba Fernandezek trebatu taldea balentriaz balentria dabil. Udako denboraldia hasi aintzin, seinale onak igorri zituen Euskadiko Txapelketako finalera helduz, traineru hoberenekin lehiatzeko. Eta ondotik, KAE-1 bigarren mailako txapelketan erakutsi dute ekainekoa ez zela ustekabea izan. Bost traineru lehian izanen dira larunbat huntan Bermeon eta igandean Portugaleten; lehen mailatik datorren Santurtzi, eta gero bigarren mailakoak: Ehtik San Pedro eta Lapurdiko Arraun taldea, eta Galiziatik, Bueu eta Areseko taldeak. Lapurtarrak ez dira faboritoak, baina prest direla erran dauku Bixente Etxegarai lehendakariak Goiz Berri saioan.

Gehiengoaren alde bakarreko gobernantza eta etika falta salatu ditu. Egungo herriko etxeko gorbernuaren epe luzerako ikuspegi eza azpimarratu dute, egunez eguneko kudeaketa egiten dutela gaitzetsiz. Trantsizio ekologikoa, energetikoa eta hizkuntz politika ddira salatu dituzten puntuetako batzuk. Gai horien gainean ez dela politika ausartarik egin salatu dute. Horrez gain, biztanle kopurua goiti doan arren, bideen, azpiegituren edo garraioen inguruan ez dela gogoeta sakonik abiatu deitoratu dute.

Mintzalasai festibalaren hamabigarren edizioa ospatuko da irailaren 17tik 24ra. Zazpi egunez 50 jarduera, 20 gune, 30 elkarte eta 70 laguntzaile ibilduko ditu hitzordu horrek Baionan eta Miarritzen. Usaian bezala, egun bakoitza gai baten inguruan ardaztuko da; astelehena kirol eguna izanen da, asteartea gogoeta eguna, asteazkena haurren eguna, osteguna sukaldaritzarena eta ostirala kultura eta eztabaidarena. Aste hondarrean gailurrera helduko da. Larunbatean, Glisseguna izanen da Angelun eta igandean Mintzalasai festibalaren egun nagusia Miarritzeko Marion aintziran. Programa guztia eskuragarri duzue mintzalasai.eus webgunean.

Kinka txarrean da egun Mauleko ospitalea,eta azken urteetako zuzendaritza aldaketek ez dute egoera hobetu. Joan den aste hondarrean ospitalearen geroaz mahai-ingurua antolatu zuen Xiberoako EH Bai koalizioaren taldeak. Bertan, PS alderdiko Frederique Espagnac senataria eta Iñaki Etxaniz diputatuak Lapurdi eta Baxe nafarroako ospitaleekin bateratzearen alde agertu ziren. Arnaud Bourdé Donapauleko ospitaleko zaintza kontseiluko buruaren iritziz, ordea, norekin lotu pentsatu aitzin, «beharrezkoa da Mualeko ospitalearen funtzioa definitzea, lurraldeko ospitale taldea dadin ahuldu». Izan ere, kontuan hartu behar da bi lurraldeetako ospitale taldeek desberditansunak dituztela: Pauekoan, Oloroe eta Orthezeko ospitaleen kudeaketa eta bideragarritasunarekin arrangurak emendatuz doaz. Aldiz, Lapurdi eta Baxe Nafarroako ospitale taldean, aiseago igortzen ahal dituzte medikuak barnealdera.

Badu 15 urte Hergaraiko sei herrietako herritarrek Hergarai Bizi elkartea sortu zutela. Orain arte Ahatsa, Behorlegi, Duzunaritze, Lekunberri eta Mendibeko herritarrek parte hartzen zuten bereziki, baina aurten Aintzileko gazte talde bat ere gehitu da egitasmora. Bi urtero herriz aldatzen dute, eta aurten, Duzunaritze hautatu dute. Irailaren 16an,  Ttutturu Trail lasterketa izanen da eta biharamunean, feira, gasna lehiaketa, dantza eta musika. Aurten, omenaldi berezia eginen diote Bernat Etxepare idazleari, sortzez duzunariztarra baitzen. Paxkal Negelouart eta Maider Genard Hergarai Bizi elkarteko bi presidentekideak izan dira Goiz Berri saioko gomitak.