Zeropeko tenperaturak arribatuak dira Iparraldera. Alta, laurehun pertsona inguru karrikan bizi dira Baiona, Angelu eta Miarritze eskualdean. Baionako Gurutze Gorriak abenduan ohartarazi duenez, etxegabeen kopuruak goiti egin du iaztik. Azaroaren hamabostetik, gauero jatekoa, edari beroak eta hotzaren kontrako jantziak banatzen dituzte. 2022an gauero 40 bat pertsona atzematen zituzten, aurten, aldiz, 60 inguru. Hori dela eta, lo egiteko berrogei toki gehiago eskainiko ditu Atherbea elkarteak, higiene eta elikadura beharrak ere segurtatuz.
Zertan dira urte hastapen honetan neguko eritasunak? Goiti doazela diote batzuk, eta beste urteen antzera girela besteek. Baionako ospitaleko zuzendaritzaren arabera, larrialdiak ez dira gainezka, nahiz eta behin eta berriz entzun dugun egunerokoari ezin buru eginez ari zirela. Negu oroz bezala, gripea hemen da, A motakoa bereziki. Baina momentuz ez dirudi egoera bereziki arranguratzekoa denik. Aldiz, kezka sortzen duena mediku eskasia da; izan ere, ordezkapenak betetzeko zailtasunak dituzte.
Euskal Herriko Kontseilu Sozialista, mugimendu sozialistaren erreferente politiko nagusia aurkeztu dute Ipar Euskal Herrian. Baiona eta Bidarraiko aurkezpenetan azaldu dutenez, «krisi kapitalista bete-betean, komunismoa langileon artean hegemoniko bilakatzeko lan eginen Euskal Herriko Kontseilu Sozialistak». Era berean, alderdi parlamentarioei kritika egin diete, eta «joko-zelai politiko burgesetik» kanpo antolatzeko proposamena luzatu dute. Duela hiru urte pasa antolatu zen GKS gazte antolakunde sozialista Ipar Euskal Herrian, eta duela bi urte aurkeztu zuten ere hemen Kontseilu Sozialista. Preseski, azken urteetan mugimenduak eginiko urratsen segidatzat jo dute Euskal Herri mailako antolakunde horren sorrera, «erronka handiagoei» heltzeko xedearekin. Gabi Daraspe, Ipar Euskal Herriko Kontseilu Sozialistako kidea izan da Goiz Berri saioko gomita.
Euskal preso politikoen egoerari aterabide bat emateko «konponbiderako giltzak» aldarrikatuko dituzte Sarek eta Bakegileek heldu den asteburuan Bilbon. Manifestaldi deialdi horrekin bat egin dute Ipar Euskal Herriko dozena bat gaztek. Jan den larunbatean agerraldia egin dute Miarritzen «belaunaldi gazteenak ere gatazka armatuaren konponbidean inplikatuak direla» aldarrikatzeko.
Ipar Euskal Herriko txapela preziatuena eskuratu du Luis Sanchez pilotari nafarrak. Donibane garaziko Garatenea trinketeko Super Prestige lehiaketan nagusitu da, Peio Larralde hazpandarraren kontra. Oren bat eta laurden iraunduen artida zirraragarria, 39 eta 40 tantotan bururatu da. Sanchezek zailtasunak ukan ditu hastapenean jokoan sartzeko, 21 eta 5 galtzen zuelarik. Aldiz, partida hankaz goiti ezarri du 20 kintze sartuz segidan. Orotara, sei berdinketa izan dira eta azkena 39 tantotan. Azken botetik Luis Sanchez txapeldun bilakatu da.
