Benito Lertxundi 60 urte iraun duen kantugintza uzten zuela jakinarazi du Durangoko azoka aitzin. 2023an Gernikan grabatu zuen kontzertu baten diskoarekin bururatzen du bere ibilbide handia bezain aberatsa. Bazuen urtea hartua zuela erabakia, ez bada erraza izan bururatze horren berri ematea publikoki, orain libraturik sentitu dugu.
Baionako Avironek TOP14 mailako laugarren postuan bururatu du urtea, eta Biarritz Olympiquek zortzigarrenean, nahiz eta zigor administratibo bat tarteko, bosgarrenean behar lukeen. Goi mailako TOP14 txapelketan, ez dira oraino txapelketaren erdira heldu baina bilana baikorra da. Baionarrek 30 milioi euroko aintzinkontua dute, eta beste taldeek bezala, atzerriko jokalari anitz ditu. Miarritzek bere aldetik, hats berri bat hartu ahal izan du, Aldigék eta Gavek taldearen giderrak Shaun Hegartyren taldearen esku utzi zituenetik. Aurten, 9 milioi euroko aintzinkontua dute xuri gorriek bigarren mailako Pro D2 txapelketan.
Kanboko Marieniako proiektuaren kontra joan den maiatzetik engaiatu ziren bost elkarteei, orain beste andana gehitu zaizkie Marieniako laborantza lurrak deuseztatu eta artifizializatu ez daitezen. Orotara, hemeretzi elkartek sinatu dute engaiamendu hitzarmena, horien artean, Arrapitz, Biharko Lurraren Elkartea, EHZ, LAB sindikatua, Bizi eta Alda. Azken hilabeteetan bizitegien defentsako elkarteei egiten zaien jazarpena ere salatzen dute eta otsailaren 11n Baionan izanen diren auzira gomitatzen dituzte herritarrak, Kanboko herriko kontseiluan izan gertakariak aztertuko eta epaituko baitira.
Ohorezko saria eman diote Xipri Arbelbideri, Eusko Ikaskuntzak eta Baionako Hiriak. Ostiralean banatu zituzten sariak, Baionako herriko etxeko gela nagusian, Ana Urkiza eusko ikaskuntzako lehendakariaren, Claude Mehatz, Eusko ikaskuntza iparraldeko buruarekin eta Yves Ugalde axuantarekin. Pauline Guellek eskuratu zuen ikerketa saria, torturaren inguruan egin duen tesiarentzat. Sorkuntza saria, Lucia Barahonarentzat izan zen, bere aitatxi zen Filipe Oihanburuz egin dokumentalarentzat.
Ramuntxo Goietxe, Ramuntxo Labat eta Läetitia Guesdon-Michaud. Hiru hautagai Ahetzeko auzapeza izateko. Urte hastapenean iraganen dira hauteskundeak. Azken hilabeteetan gertatu herriko kontseiluk hainbat dimisioren ondorio zuzena da. Philippe Elizalderen kontrako uholde bat abiatu zen bere gehiengotik, zehazki Ramuntxo Goienetxe bere lehen axuanta ohiarengandik. Gardentasun eskasia eta alde bakarreko erabaki hartzeak leporatu zaizkio Elizalderi. Hiru zerrenda beraz, horietarik bi, agintaldiaren jarraikitasunean kokatzen direnak, eta ondoan oposizioan egon diren abertzaleak. Urtarrilaren 5ean iraganen da lehen itzulia. Bigarren bat balitz, urtarrilaren 12an. 14 hilabeteko agintaldi laburra izanen da, 2026 urteko herriko bozak aitzin.
200.000 euro bildu behar ditu Eraiki Funtsak, Patxoki Berriaren proiektua aitzina eramateko. Euskal Herriko metamorfosi ekologiko eta sozialaren elkargune izan nahi du gune berriak, bilkura gelez, etxebizitza sozialez eta aterpetxe solidario batez horniturik. Orotara milioi bat euroko proiektua da, eta eskas diren 200.000 euroak biltzeko diru bilketa kanpaina abiatu dute eraiki-funtsa.eus webgunean.
Erruduntzat jo dute Dominique Pelicot, eta hogei urteko kartzela zigorra ezarri diote. Halere, kondenaren bi heren betetakoan, haren kasua berrikusiko dute, eta baliteke baldintzapeko askatasuna ematea. Gainerako auzipetu guztiak ere erruduntzat jo dituzte, baina zigorrak eskatutakoak baino arinagoak izan dira. Horrez gain, 50 akusatuak erruduntzat jo baditu ere, zigorrak eskatutakoak baino txikiagoak izan dira: hiru urtetik hamabost urtera artekoak
Tolosako Dei Auzitegiak katalana herriko etxeetan baliatzeko debekua berretsi du. Montpellierko Prefeturak maiatzean eraman zuen auzitara gaia, auzapez katalanisten kexua eraginez. Orain, debekuaren kontra Estatu kontseilura joko dute hainbat herriko auzapezek, eta Europako giza eskubideen epaitegietara jotzeko prest dira.
14.000 euroko diru laguntza eskuratuko du EHZ festibalak. Kultur ikerketak eta egitasmoak sustatzen ditu Joan Mari Torrealdai Beka irabazi du. 2026an, 30 urte ospatuko ditu EHZ-k. Horren karietara, historian, eta bereziki musikagintzaren bilakaera aztertzeko egitasmoa aurkeztu du. Musikazaleak eta kontzertuen antolatzeko manerak nola aldatu diren aztertuz adibidez. 2026an, liburua plazaratzeaz gain, hainbat ekitaldi antolatuko ditu EHZ festibalak gai honi lotuak.
