ELB sindikatuak ardien mihi urdinaren eritasuna pairatu dutenendako elkartasunera deitzen du. Abendu hastapenean,departamenduko 650 ardi etxalde hunkiak izan dira. Kasu zenbaitetan, hamarka ardi galdu dituzte hazleek, bereziki marroak. Etxalde batzuek erraterako marroen %80 galdu dituzte hazleek, eta ondorioz, heldu den sasoia lanjerrean da. ELBk elkartasun deialdia zabaldu du, marroak laborarien artean prestatzeko. Sindikatua prest agertu da laguntza eskaini nahi dutenen eta jaso nahi dutenen artean lotura egiteko. Bereziki, marroak izan dira kopuru handienean hil direnak etxaldeetan. Horrenbestez, Laguntza emateko edo ukaiteko, ELBko bulegora deitu beharko da urtarrilaren 5a aitzin.

El Hogar igerilekuaren arraberritze eta handitzea bidean da. 26 milioi euroko inbertsioarekin, Claude Olive auzapezaren agintaldiko proiektu garrantzitsuena izanen da. Hiru igerileku izanen ditu ur-zentro berrituak, 800 metro karratuko ur eremuarekin. Helburu nagusia, Angeluko haurrei igerika irakasteko gunea izatea da. El Hogar igerilekuan 16.000 ikaslek ikasten zuten igerian, baina lanen ondotik, 36.000 izanen direla aitzinikusten dute, eta urtean, 180.000 bisitari igurikatzen dituzte. Ur zentroaren estrena 2025eko irailean izanen da. Herriko etxeak jakinarazi du orain arteko prezioek gora egingo zutela.

AXA asurantza etxearen kontrako ekintza astearte goizean Baionan. Bizi mugimenduak argitan eman nahi izan du aseguratzaileak, energia fosilen proiektuak babesten dituela. Larrialdi klimatikoa izan arren, AXAk besteak beste gas natural likidotuaren ustiapen proiektuak asuratzen ditu. Urtean 75 milioi tona CO2 eraginez. « Suhiltzaile piromanoaren » jokamoldea duela adierazteko, hainbat minutaz Bizik sua piztu du Baionako AXAren bulego baten aitzinean.

Bitcoin kriptodirua dolarraren baliotik hurbil delarik, blokchain edo bloke-katearen teknologiak bere indarra erakutsi du. Burtsa eta espekulazioaren gibelean finantza sistema eta orokorrean informazioaren teknologiaren aldaketa handi bat iragarri daiteke. Honek deszentralizazioa ekartzen du, informazio trukaketa bi pertsonen artean zuzen egitea ahalnidetzen baitu, artekaririk gabe, eta manera seguruan. Luzaz instituzioak aurka egon badira ere, estatu zenbait kriptodiruaren normalizatze prozesuan sakontzen ari dira, haien balioa azkartuz. eta horrek ere egiten du beren balioa azkarki emendatzen dela azken asteetan. Mikel Peñagarikano EHUko zientzia fakukltateko irakasleak azaldu duenez, «banku zentraletatik at mugitzen den diru deszentralizatu bat» existitzea bermatzen du blockchaineak.

Hendaiako Nid Marin egiturako zuzendari ohiak helegitea pausatu du. 2023an, institutu mediko-hezitzaileko hamalau langilek haien zuzendari ohia auzitara eraman zuten. Hainbat urtez, egituraren Higiene eta Segurtasun Batzordearen funtzionamendua oztopatu eta jazarpen morala egitea leporatzen diote. Auzitegiak lau hilabeteko presondegi-zigorra ezarri zion gibelapenarekin, baita 3.000 euroko isuna ere. Zuzendari ohiak ez du onartu epailearen erabakia, eta ostegun honetan zigor horri pausatu dion helegitea aztertuko du Paueko dei auzitegiak.

«Diputatuek hitza jan dute». FDSEA laborari sindikatua kexu agertu da tokiko parlamentarien kontra. Berriki gertatu frantses gobernuaren erortzearekin, «orain arte egindako lan guztia peko errekara bidaltzen dela» salatzen du. Beren hitzetan, aitzinkontuen lege proiektuak «400 milioi euro» aitzinikusi zituen laborantza saila bultzatzeko; horrez gain, zerga apaltzeak, instalaziorako laguntzak edota sasoiko langileendako onurak ere kontuan hartuak izan zirela defendatzen dute. FDSEAren arabera, badu urte bat laborantzaren munduak alarma jotzen duela. Neurri horiek ekainean aurkeztu behar ziren, baina zentsura mozioak dena baztertu suela salatzen du.

Garapen Iraunkorraren labela eskuratu du Bidarteko Estia ingeniari eskolak. Frantziako ingurumenaren ministerioak eta goi mailako ikasketen ministerioak beste hainbat eragilerekin batera onartzen duten labela da eta berrehun bat ingeniari eskoletan lehenetarik dira izendapena eskuratu dutenak. Garapen iraunkorraren alde lan egitea, karbono aztarna neurtzea, eskolak ingurumenean duen inpaktua murriztea... gai guzti horiek eguneroko lan bat galdegiten dute. Bi urteren buruan kontrol bat ukanen dute eta anartean hobetu beharreko puntuak hobetzea izanen dute helburu.

Frantziako Pilota Federakuntzako lehendakaria izanen da laugarrenez Lilou Etxeberria. Zazpi bozkako alde estuarekin gailendu da Stéphane Saint-Laurent oztibartarraren parean, 601 bozkarekin. Iparraldeko Pilota Batzordean izandako kalapitek kalte egin dioten arren, garaileak Xavier Cazaubon FIPVko presidentearen babesa erdietsi du. Federakuntzako batzorde berrian 26 jarleku ukanen ditu Etxeberriaren taldeak eta zortzi Saint-Laurentenak. Azken horrek, federakuntza kudeatzeko beste ikuspegi bat defendatzen zuen, «gobernantza gardenago eta partekatuago» bat aldarrikatuz. Horren aitzinean, FFPBaren «finantzen sendotasuna» erdietsi duela babestu du Etxeberriak, eta performantzia handiko zentro berriaren eraikuntzaren aldeko bere engaiamendua berretsi du.

AHT proiektuaren kontra agertu da Euskal Hirigune Elkargoa, Baionako Arteen Hirian larunbat goizean egin duen biltzarrean. Zehazki, 137 hautetsik bozkatu dute Bil Gaiten talde abertzaleak aurkeztu duen mozioaren alde, hogeik kontra eta 41k abstentziora jo dute. Biltzarra aitzin, ordea, elkarretaratzea egin dute Kanboko Marieniako laborantza lurren defendatzaileek. Eskuorriak banatu dizkiete hautetsiei hirigintza proiektuaren kontra mobiliza daitezen. Momentuz 45 hautetsik izenpetu dute Marieniako laborantza lurren aldeko testua, eta ondoko biltzarraren gai-ordenean gehitua izanen dela hitzeman du Jean René Etxegarai lehendakariak.