Luis Sanchez:
Peio Larralde:
2024ko agiantzak egin zituen ostiral arratsean Kotte Ezenarro Hendaiako auzapezak, herriko kontseilua gibelean zuela. Azken urtearekin kontent agertu da, pandemia garaia gainditurik, proiektu berriei ekin delako herriko etxeak. Erdigunearen arraberritze handi bat hasiko da orain eta bi urtez luzatuko da, eta gisa bereko iraupena izanen dute igerileku berria eraikitzeko lanek. Etxebizitzaren gaia ere hizpide ukan zuen Ezenarrok; Hendaia tentsio handiko bizitegi-eremua izendatu izana eskertu du. Hendaiako etxebizitzen %37 bigarren egoitzak dira, eta parean, bizitegi sozialentzako 700 eskaera arraposturik gabe segitzen dute. Egoera arindu nahian, herriko etxeak alokairu eta jabego eskuragarriagoa bermatzeko eraikuntza bat estreinatuko du aurki COL egiturarekin batera, eta beste hiru egoitza ere eraikitze bidean ditu.
Ipar Euskal Herriko biztanleriaren %12 pobrezian bizi da. Hori dio INSEE Frantziako estatistika institutuak iragan urrian egindako ikerketa batek. Horrek erran nahi du gure lurraldeko 35.000 herritar 1102 euro azpiko hilabete sariarekin bizi direla. Ikerketak ere agerian eman du Ipar Euskal Herriaren «ahultasuna bizitegi sozialen eskaintzari dagokionez». Sokorri Katolikoak 13.000 pertsona eta 2.700 familia inguru lagundu zituen 2022an Iparraldean, eta 19.000 gosari banatu dituzte Baionako egoitzan bakarrik. Adierazgarria da, gainera, Iparraldeko Sokorri Katolikora heldu direnen %20 lansari bat dutela. Hazkurri Bankuak elikagaiak eskaintzen dizkie tokian tokiko elkarte solidarioei, eta 2023an, elikagai galdea %10 igan dela hauteman dute. Zorionez, Filgi Claverie Hazkurri bankuko kideak azaldu duenez, «iragan azaroko hazkurri bilketan %10 eskaintza gehiago bildu ditugu, orotara 122 tona elikagai» eta, horrez gain, «hazkurri industriak ere %10ez emendatu ditu bere eskaintzak».
Sara Zozaya donostiarra izan da, Euskal Irratietako Eguberri Kantuz emankizuneko azken gomita. Gure Irratiko Diskotekara gomitatu du Arantxa Idiederrek, Nara bere lehen diskoaren aipatzeko. Urrian ateraia, taldearekin aurkezten hasiak dira, eta jada ondoko kantuei pentsatzen hasi da Sara Zozaya. Lau kantu zuzenean eman ditu artistak, tartean sorpresa bat, Erramun Martikorenak kantatzen duen Xorieri Mintzo Zen kantuaren bertsio bat ere, lehen aldiz kantatzen zuena.
Aita Santuaren erranen gaizki ulertze bat inposatu nahi du Baionako Apezpikuak. Hala mintzatu da Altxalili Iparraldeko LGBTIQ+ kolektiboa. Haien ustez elizak oraino anitz du egiteko bere idekitasuna azkartzeko. Abendu bukaeran Marc Aillet apezpikuak agiri bat zabaldu zuen pertsona homosexualak bedeinkatuak izaiteko konbertsio terapien bidea hartu behar zutela iradokiz.
- EGUBERRI KANTUZ: Esanezin
- EGUBERRI KANTUZ: ØDEI
- Bigarren etxebizitzak: «zinez kaltegarria bilakatu da azken bizpahiru urteetan»
- EGUBERRI KANTUZ: INDIGO
- EGUBERRI KANTUZ: Otxalde
- «Israelen proiektua Gaza berrokupatzea eta garbiketa etniko bat egitea da»
- EGUBERRI KANTUZ: Altzükütarrak
- «2024 urtea euskararen aldeko borroka urtea izanen da Iparraldean zein Parisen»
- «1.500 kultur ekitalditik goiti izan dira Ipar Euskal Herrian 2023an»