Bihar da joko olipikoen hasierako ekitaldi ofiziala iraganen. Nahiz eta atzo Errugbi7 eta futbola kirolekin Jokoak abiatu ziren. Joko Olinpikoek agorrilaren 11a arte iraunen dute. Baina, horrek hainbat aldaketa eta neurri agertarazten ditu biztanleentzat egunerokoan. Parisen ostalaria den Nikolas gure GoizBerriko gomita izan da.
Uztailaren 26tik abuztuaren 11ra iraganen dira Pariseko Joko Olinpikoak. Joko Olinpikoetan parte hartuko duten kirolarien artean, 46 izanen dira Euskal Herri osotik. Lapurditik 2 kirolari joanen dira. Euskadi Irratian ere jokoak prestatzen ari dira. Txetxu Urbieta Euskadi Irratiko kirol arduraduna gure gomita izan da.
Uztailaren lehenean Atharratzetik abiaturik, heldu den astean Getxon bukatuko da Euskarabentura espedizioa. 127 gaztetxo eta 30 bat heldu ibilki dira kurri, euskaraz bizitzeko arnasgunean. Heldu diren egunetan, Gipuzkoa eta Bizkaiko kostan ibiliko dira, herriz herri, Getxo eta Portugalete lotzen dituen Bizkaia Zubira iritsi arte. Unescok babesturiko ondarea da zubia, halaxekoa da euskara ere: aurten, 127 gazte berrik ere babesteko engaiamendua hartu dute.
Zea mays, gatibu, Zeta, Dupla… Euskal Herri mailako musika talde hauek ordainsari handiak eskatzen dituzte, 10 000 eta 15 000€ artean gutxienez. Nola egiten dute herri ertain edo txikietako komiteek taldeak pagatzeko ? Pario hori arriskurik gabe ote da ?
Pasa den asteburuan Makean ikusi ahal izan da ezetz, aroarengatik ez dira oholtza gainera igan Zetak eta Gatibu. Eñaut Etxeberria Makeako komiteko kidea hortaz aritu da.
"Euskara eta euskal literatura, programaketatik ikasgelara" jardunaldian parte hartu zuen Katixa Dolhare Zaldunbidek. Seaskak eta UEUk antolatu Udako Ikastaroen barne. Bere problematikak horiek ziren: Zer leku du literaturak hezkuntza programetan eta nola landu euskal literatura bigarren hezkuntzan? Letretako agregatua da 2023ko irailaz geroztik, Bordeaux-Montaigne unibertsitatean literatura-irakasle gisa ari da.
Turismoa eta laborantza uztartzeko xedez, Euskal Hirigune Elkargoko Turismo Sailak desmartxa bat abiatu du, «Tokikoa» izenekoa, Ipar Euskal Herriko 24 ostatuekin, tokiko eta kalitatezko mozkinak eskain ditzaten beren plater eta menuetan.
Argitxu Ourthiague, Elkargoko Turismo Bulegoko misio karguduna Agroturismoa eta Gastronomia sailetan gure gomita izan da.
Euskal Herriko laborantza ganbararen mezua hau da: "Heldu den neguko hesi edo zuhaitz-lerro landaketak orain prestatu behar dira".
Negurako prestaketak hasi berri dira eta hortaz gain, adierazi dute ere diru laguntzak badira hesi horien landatzeko. Zer ekartzen duten eta nolako laguntzak diren jakiteko gogoan, Antton Castoreo Aiherran izan da Beñat Duhalde laborariarekin.
Ostegun honetan Pariseko Asanblea Nazionalean bildu dira diputatu hautatu berriak Asanbleako presidentea hautatzeko. 3. Itzulian berriz Yaël Braun-Pivet Macronista hautatu dute 221 bozkarekin, Fronte Popular Berriko André Chassaignek 207 bildu dituelarik. Bere aldetik, Peio Dufau abertzalea Parisen zen. Jose Luis Aizpururi erran dionez, sozialisten taldean sartuko da, Ipar Euskal Herriko beste bi diputaturekin batera, hau da Colette Capdevielle eta Iñaki Echanizekin.
