Pastoral berri bat bidean da Xarnegu eskualdean. Ideiak herritar anitz mugiarazi ditu, eta dagoeneko, ehun parte hartzaile bildu dituzte. Inkisizioak sorgintzat hartu eta jazarri zuen Inexa Gaxen emazte bastidarraren istoria hartu dute gai gisa. Eskualde horretan, euskararekin batera gaskoiera ere entzun daitekeenez, bi hizkuntzei eginen diete leku antzezlanean. Testua Itxaro Bordak idatzi die, eta orain Ivan Bareyrekin elkarlanean arituko dira obra elebidunean moldatzeko. Heldu den urtean estreinatuko dute obra Bastidan ekainaren 15 eta 16an, eta ondotik Bardozen emanen dute irailaren 22 eta 23an. Pantxika Urruti antolatzailea izan da Euskal Irratietako gomita, Goiz Berri saioan:

Senpereko Olha etxaldea, ororen buru, saldua izan da. Duela aste batzuetatik ELB sindikatuak eta Lurzaindiak gunea okupatzen zuten, Senpertarrak nahiz Ostia kolektiboko kideekin batera. Salmenta salatu dute Alexis Inchauspé notarioaren bulegoaren kanpoaldean, eta laborantza lurren espekulazioa laguntzen duela deitoratu diote. Momentuz, etxaldearen okupazio ekintza mantenduko dute kolektiboek.

Marie Toussaint, Europe Ecologie les Verts alderdiko europarlamentaria Donibane Lohizuneko Lafitenia itsas bazterrean izan da asteazken goizean. Hura izanen da talde ekologistako zeerenda-burua 2024ko Europako Legebiltzarreko hauteskundeetan. Surfrider Foundation elkartearen laguntzarekin, ostreopsis itsas belarren presentzia eta uraren kalitatea aztertu dute. Klima aldaketak landare espezie berriak sorrarazi ditu euskal kostaldean.

Ez da argi nor izanen den Espainiako Gobernuko presidente berria. Uztailaren 23ko hauteskunde orokorretan, eskuineko Alderdi Popularra izan zen garaile, baina; eskuin muturreko diputatuen babesa bildurik ere, gehiengo osorik ez du erdietsi. Xantza handiena, beraz, PSOE alderdiko Pedro Sanchez luke. Haatik, ezkerreko alderdi guzien babesa beharko luke, talde independentsistenekin batera. Ion Ansa politologoa izan da Euskal Irratietako gomita, Goiz Berri saioan:

Zenbakiak ez dira behin betikoak baina 1,6 milioi pertsona izan direla Baionako bestetan adierazi du Jean René Etxegarai auzapezak; hots, iaz baino %10 bisitari gehiago. Horrekin batera 550 polizia eta 350 sokorritzailek parte hartu dute segurtasun dispositiboan. Orotara 490 salaketa izan dira lapurretengatik eta 36 interpelaziotatik, 28 atxiloketa izan dira. Horietan paperik gabeko bi atzerritar, erretentzio zentrora eraman dituztenak eta beste bat Frantziako lurraldetik joateko obligazioa ezarri diotena. Gainera, hiru pertsona espetxeratu dituzte ebasketengatik. Poliziak kasik hiru mila alkolemia kontrol egin ditu, eta horietatik 75 pertsonek eman dute positibo alkoholean eta zazpik drogetan. Horrez gain, lau bortxaketa kasu izan dira eta horietarik batek jada salaketa pausatu du polizia-etxean. Bestalde, kasik hil arte kolpatua izan zen gizona; oraino koman segitzen du Baionako ospitalean; hiru erasotzaileak xerkatzeko lanetan segitzen du poliziak.

Nazioarteko Pilota Federazioko presidente Xavier Cazaubonek, zuzendaritza eta komisio desberdinetako kide ia guziak kanporatu ditu astearte honetan. Mexikoko kide bat eta Frantziako beste bat utzi ditu bakarrik. Denbora tarte bat hartuko duela adierazi du sare sozialen bidez, pertsona berriak izendatu aintzin. Joan den larunbateko Biltzar Nagusiaren ondotik hartzen duela erabaki hau jakinarazi du. Joan den larunbateko Biltzar Nagusian estatutu aldaketa bozkatu behar zen eta ondotik, Euskadiko Pilota Federazioa onartu, baina bilkura hartan deus ez bozkatzea erabaki zuten azken momentoan. Gotzon Enbil Euskadiko Federazioko kidea elkarrizketatu dugu Euskal Irratietan:

Deseraiki, berriz eraikitzeko. Hau da Euskal Hirigune Elkargoaren asmoa bere etorkizuneko egiturekin. Mugerreko pleitaguneko 600 metro karratuko kamioien zentro tekniko bat osoki deseraiki dute, eta egitura berriz baliatua izanen da ondoko urtean, Donapaleun eraikiko duten beste eraikin batentzat. Patxama elkartearen esku da kudeaketa eta azken hunek ALKAR enpresari laguntza eskatu dio, metalezko estrukturez arduratzeko. 400 metro karratuko hangarrak, eta 160 metro karratuko bulegoak, berriz erabiliak izanen dira eraikin berrian edo, bigarren eskuko sarean sartuak. Bigarren aldia da hori bultzatzen duela Hirigune Elkagoak. Hirugarren proiektu bat bidean du, Angeluko portuko hangar batekin.

Nola izanen da Ipar Euskal Herria 2040 urtean? Galdera horri ihardoki nahi lioke herritarrak eta hautetsiak biltzen dituen Garapen Kontseiluak. 2010 eta 2020 hamarkadetanegin bezala; lurraldeko erronka eta politiken inguruko hausnarketa abiatuko dute gizarteko aktore desberdinekin. Gogoeta fasea buruilean hasiko dute. Philippe Mayte Garapen Kontseiluko lehendakari-ordea izan da Euskal Irratietako gomita:

GR10 ibilbidean den Kaskoleta aterpetxea berritu dute. Euskal Hirigune Elkargoaren, Departamenduaren eta Estatuaren laguntzaz 200.000 euroko lanak egin dituzte eraikinean. Duela hogei urte ireki zituen bortak aterpetxe horrek, eta Kasko Argi etxaldeko Jean Luc eta Maialen Iriartek kudeatzen dute. Behi gorriak eta ardi esnedunak dituzten laborari hauek, lo egiteko tokia, afaria eta gosaria eskaintzen dizkiete mendizaleei.